ஐபிஎல் 2023: சாம்சன், ஹெட்மையர் அதிரடியில் குஜராத்தை வீழ்த்தியது ராஜஸ்தான்!

குஜராத் டைட்டன்ஸுக்கு எதிரான ஐபிஎல் லீக் ஆட்டத்தில் ராஜஸ்தான் ராயல்ஸ் அணி 3 விக்கெட் வித்தியாசத்தில் வெற்றிபெற்று அசத்தியது.

IPL 2023: Sanju Samson, Shimron Hetmyer's heroics helps Rajasthan Royals have defeated Gujarat Titan (Image Source: Google)

ஐபிஎல் தொடரின் 16ஆவது சீசன் விறுவிறுப்பாக நடைபெற்றுவருகிறது. இதில் இன்று நடைபெற்ற 23ஆவது லீக் ஆட்டத்தில் குஜராத் டைட்டன்ஸ் - ராஜஸ்தான் ராயல்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற ராஜஸ்தான் ராயல்ஸ் அணி முதலில் பந்துவீச தீர்மானித்தது. அதன்படி குஜராத் அணியின் தொடக்க வீரர்களாக விருத்திமான் சஹா - ஷுப்மன் கில் இணை களமிறங்கினர். 

இதில் விருத்திமான் சஹா 4 ரன்களை மட்டுமே எடுத்த நிலையில் டிரெண்ட் போல்ட்டின் முதல் ஓவரிலேயே விக்கெட்டை இழந்தார். அதன்பின் களமிறங்கிய சய் சுதர்சன் நிதான ஆட்டத்தை வெளிப்படுத்தி 20 ரன்கள் எடுத்த நிலையில் எதிர்பாராதவிதமாக ரன் அவுட்டாகினார். அதனைத்தொடர்ந்து ஷுப்மன் கில்லுடன் இணைந்த கேப்டன் ஹர்திக் பாண்டியா அதிரடியாக விளையாடி அணியின் ஸ்கோரை உயர்த்தினார். 

அதன்பின் 3 பவுண்டரி, ஒரு சிக்சர் என 28 ரன்களில் ஹர்திக் பாண்டியா ஆட்டமிழக்க, மறுமுனையில் அரைசதம் அடிப்பார் என எதிர்பார்க்கப்பட்ட ஷுப்மன் கில் 45 ரன்களில் ஆட்டமிழந்து அரைசதம் அடிக்கும் வாய்ப்பை தவறவிட்டார். இதையடுத்து டேவிட் மில்லர் - அபினவ் மனோகர் இணை ஜோடி சேர்ந்தனர். இருவரும் தொடர்ந்து பவுண்டரிகளை விரட்ட அணியின் ஸ்கோரும் மளமளவென உயர்ந்தது. பின் 3 சிக்சர்களை விளாசி 27 ரன்களைச் சேர்த்திருந்த அபினவ் மனோகர் விக்கெட்டை இழந்தார். 

இருப்பினும் தொடர்ந்து அதிரடியாக விளையாடி வந்த டேவிட் மில்லர் 30 பந்துகளில் 3 பவுண்டரி, 2 சிக்சர்கள் என 46 ரன்களைச் சேர்த்து அரைசதம் அடிக்கும் வாய்ப்பை தவறவிட்டார். இதனால் நிர்ணயிக்கப்பட்ட 20 ஓவர்கள் முடிவில் குஜராத் டைட்டன்ஸ் அணி 7 விக்கெட்டுகளை இழந்து 177 ரன்களைச் சேர்த்தது. ராஜஸ்தான் அணி தரப்பில் சந்தீப் சர்மா 2 விக்கெட்டுகளை கைப்பற்றினர். 

இதையடுத்து இலக்கை நோக்கி களமிறங்கிய ராஜஸ்தான் அணிக்கு அதிர்ச்சியளிக்கும் வகையில் யஷஸ்வின் ஜெய்ஸ்வால் ஒரு ரன்னிலும், அதிரடி வீரர் ஜோஷ் பட்லர் ரன்கள் ஏதுமின்றியும் அடுத்தடுத்து விக்கெட்டுகளை இழந்து ஏமாற்றமளித்தனர். அதனைத்தொடர்ந்து ஜோடி சேர்ந்த தேவ்தத் படிக்கல் - கேப்டன் சஞ்சு சாம்சன் இணை பொறுப்பான ஆட்டத்தை வெளிப்படுத்தி விக்கெட் இழப்பை தடுத்தனர். 

ஒரு கட்டத்திற்கு பவுண்டரியும், சிக்சர்களுமாக விளாசிய தேவ்தத் படிக்க 2 பவுண்டரி, 2 சிக்சர்கள் என 26 ரன்களை எடுத்திருந்த நிலையில் ரஷித் கான் பந்துவீச்சில் விக்கெட்டை இழந்தார். ஆனால் மறுமுனையில் தொடர்ந்து அதிரடி காட்டிய சஞ்சு சாம்சன் 29 பந்துகளில் அரைசதம் கடந்து அணிக்கு நம்பிக்கை அளித்தார். 

பின் 3 பவுண்டரி, 6 சிக்சர்கள் என வானவேடிக்கை காட்டிய சஞ்சு சாம்சன் 60 ரன்களை சேர்த்த நிலையில், அறிமுக பந்துவீச்சாளர் நூர் அஹ்மத் பந்துவீச்சில் விக்கெட்டை இழந்தார். அதன்பின் வந்த துரூவ் ஜுரெல் 2 பவுண்டரி, ஒரு சிக்சர் என 18 ரன்களைச் சேர்த்த நிலையில் முகமது ஷமி பந்துவீச்சில் ஆட்டமிழந்தார். 

அவரைத் தொடர்ந்து களமிறங்கிய ரவிச்சந்திரன் அஸ்வின் சந்தித்த முதல் பந்தை பவுண்டரிக்கும், இரண்டாவது பந்தை சிக்சருக்கும் விளாசி ஆட்டத்தின் பிரஷரை குறைத்த நிலையில், அடுத்த பந்திலேயே விக்கெட்டை இழந்து ஏமாற்றமளித்தார். அதேசமயம் மறுபக்கம் தொடர்ந்து அதிரடியாக விளையாடி வந்த ஷிம்ரான் ஹெட்மையர் 25 பந்துகளில் அரைசதம் கடந்ததுடன், சிக்சர் அடித்து ஆட்டத்தை முடித்து வைத்தார். 

இதன்மூலம் ராஜஸ்தான் ராயல்ஸ் அணி 19.2 ஓவர்களில் இலக்கை எட்டியதுடன், 3 விக்கெட் வித்தியாசத்தில் குஜராத் டைட்டன்ஸை வீழ்த்தி கடந்தாண்டு தோல்விகளுக்கு பழித்தீர்த்துக்கொண்டது. இதில் இறுதிவரை ஆட்டமிழக்காமல் இருந்த ஷிம்ரான் ஹெட்மையர் 26 பந்துகளில் 5 சிக்சர், 2 பவுண்டரிகள் என 56 ரன்களைச் சேர்த்து அணியின் வெற்றிக்கு உதவினார். 

Win Big, Make Your Cricket Tales Now