ஐபிஎல் 2024: விராட் கோலியின் சாதனையை முறியடித்த ஷுப்மன் கில்!

ஐபிஎல் தொடர் வரலாற்றில் இளம் வயதில் 3000 ரன்களை எட்டிய வீரர் எனும் விராட் கோலியின் சாதனையை குஜராத் டைட்டன்ஸ் அணி கேப்டன் ஷுப்மன் கில் முறியடித்துள்ளார்.

ஐபிஎல் 2024: விராட் கோலியின் சாதனையை முறியடித்த ஷுப்மன் கில்! (Image Source: Google)

ஐபிஎல் தொடரில் இன்று நடைபெற்ற 24ஆவது லீக் போட்டியில் சஞ்சு சாம்சன் தலைமையிலான ராஜஸ்தான் ராயல்ஸ் அணியை எதிர்த்து ஷுப்மன் கில் தலைமையிலான குஜராத் டைட்டன்ஸ் அணி மோதியது. ஜெய்ப்பூரில் உள்ள சவாய் மான்சிங் மைதானத்தில் நடைபெற்ற இப்போட்டியில் டாஸ் வென்ற குஜராத் டைட்டன்ஸ் அணி முதலில் பந்துவீசுவதாக அறிவித்து களமிறங்கியது. 

இதையடுத்து ராஜஸ்தான் ராயல்ஸ் அணிக்கு தொடக்கம் ஜோஸ் பட்லர் - யஷஸ்வி ஜெய்ஸ்வால் கொடுத்தனர். இதில் அதிரடியாக தொடங்கிய யஷஸ்வி ஜெய்ஸ்வால் 21 ரன்களில் விக்கெட்டை இழக்க, மறுபக்கம் தடுமாற்றமான பேட்டிங்கை வெளிப்படுத்திய ஜோஸ் பட்லர் 10 ரன்களில் தனது விக்கெட்டை இழந்தார். இதனையடுத்து ஜோடி சேர்ந்த கேப்டன் சஞ்சு சாம்சன் - ரியான் பராக் இணை அதிரடியான ஆட்டத்தை வெளிப்படுத்தி அணியின் ஸ்கோரை உயர்த்தினர்.

இதில் இருவரும் அரைசதம் கடக்க, 20 ஓவர்கள் முடிவில் ராஜஸ்தான் ராயல்ஸ் அணி 3 விக்கெட்டுகளை மட்டுமே இழந்து 196 ரன்களைக் குவித்தது. இதில் இறுதிவரை ஆட்டமிழக்காமல் இருந்த கேப்டன் சஞ்சு சாம்சன் 7 பவுண்டரி, 2 சிக்சர்கள் என 68 ரன்களையும், அதிரடியான ஆட்டத்தை வெளிப்படுத்திய ரியான் பராக் 3 பவுண்டரி, 5 சிக்சர்கள் என 76  ரன்களையும் சேர்த்தனர். குஜராத் அணி தரப்பில் ரஷித் கான், உமேஷ் யாதவ், மோஹித் சர்மா ஆகியோர் தலா ஒரு விக்கெட்டை கைப்பற்றினர். 

இதையடுத்து கடின இலக்கை நோக்கி விளையாடிய குஜராத் டைட்டன்ஸ் அணிக்கு ஷுப்மன் கில் - சாய் சுதர்ஷன் இணை அதிரடியான தொடக்கத்தைக் கொடுத்து அணிக்கு தேவையான அடித்தளத்தை அமைத்துக் கொடுத்தனர். இருவரும் இணைந்து முதல் விக்கெட்டிற்கு 64 ரன்கள் பார்ட்னர்ஷிப் அமைத்த நிலையில், 3 பவுண்டரி, ஒரு சிக்சர் என 35 ரன்களைச் சேர்த்திருந்த சாய் சுதர்ஷன் தனது விக்கெட்டை இழந்தார். 

அவரைத் தொடர்ந்து களமிறங்கிய மேத்யூ வேட் 4 ரன்கள் எடுத்த நிலையில் குல்தீப் சென் பந்துவீச்சில் ஆட்டமிழந்தார். இதனால் அந்த அணி 10.1 ஓவர்களில் 2 விக்கெட் இழப்பிற்கு 77 ரன்களை சேர்த்தது. இதில் சிறப்பான ஆட்டத்தை வெளிப்படுத்தி வரும் கேப்டன் ஷுப்மன் கில் அணியை சரிவிலிருந்து மீட்டெடுக்கும் முறையில் இறங்கி வருகிறார். இந்நிலையில் இப்போட்டியில் ஷுப்மன் கில் 27 ரன்களை எடுத்த போது ஐபிஎல் தொடரில் தனது 3000 ரன்களை எட்டினார். 

இதன் மூலம் ஐபிஎல் தொடர் வரலாற்றில் மிள இளம் வயதில் 3000 ரன்களை கடந்த வீரர் எனும் விராட் கோலியின் சாதனையை முறியடித்து ஷுப்மன் கில் புதிய சாதனை படைத்துள்ளார். இதற்கு முன் விராட் கோலி 26 வருடம், 186 நாள்களில் இந்த சாதனையைப் படைத்த நிலையில், ஷுப்மன் கில் 24 வருடம், 215 நாள்களில் 3000 ரன்களைச் சேர்த்து புதிய சாதனையை படைத்துள்ளார். 

மிக இளம் வயதில் 3000 ரன்கள் அடித்த வீரர்கள் (ஐபிஎல்)

• ஷுப்மன் கில் - 24 வருடம், 215 நாள்கள்
• விராட் கோலி - 26 வருடம், 186 நாள்கள்
• சஞ்சு சாம்சன் - 26 வருடம், 326 நாள்கள்
• சுரேஷ் ரெய்னா - 27 வருடம், 161 நாள்கள்
• ரோஹித் சர்மா - 27 வருடம், 343 நாள்கள்

மேலும் ஐபிஎல் தொடர் வரலாற்றில் அதிவேகமாக 3000 ரன்களை அடித்த நான்காவது வீரர் எனும் பெருமையையும் ஷுப்மன் கில் பெற்றுள்ளார். இப்பட்டியலில் கிறிஸ் கெயில் 75 இன்னிங்ஸில் 3000 ரன்களை எட்டியதே சாதனையாக இருந்து வரும் நிலையில், ஷுப்மன் கில் தனது 94ஆவது இன்னிங்ஸில் 3000 ரன்களை எட்டி இப்பட்டியலில் நான்காவது இடத்தைப் பிடித்துள்ளார். 

அதிவேகமாக 3000 ரன்களை அடித்த வீரர்கள் (ஐபிஎல்)

• கிறிஸ் கெயில் - 74 இன்னிங்ஸ்
• கேஎல் ராகுல்  - 80 இன்னிங்ஸ்
• ஜோஸ் பட்லர் - 85 இன்னிங்ஸ்
• ஷுப்மன் கில் - 94 இன்னிங்ஸ்
• டேவிட் வார்னர் - 94 இன்னிங்ஸ்
• ஃபாஃப் டூ பிளெசிஸ் - 94 இன்னிங்ஸ்

 

Win Big, Make Your Cricket Tales Now