ஐபிஎல் 2025: சென்னை சூப்பர் கிங்ஸை வீழ்த்தி பிளே ஆஃப் வாய்ப்பை தக்கவைத்தது சன்ரைசர்ஸ்!
சென்னை சூப்பர் கிங்ஸுக்கு எதிரான ஐபிஎல் லீக் போட்டியில் சன்ரைசர்ஸ் ஹைதராபாத் அணி 5 விக்கெட் வித்தியாசத்தில் வெற்றிபெற்றதுடன், பிளே ஆஃப் வாய்ப்பையும் தக்கவைத்தது.
சென்னையில் உள்ள எம் ஏ சிதம்பரம் கிரிக்கெட் மைதானத்தில் நடைபெற்ற இப்போட்டியில் டாஸ் வென்ற சன்ரைசர்ஸ் ஹைதராபாத் அணி முதலில் பந்துவீசுவதாக அறிவித்தது. இன்றைய போட்டிக்கான சென்னை சூப்பர் கிங்ஸ் அணியில் அறிமுகம் வீரர் டெவால்ட் பிரீவிஸ் லெவனில் இடம்பிடித்தார். இதனையடுத்து களமிறங்கிய சென்னை சூப்பர் கிங்ஸ் அணிக்கு முதல் பந்திலேயே அதிர்ச்சி காத்திருந்தது. அதன்படி தொடக்க வீரர் ஷேக் ரஷீத் முதல் பந்திலேயே தனது விக்கெட்டை இழந்து ஏமாற்றமளித்தார். அவரைத்தொடர்ந்து களமிறங்கிய சாம் கரணும் 9 ரன்களை மட்டுமே எடுத்த கையோடு நடையைக் கட்டினார்.
Also Read
மேற்கொண்டு அதிரடியாக விளையாடி வந்த மற்றொரு தொடக்க வீரர் ஆயூஷ் மாத்ரே 6 பவுண்டரிகளுடன் 30 ரன்களைச் சேர்த்த கையோடு விக்கெட்டை இழந்தார். இதனால் சிஎஸ்கே அணி பவர்பிளே ஓவர்களிலேயே 3 விக்கெட்டுகளை இழந்து தடுமாறியது. பின்னர் ஜோடி சேர்ந்த ரவீந்திர ஜடேஜா - டெவால்ட் பிரீவிஸ் இணை பொறுப்புடன் விளையாடி விக்கெட் இழப்பை சிறிது நேரம் தடுத்து நிறுத்தினர். இதில் பெரிதும் எதிர்பார்க்கப்பட்ட ரவீந்திர ஜடேஜா ஒரு பவுண்டரி, ஒரு சிக்ஸர் என 21 ரன்களிலும், அடுத்து களமிறங்கிய ஷிவம் தூபே 12 ரன்களிலும் என விக்கெட்டுகளை இழந்தனர்.
இதற்கிடையில் சிஎஸ்கே அணிக்காக அறிமுக போட்டியில் களமிறங்கிய டெவால்ட் பிரீவிஸ் அதிரடியாக விளையாடி அணியின் ஸ்கோரை உயர்த்தி வந்த நிலையில், ஒரு பவுண்டரி, 4 சிக்ஸர்கள் என 42 ரன்களை சேர்த்து விக்கெட்டை இழந்தார். இதைத்தொடர்ந்து களமிறங்கிய கேப்டன் எம் எஸ் தோனி 6 ரன்னிலும், அன்ஷுல் கம்போஜ் மற்றும் நூர் அஹ்மத் ஆகியோர் தலா 2 ரன்னிலும் என அடுத்தாடுத்து விக்கெட்டுகளை இழந்தனர். இறுதியில் அதிரடியாக விளையாட முயன்ற தீபக் ஹூடாவும் ஒரு பவுண்டரி, ஒரு சிக்ஸர் என 22 ரன்களில் விக்கெட்டை இழந்தார்.
இதன் காரணமாக சென்னை சூப்பர் கிங்ஸ் அணி 19.5 ஓவர்களிலேயே அனைத்து விக்கெட்டுகளையும் இழந்ததுடன் 154 ரன்களுக்கு ஆல் அவுட்டானது. சன்ரைசர்ஸ் ஹைதராபாத் அணி தரப்பில் அபாரமான பந்துவீச்சை வெளிப்படுத்திய ஹர்ஷல் படேல் 4 விக்கெட்டுகளையும், கேப்டன் பாட் கம்மின்ஸ் மற்றும் ஜெய்தேவ் உனாத்கட் ஆகியோர் தலா 2 விக்கெட்டுகளை கைப்பற்றினர். இதனையடுத்து இலக்கை நோக்கி களமிறங்கிய சன்ரைசர்ஸ் ஹைதராபாத் அணியிலும் தொடக்க வீரர் அபிஷேக் சர்மா ரன்கள் ஏதுமின்றி விக்கெட்டை இழந்து அதிர்ச்சி கொடுத்தார்.
பின்னர் இணைந்த டிராவிஸ் ஹெட் மற்றும் இஷான் கிஷான் இணை நிதான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் பெரிதும் எதிர்பார்க்கப்பட்ட டிராவிஸ் ஹெட் 19 ரன்களில் தனது விக்கெட்டை இழக்க, அடுத்து களமிறங்கிய ஹென்ரிச் கிளாசெனும் 7 ரன்களில் விக்கெட்டை இழந்தார். இதனையடுத்து இஷான் கிஷனுடன் இணைந்த அனிகெத் வர்மாவும் பொறுப்புடன் விளையாட அணியின் ஸ்கோரும் சீரான வேகத்தில் உயர்ந்தது. இதில் அரைசதத்தை நெருங்கிய இஷான் கிஷன் 5 பவுண்டரி, ஒரு சிக்ஸர் என 44 ரன்களில் ஆட்டமிழந்தார்.
Also Read: LIVE Cricket Score
அவரைத்தொடர்ந்து அதிரடியாக விளையாடும் முயற்சியில் அனிகெத் வர்மாவும் 2 சிக்ஸர்களுடன் 19 ரன்களைச் சேர்த்த கையோடு நடையைக் கட்டினார். இருப்பினும் அதன்பின் களமிறங்கி இறுதிவரை ஆட்டமிழக்காமல் இருந்த கமிந்து மெண்டிஸ் 32 ரன்களையும், நிதீஷ் ரெட்டி 19 ரன்களையும் சேர்க்க சன்ரைசர்ஸ் ஹைதராபாத் அணி 18.4 ஓவர்களில் இலக்கை எட்டி 5 விக்கெட் வித்தியாசத்தில் சென்னை சூப்பர் கிங்ஸை வீழ்த்தியது. இந்த வெற்றியின் மூலம் சன்ரைசர்ஸ் அணி பிளே ஆஃப் வாய்ப்பில் நீடிக்கும் நிலையில், சிஎஸ்கே அணி பிளே ஆஃப் வாய்ப்பை இழந்துள்ளது.
Win Big, Make Your Cricket Tales Now
