ஐபிஎல் 2025: சன்ரைசர்ஸ் ஹைதராபாத்தை வீழ்த்தி குஜராத் டைட்டன்ஸ் அபார வெற்றி!
சன்ரைசர்ஸ் ஹைதராபாத் அணிக்கு எதிரான ஐபிஎல் லீக் போட்டியில் குஜராத் டைட்டன்ஸ் அணி 7 விக்கெட் வித்தியாசத்தில் அபார வெற்றியைப் பதிவுசெய்து அசத்தியுள்ளது.
ஹைதராபாத்தில் உள்ள ராஜீவ் காந்தி சர்வதேச கிரிக்கெட் மைதானத்தில் நடைபெற்ற இப்போட்டியில் டாஸ் வென்ற குஜராத் டைட்டன்ஸ் அணி முதலில் பந்துவீசுவதாக அறிவித்தது. இதையடுத்து களமிறங்கியன் சன்ரைசர்ஸ் அணிக்கு டிராவிஸ் ஹெட் மற்றும் அபிஷேக் சர்மா இணை தொடக்கம் கொடுத்தனர். இதில் அதிரடியாக தொடங்கிய டிராவிஸ் ஹெட் 8 ரன்களை மட்டுமே எடுத்திருந்த நிலையில் விக்கெட்டை இழந்தார். பின்னர் அபிஷேக் சர்மாவுடன் இணைந்த இஷான் கிஷனும் நிதானமாக விளையாடி அணியின் விக்கெட் இழப்பை தடுத்து நிறுத்தும் முயற்சியில் இறங்கினார்.
Trending
அதன்பின் பெரிதும் எதிர்பார்க்கப்பட்ட அபிஷேக் சர்மா 18 ரன்களில் தனது விக்கெட்டை இழக்க, அவரைத்தொடர்ந்து நிதானமாக விளையாடி வந்த இஷான் கிஷனும் 17 ரன்களில் நடையைக் கட்டினார். பின்னர் இணைந்த நிதீஷ் ரெட்டி மற்றும் ஹென்ரிச் கிளாசென் இணை பொறுப்புடன் விளையாடி அணியின் ஸ்கோரை உயர்த்தினர். இதில் இருவரும் 50 ரன்கள் பார்ட்னர்ஷிப் அமைத்திருந்த நிலையில் ஹென்ரிச் கிளாசென் 27 ரன்களையும், அவரைத்தொடர்ந்து 31 ரன்கள் எடுத்திருந்த நிலையில் நிதீஷ் ரெட்டியும் ஆட்டமிழக்க, பின்னர் களமிறங்கிய கமிந்து மெண்டிஸும் ஒரு ரன்னுடன் நடையைக் கட்டினார்.
பின்னர் பெரிதும் எதிர்பார்க்கப்பட்ட அனிகெத் வெர்மா 18 ரன்களிலும், சிமர்ஜித் சிங் ரன்கள் ஏதுமின்றியும் விக்கெட்டை இழந்தனர். அதன்பின் இறுதியில் அதிரடியாக விளையாடிய கேப்டன் பாட் கம்மின்ஸ் 3 பவுண்டரி, ஒரு சிக்ஸர் என 22 ரன்களையும், முகமது ஷமி 6 ரன்களையும் சேர்த்து அணிக்கு தேவையான ஃபினிஷிங்கைக் கொடுத்தனர். இதன்மூலம் சன்ரைசர்ஸ் ஹைதராபாத் அணி 20 ஓவர்கள் முடிவில் 8 விக்கெட்டுகளை இழந்து 152 ரன்களை மட்டுமே எடுத்தது. குஜராத் டைட்டன்ஸ் தரப்பில் அபார பந்துவீச்சை வெளிப்படுத்திய முகமது சிராஜ் 4 விக்கெட்டுகளை கைப்பற்றி அசத்தினார்.
அதன்பின் இலக்கை நோக்கி விளையாடிய குஜராத் டைட்டன்ஸ் அணிக்கு ஷுப்மன் கில் மற்றும் சாய் சுதர்ஷன் இணை தொடக்கம் கொடுத்தனர். இதில் சாய் சுதர்ஷன் 5 ரன்களில் விக்கெட்டை இழக்க, அடுத்து களமிறங்கிய ஜோஸ் பட்லர் ரன்கள் ஏதுமின்றி விக்கெட்டை இழந்து ஏமாற்றமளித்தார். இதனால் அந்த அணி 16 ரன்களில் 2 விக்கெட்டுகளை இழந்து தடுமாறியது. அதன்பின் ஷுப்மன் கில்லுடன் ஜோடி சேர்ந்த வாஷிங்டன் சுந்தர் தொடக்கம் முதலே பவுண்டரிகளையும், சிக்சர்களையும் பறக்கவிட அணியின் ஸ்கோரும் மளமளவென உயர்ந்தது.
மேற்கொண்டு ஷுப்மன் கில்லும் சிறப்பான ஆட்டத்தை வெளிப்படுத்தி ஸ்கோரை உயர்த்தினார். இப்போட்டியில் இருவரும் இணைந்து மூன்றாவது விக்கெட்டிற்கு 90 ரன்கள் பார்ட்னர்ஷிப் அமைத்ததுடன் அணியின் வெற்றியையும் உறுதிசெய்தனர். இதில் சிறப்பான ஆட்டத்தை வெளிப்படுத்திய ஷுப்மன் கில் தனது அரைசதத்தைப் பதிவுசெய்து அசத்தினார். அதேசமயம் அரைசதத்தை நெருங்கிய வாஷிங்டன் சுந்தர் 5 பவுண்டரி, 2 சிக்ஸர்கள் என 49 ரன்களைச் சேர்த்திருந்த நிலையில் விக்கெட்டை இழந்ததுடன் தனது முதல் அரைசதத்தைப் பதிவுசெய்யும் வாய்ப்பையும் தவறவிட்டார்.
Also Read: Funding To Save Test Cricket
அவரைத்தொடர்ந்து களமிறங்கிய ஷெர்ஃபேன் ரூதர்ஃபோர்டும் அதிரடியாக விளையாடி அணியின் வெற்றியை உறுதிசெய்தார். மேற்கொண்டு இப்போட்டியில் இறுதிவரை ஆட்டமிழக்காமல் இருந்த ஷுப்மன் கில் 9 பவுண்டரிகளுடன் 60 ரன்களையும், ஷெர்ஃபேன் ரூதர்ஃபோர்ட் 6 பவுண்டரி, ஒரு சிக்ஸர் என 34 ரன்களைச் சேர்த்து அணிக்கு வெற்றியைத் தேடிக்கொடுத்தனர். இதன்மூலம் குஜராத் டைட்டன்ஸ் அணி 7 விக்கெட் வித்தியாசத்தில் சன்ரைசர்ஸ் ஹைதராபாத் அணியை வீழ்த்தியதுடன், நடப்பு ஐபிஎல் தொடரில் தங்களுடன் மூன்றாவது வெற்றியையும் பதிவுசெய்து அசத்தியுள்ளது.
Win Big, Make Your Cricket Tales Now
