IRE vs ZIM: தொடரை வென்று அயர்லாந்து அசத்தல்!

ஜிம்பாப்வே அணிக்கெதிரான நான்காவது டி20 போட்டியில் அயர்லாந்து அணி 64 ரன்கள் வித்தியாசத்தில் வெற்றிபெற்றதுடன், டி20 தொடரை 3-1 என்ற கணக்கில் கைப்பற்றியது.

அயர்லாந்து - ஜிம்பாப்வே அணிகளுக்கு இடையேயான நான்காவது டி20 போட்டி இன்று டப்லினில் நடைபெற்றது. இதில் டாஸ் வென்ற ஜிம்பாப்வே அணி முதலில் பந்துவீசியது. 

அதன்படி களமிறங்கிய அயர்லாந்து அணி கெவின் ஓ பிரையன், பால் ஸ்டிர்லிங், பால்பிர்னி ஆகியோரது அதிரடி ஆட்டத்தினால் 20 ஓவர்கள் முடிவில் 4 விக்கெட்டுகளை இழந்து 174 ரன்களைச் சேர்த்தது. 

இதில் அதிகபட்சமாக கெவின் ஓ பிரையன் 47 ரன்களையும், பால் ஸ்டிர்லிங் 39 ரன்களையும் சேர்த்தனர். ஜிம்பாப்வே அணி தரப்பில் மஸகட்ஸா 2 விக்கெட்டுகளை கைப்பற்றினார்.

இதையடுத்து கடின இலக்கை துரத்திய ஜிம்பாப்வே அணி ஆரம்பம் முதலே அயர்லாந்தின் பந்துவீச்சை தாக்குப்பிடிக்க முடியாமல் அடுத்தடுத்து விக்கெட்டுகளை இழந்து தடுமாறியது. 

இதனால் 20 ஓவர்கள் முடிவில் அந்த அணியால் 9 விக்கெட் இழப்பிற்கு 110 ரன்களை மட்டுமே எடுக்க முடிந்தது. இதன்மூலம் அயர்லாந்து அணி 64 ரன்கள் வித்தியாசத்தில் ஜிம்பாப்வேவை வீழ்த்தியதுடன், ஐந்து போட்டிகள் கொண்ட டி20 தொடரையும் 3-1 என்ற கணக்கில் கைப்பற்றியது.