Curtis Campher 5 Wicket in 5 Balls: தொழில் முறை கிரிக்கெட்டில் தொடர்ச்சியாக 5 பந்துகளில் 5 விக்கெட்டுகளை வீழ்த்திய முதல் வீரர் எனும் சாதனையை அயர்லாந்து வேகாப்பந்து வீச்சாளர் கர்டிஸ் கேம்பர் படைத்துள்ளார்.
அயர்லாந்தில் நடைபெற்று வரும் உள்ளூர் டி20 தொடரான இன்டர்-புரோவின்சியல் தொட்ரில் நேற்று நடைபெற்ற லீக் போட்டியில் முன்ஸ்டர் மற்றும் நார்த் வெஸ்ட் வாரியர்ஸ் அணிகள் பலப்பரீட்சை நடத்தின. இப்போட்டியில் டாஸ் வென்ற முன்ஸ்டர் அணியானது 20 ஓவர்கள் முடிவில் 7 விக்கெட்டுகள் இழப்பிற்கு 188 ரன்களைச் சேர்த்தது. இதில் அதிகபட்சமாக கேப்டன் கர்டிஸ் காம்பேர் 44 ரன்களையும், பீட்டர் மூர் 35 ரன்களையும் சேர்த்தனர்.
அதன்பின் இலக்கை நோக்கி விளையாடிய நார்த் வெஸ்ட் வாரியர்ஸ் அணியில் ஸ்காட் மெக்பெத் 33 ரன்களையும், கேப்டன் ஆண்டி மெக்பிரைன் 29 ரன்களையும் சேர்த்ததை தவிர்த்து மற்ற வீரர்கள் சோபிக்க தவறினர். இதனால் அந்த அணி 13.3 ஓவர்களில் அனைத்து விக்கெட்டுகளையும் இழந்து 88 ரன்களுக்கு ஆல் அவுட்டானது. முன்ஸ்டர் அணி தரப்பில் கர்டிஸ் காம்பெர் 5 விக்கெட்டுகளை வீழ்த்தினார். இதன்மூலம் முன்ஸ்டர் அணி 100 ரன்கள் வித்தியாசத்தில் வெற்றிபெற்று அசத்தியது.
