ஆஸ்திரேலிய ஆடவர் கிரிக்கெட் அணியின் தலைமைப் பயிற்சியாளராக 2018ஆம் ஆண்டு மே மாதம் ஜஸ்டின் லாங்கர் நியமிக்கப்பட்டார். 2022 ஜூன் மாதம் வரை பதவிக்காலம் இருந்த நிலையில் கடந்த பிப்ரவரி மாதம் பயிற்சியாளர் பதவியிலிருந்து லாங்கர் திடீரென விலகுவதாக அறிவித்தார்.
ஆஸ்திரேலிய அணிக்கு 2021 டி20 உலகக் கோப்பையை பெற்றுக் கொடுத்தது, ஆஷஸ் கோப்பை வெற்றி என அடுக்கடுக்காக வெற்றிகளை லாங்கர் பயிற்சியில் ஆஸ்திரேலிய அணி வென்றபோதிலும் அவர் விலகியது பல்வேறு சந்தேகங்களை கிளப்பியது.
ஆஸ்திரேலிய வீரர்களுடனான உறவில் ஏற்பட்ட கசப்பான அனுபவம், முறிவு போன்றவைதான் பயிற்சியாளர் பதவியிலிருந்து விலகக் காரணம் என்று லாங்கர் முதலில் தெரிவித்தார். ஆனால், ஆஸ்திரேலிய கிரிக்கெட் வாரியம் லாங்கருக்கு எதிராக செயல்பட்டது தெரிந்தபின் ஸ்டீவ் வாஹ், மார்க் வாஹ், ரிக்கி பாண்டிங், மேத்யூ ஹேடன், மறைந்த ஷேன் வார்ன் ஆகியோர் லாங்கருக்கு ஆதரவாக கருத்துக்களைத் தெரிவித்தனர்.
