விராட் கோலியின் சாதனையை முறியடித்த கேன் வில்லியம்சன்!
சர்வதேச ஒருநாள் கிரிக்கெட்டில் அதிவேகமாக 7ஆயிரம் ரன்களை கடந்த இரண்டாவது வீரர் எனும் விராட் கோலியின் சாதனையை கேன் வில்லியம்சன் முறியடித்துள்ளார்.
பாகிஸ்தானில் நடைபெற்று வரும் முத்தரப்பு ஒருநாள் தொடரில் இன்று நடைபெற்ற இரண்டாவது போட்டியில் தென் ஆப்பிரிக்கா மற்றும் நியூசிலாந்து அணிகள் பலப்பரீட்சை நடத்தின. லாகூரில் உள்ள கடாஃபி கிரிக்கெட் மைதானத்தில் நடைபெற்ற இப்போட்டியில் டாஸை இழந்து முதலில் பேட்டிங் செய்த தென் ஆப்பிரிக்க அணி 50 ஓவர்கள் முடிவில் 6 விக்கெட் இழப்பிற்கு 304 ரன்களைச் சேர்த்தது.
அந்த அணியில் அதிகபட்சமாக அறிமுக வீரர் மேத்யூ பிரீட்ஸ்கி 11 பவுண்டரி, 5 சிக்ஸர்கள் என 150 ரன்களையும், வியான் முல்டர் 5 பவுண்டரி, ஒரு சிக்ஸர் என 64 ரன்களையும் சேர்த்தனர். நியூசிலாந்து தரப்பில் மேட் ஹென்றி மற்றும் வில்லியம் ஓரூர்க் தலா 2 விக்கெட்டுகளை கைப்பற்றினர். அதன்பின் களமிறங்கிய நியூசிலாந்து அணியில் வில் யங் 19 ரன்களில் விக்கெட்டை இழக்க, அடுத்து ஜோடி சேர்ந்த டெவான் கான்வே - கேன் வில்லியம்சன் இணை அபார ஆட்டத்தை வெளிப்படுத்தி ஸ்கோரை உயர்த்தினர்.
Trending
இதில் டெவான் கான்வே 97 ரன்களில் ஆட்டமிழந்து சதமடிக்கும் வாய்ப்பை தவறவிட்ட நிலையில், மறுபக்கம் அபாரமாக விளையாடிய கேன் வில்லியம்சன் சதமடித்து அசத்தியதுடன் இறுதிவரை ஆட்டமிழக்காமல் 13 பவுண்டரி, 2 சிக்ஸர்கள் என 133 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் நியூசிலாந்து அணி 48.4 ஓவர்களில் இலக்கை எட்டியதுடன் 6 விக்கெட் வித்தியாசத்தில் தென் ஆப்பிரிக்க அணியை வீழ்த்தி அபார வெற்றியைப் பதிவுசெய்து அசத்தியது.
இப்போட்டியில் சதமடித்து அசத்தியதுடன் அணியை வெற்றிக்கு அழைத்துச் சென்ற கேன் வில்லியம்சன் ஆட்டநாயகன் விருதை வென்றார். இந்நிலையில் இப்போட்டியில் கேன் வில்லியம்சன் 133 ரன்களைச் சேர்த்ததன் மூலம் சர்வதேச ஒருநாள் கிரிக்கெட்டில் புதிய மைல் கல்லையும் எட்டியுள்ளார். அந்தபடி அவர் இப்போட்டியின் மூலம் சர்வதேச ஒருநாள் கிரிக்கெட்டில் தனது 7ஆயிரம் ரன்களைக் பூர்த்தி செய்து அசத்தியுள்ளார்.
மேற்கொண்டு ஒருநாள் கிரிக்கெட் வரலாற்றில் அதிவேகமாக 7ஆயிரம் ரன்களை கடந்த இரண்டாவது வீரர் எனும் விராட் கோலியின் சாதனையையும் கேன் வில்லியம்சன் முறியடித்துள்ளார். முன்னதாக விராட் கோலி தனது 161ஆவது இன்னின்ஸில் 7ஆயிரம் ரன்களைக் கடந்ததே சாதனையாக இருந்த நிலையில், தற்போது கேன் வில்லியம்சன் தனது 159ஆவது இன்னிங்ஸில் 7ஆயிரம் ரன்களை எட்டி அவரது சாதனையை முறியடித்து அசத்தியுள்ளார்.
Also Read: Funding To Save Test Cricket
இந்த பட்டியலில் தென் ஆப்பிரிக்க அணியின் முன்னாள் வீரர் ஹசிம் அம்லா தனது 150 இன்னிங்சில் 7 ஆயிரம் ரன்களை கடந்து முதலிடத்தில் உள்ளார். மேற்கொண்டு இந்த பட்டியல் தென் ஆப்பிரிக்க அணியின் முன்னாள் வீரர் ஏபி டி வில்லியர்ஸ் 166 இன்னிங்ஸில் 7ஆயிரம் ரன்களை கடந்து நான்காம் இடத்திலும், இந்திய அணியின் முன்னாள் கேப்டன் சௌரவ் கங்குலி 174 இன்னிங்ஸில் இந்த மைல் கல்லை எட்டி 5ஆம் இடத்திலும் உள்ளது குறிப்பிடத்தக்கது.
Win Big, Make Your Cricket Tales Now
