ஐசிசி டி20 தரவரிசை: ஐந்தாம் இடத்திற்கு ராகுல் முன்னேற்றம்!

சர்வதேச டி20 கிரிக்கெட் பேட்டிங் தரவரிசையில் இந்திய வீரர் கேஎல் ராகுல் 5ஆவது இடத்துக்கு முன்னேறியுள்ளார்.

இந்தியா - நியூசிலாந்து, பாகிஸ்தான் - வங்கதேசம் ஆகிய அணிகளுக்கு இடையேயான டி20 தொடர் சமீபத்தில் நடைபெற்று முடிவடைந்தது. இந்நிலையில் சர்வதேச கிரிக்கெட் கவுன்சில் வீரர்களுக்கான டி20 தரவரிசைப் பட்டியலை வெளியிட்டுள்ளது. 

இதில் வங்கதேசத்துக்கு எதிரான 3 போட்டிகள் கொண்ட டி20 தொடரில் சிறப்பான ஆட்டங்களை வெளிப்படுத்திய பாகிஸ்தான் வீரர் முகமது ரிஸ்வான் 4ஆவது இடத்தில் உள்ளார். 

அதேசமயம் நியூசிலாந்துக்கு எதிரான டி20 தொடரில் 2 போட்டிகளில் விளையாடி 80 ரன்கள் எடுத்த ராகுல் 5ஆவது இடத்துக்கு முன்னேற்றம் கண்டுள்ளார்.

நியூசிலாந்து வீரர் மார்டின் கப்தில் 3 இடங்கள் முன்னேற்றம் கண்டு 10ஆவது இடத்தையும், நியூசிலாந்து டி20 தொடரில் தொடர் நாயகன் வென்ற ரோஹித் சர்மா 2 இடங்களில் முன்னேறி 13ஆவது இடத்தையும் பிடித்துள்ளனர்.

பந்துவீச்சாளர்களில் நியூசிலாந்தின் மிட்செல் சான்ட்னர் 10 இடங்கள் முன்னேறி 13ஆவது இடத்தையும், இந்திய வீரர் புவனேஷ்வர் குமார் 5 இடங்கள் முன்னேறி 19ஆவது இடத்தையும் பிடித்துள்ளனர். தீபக் சஹார் 19 இடங்கள் முன்னேறி 40ஆவது இடத்திற்கு முன்னேறியுள்ளார்.