LPL 2024: ஹாட்ரிக் விக்கெட்டுகளை கைப்பற்றிய ஷதாப் கான்; கொழும்பு ஸ்டிரைக்கர்ஸ் அணி அபார வெற்றி!
Lanka Premier League 2024: கண்டி ஃபால்கன்ஸ் அணிக்கு எதிரான லீக் போட்டியில் கொழும்பு ஸ்டிரைக்கர்ஸ் அணி 51 ரன்கள் வித்தியாசத்தில் அபார வெற்றியைப் பதிவுசெய்து அசத்தியது.
லங்கா பிரீமியர் லீக் தொடரின் 5ஆவது சீசன் விறுவிறுப்பாக நடைபெற்று வருகிறது. இத்தொடரில் இன்று நடைபெற்ற மூன்றாவது லீக் ஆட்டத்தில் கொழும்பு ஸ்டிரைக்கர்ஸ் மற்றும் கண்டி ஃபால்கன்ஸ் அணிகள் பலப்பரீட்சை நடத்தின. பல்லகலேவில் நடைபெற்ற இப்போட்டியில் டாஸ் வென்ற கண்டி ஃபால்கன்ஸ் அணி முதலில் பந்துவீசுவதாக அறிவித்தது. அதன்படி களமிறங்கிய கொழும்பு ஸ்டிரைக்கர்ஸ் அணிக்கு ரஹ்மனுல்லா குர்பாஸ் மற்றும் ஷெவான் டேனியல் தொடக்கம் கொடுத்தனர்.
இதில் ஷெவன் டேனியல் 3 ரன்களில் விக்கெட்டை இழக்க, அவரைத்தொடர்ந்து ரஹ்மனுல்லா குர்பாஸ் 17 ரன்களில் ஆட்டமிழந்தார். அதன்பின் இணைந்த முகமது வசீம் மற்றும் சமரவிக்ரமா இணை அதிரடியான ஆட்டத்தை வெளிப்படுத்தியதுடன் அணியின் ஸ்கோரையும் மளமளவென உயர்ந்தது. இவர்களது அதிரடியான ஆட்டத்தின் காரணமாக கொழும்பு ஸ்டிரைக்கர்ஸ் அணியானது முதல் 6 ஓவர்களிலேயே 78 ரன்களைக் குவித்தது.
Trending
இதில் அரைசதம் அடிப்பார்கள் என எதிர்பார்க்கப்பட்ட முகமது வசீம் 32 ரன்களிலும், சமரவிக்ரமா 48 ரன்களிலும் என விக்கெட்டை இழந்தனர். அதன்பின் களமிறங்கிய கிளென் பிலீப்ஸும் ரன்கள் ஏதுமின்றி விக்கெட்டை இழந்தார். ஆனாலும் அதன்பின் களமிறங்கிய கேப்டன் திசாரா பெரேரா 38 ரன்களையும், ஷதாப் கான் 20 ரன்களையும், கருணரத்னே 25 ரன்களையும் சேர்க்க, 20 ஓவர்கள் முடிவில் கொழும்பு அணி 7 விக்கெட் இழப்பிற்கு 198 ரன்களைக் குவித்தது.
இதனையடுத்து கடின இலக்கை நோக்கி விளையாடிய கண்டி ஃபால்கன்ஸ் அணிக்கு தினேஷ் சண்டிமல் - ஆண்ட்ரே ஃபிளெட்சர் இணை அதிரடியான தொடக்கத்தைக் கொடுத்தனர். இதில் ஆண்ட்ரே ஃபிளெட்சர் 24 ரன்களுக்கு விக்கெட்டை இழக்க, அடுத்து களமிறங்கிய முகமது ஹாரிஸ் 4 ரன்களில் ஆட்டமிழந்தார். அதேசமயம் மறுமுனையில் அரைசதத்தை நெருங்கிய தினேஷ் சண்டிமாலும் 38 ரன்கள் எடுத்திருந்த நிலையில் விக்கெட்டை இழந்தார்.
அதன்பின் களமிறங்கிய கேப்டன் வநிந்து ஹசரங்கா மற்றும் ஏஞ்சலோ மேத்யூஸ் இணை ஓரளவு தாக்குப்பிடித்து ஸ்கோரை உயர்த்தினர். ஆனால் இன்னிங்ஸின் 15ஆவது ஓவரை வீசிய ஷதாப் கான், அந்த ஓவரில் வநிந்து ஹசரங்கா, அகா சல்மான் மற்றும் பவன் ரத்னாயகே ஆகியோரது விக்கெட்டுகளை அடுத்தடுத்து வீழ்த்தி ஹாட்ரிக் விக்கெட்டுகளைக் கைப்பற்றி அசத்தினார். இதனால் கண்டி அணி 146 ரன்களிலேயே 8 விக்கெட்ட்களை இழந்து தடுமாறியது.
Also Read: Akram ‘hopes’ Indian Team Will Travel To Pakistan For 2025 Champions Trophy
இதனையடுத்து அணியின் நம்பிக்கையாக இருந்த தசுன் ஷனகா 5 ரன்களுக்கும், கசுன் ரஜிதா ஆகியோரும் சொற்ப ரன்களுக்கு விக்கெட்டை இழக்க, கண்டி ஃபால்கன்ஸ் அணி 15.5 ஓவர்களில் அனைத்து விக்கெட்டுகளையும் இழந்து 147 ரன்களுக்கு ஆல் அவுட்டானது. கொழும்பு அணி தரப்பில் அபாரமாக பந்துவீசிய ஷதாப் கான் மற்றும் துனித் வெல்லலாகே ஆகியோர் தலா 4 விக்கெட்டுகளை கைப்பற்றி அசத்தினார். இதன்மூலம் கொழும்பு ஸ்டிரைக்கர்ஸ் அணி 51 ரன்கள் வித்தியாசத்தில் கண்டி ஃபால்கன்ஸ் அணியை வீழ்த்தி அபார வெற்றியைப் பதிவுசெய்து அசத்தியது.
Win Big, Make Your Cricket Tales Now
