அறுவை சிகிச்சை மேற்கொள்ளும் பென் ஸ்டோக்ஸ்!
இங்கிலாந்து அணியின் நட்சத்திர வீரரான பென் ஸ்டோக்ஸ், இந்த உலகக் கோப்பைக்குப் பிறகு தனது முழங்காலில் அறுவை சிகிச்சை மேற்கொள்ளவுள்ளதாகத் தெரிவித்துள்ளார்.
இந்தியாவில் நடைபெற்றுவரும் ஐசிசி ஒருநாள் உலகக்கோப்பை கிரிக்கெட் தொடர் விறுவிறுப்பான கட்டத்தை எட்டியுள்ளது. இத்தொடரில் பலராலும் கோப்பையை வெல்லும் அணிகளில் ஒன்றாக கணிக்கப்பட்ட இங்கிலாந்து அணி, நடப்பு உலகக்கோப்பை கிரிக்கெட் தொடரில் அடுத்தடுத்து படுதோல்விகளை சந்தித்து முதல் அணியாக அரையிறுதி வாய்ப்பை இழந்தது.
இதற்கு முக்கிய காரணமாக நட்சத்திர வீர்ர்கள் யாரும் சரிவர செயல்படாமல் இருந்ததே என்று கூறப்படுகிறது. அதிலும் குறிப்பாக தனது ஓய்வு முடிவிலிருந்து அணிக்கு திரும்பிய பென் ஸ்டோக்ஸின் பங்களிப்பு இங்கிலாந்து அணியை படுத்தோல்விக்கு அழைத்துச்சென்றுள்ளது. ஏனெனில் காயம் காரணமாக முதல் ஒரு சில போட்டிகளில் விளையாடாமல் இருந்த பென் ஸ்டோக்ஸ், இதுவரை இத்தொடரில் 3 போட்டிகளில் விளையாடி வெறும் 48 ரன்களை மட்டுமே எடுத்துள்ளார்.
Trending
இதனால் நாளை ஆஸ்திரேலிய அணிக்கெதிரான போட்டியில் பென் ஸ்டோக்ஸ் இடம்பெற வாய்ப்பில்லை என தகவல்கள் வெளியாகியுள்ளன. இந்நிலையில் நடப்பு உலகக்கோப்பை கிரிக்கெட் தொடர் முடிந்தவுடன் பென் ஸ்டோக்ஸ் முழங்கால் அறுவைசிகிச்சை மேற்கொள்ளவுள்ளதாக தகவல் வெளியாகியுள்ளன.
கடந்த 18 மாதங்களாக பென் ஸ்டோக்ஸ் முழங்கால் வலியுடன் போராடி வருகிறார். இந்த உலகக் கோப்பையில் அவர் பங்கேற்றாலும் ஆல்ரவுண்டரான ஸ்டோக்ஸ் இதுவரை பந்துவீசவில்லை. கடைசியாக ஆஷஸ் தொடரின் 2ஆவது டெஸ்டில் அவர் பந்துவீசினார். அதன்பிறகு முழங்கால் காயம் காரணமாக பேட்டிங்கில் மட்டும் கவனம் செலுத்தி வருகிறார்.
இந்நிலையில், உலகக் கோப்பைக்குப் பிறகு அறுவை சிகிச்சை மேற்கொள்ளவிருப்பதாக ஸ்டோக்ஸ் தெரிவித்துள்ளார். இருப்பினும் அடுத்த ஆண்டு ஜனவரியில் தொடங்க இருக்கும் இந்தியா - இங்கிலாந்து இடையேயான டெஸ்ட் தொடரில் பங்கேற்பேன் என அவர் நம்பிக்கை தெரிவித்துள்ளார். அறுவை சிகிச்சைக்குப் பிறகு ஸ்டோக்ஸ் 5 - 7 வாரங்கள் ஓய்வில் இருப்பார் என்பதால், வரும் டிசம்பரில் இங்கிலாந்து அணியின் வெஸ்ட் இண்டீஸ் சுற்றுப்பயணத்தில் அவர் பங்கேற்க மாட்டார்.
அதேசமயம் 2024 தொடக்கத்தில் 5 ஆட்டங்களைக் கொண்ட டெஸ்ட் தொடரில் பங்கேற்க இங்கிலாந்து அணி இந்தியா வருகிறது. இவ்விரு அணிகளுக்கு இடையேயான டெஸ்ட் தொடர் ஜனவரி 25இல் ஹைதராபாதில் தொடங்குகிறது. இத்தொடரில் அவர் மீண்டும் அணிக்கு திரும்புவார் என எதிர்பார்க்கப்படுகிறது.
Win Big, Make Your Cricket Tales Now
Cricket Scorecard
