எம்எல்சி 2025: எம்ஐ நியூயார்க் அணிக்கு எதிரான போட்டியில் தோல்வியைத் தழுவியதன் மூலம் லாஸ் ஏஞ்சல்ஸ் நைட் ரைடர்ஸ் அணியானது நடப்பு மேஜர் லீக் கிரிக்கெட் தொடரில் இருந்து வெளியேறியுள்ளது.
மேஜர் லீக் கிரிக்கெட் தொடரின் நடப்பு சீசன் இறுதிக்கட்டத்தை எட்டியுள்ள நிலையில், இன்று நடைபெற்ற 27ஆவது லீக் போட்டியில் எம்ஐ நியூயார்க் மற்றும் லாஸ் ஏஞ்சல்ஸ் நைட் ரைடர்ஸ் அணிகள் பலப்பரீட்சை நடத்தின. ஃபுளோரிடாவில் நடைபெற்ற இப்போட்டியில் டாஸ் வென்ற நைட் ரைடர்ஸ் அணி முதலில் பந்துவீசுவதாக அறிவித்தது. இதையடுத்து முதலில் பேட்டிங் செய்ய களமிறங்கிய நியூயார்க் அணியில் குயின்டன் டி காக் ரன்கள் ஏதுமின்றியும், மொனாங்க் படேல் 13 ரன்னிலும் என ஆட்டமிழக்க, அடுத்து களமிறங்கிய தஜிந்தர் தில்லானும் 2 ரன்களில் நடையைக் கட்டினார்.
அவர்களைத் தொடர்ந்து கேப்டன் நிக்கோலஸ் பூரன் 30 ரன்களுக்கும், மைக்கேல் பிரேஸ்வெல் 18 ரன்களுக்கும், ஜார்ஜ் லிண்டே 13 ரன்களுக்கும் என ஆட்டமிழக்க, சிறப்பான ஆட்டத்தை வெளிப்படுத்திய கீரன் பொல்லார்ட் ஒரு பவுண்டரி, 4 சிக்ஸர்களுடன் அரைசதம் கடந்த கையோடு 50 ரன்களில் விக்கெட்டை இழந்தார். இதன் காரணமாக எம்ஐ நியூயார்க் அணியானது 20 ஓவர்கள் முடிவில் 9 விக்கெட்டுகளை இழந்து 149 ரன்களை மட்டுமே எடுத்தது. நைட் ரைடர்ஸ் தரப்பில் வான் சால்விக் 3 விக்கெட்டுகளையும், ஜேசன் ஹோல்டர், கோர்ன் ட்ரை ஆகியோர் தலா 2 விக்கெட்டுகளை கைப்பற்றினர்.
