மீண்டும் காயமடைந்த முகமது ஷமி; இந்திய அணிக்கு திரும்புவதில் சிக்கல்!

காயம் காரணமாக சர்வதேச கிரிக்கெட்டிற்கு திரும்ப முடியாமல் தவித்து வரும் இந்திய அணியின் அனுபவ வேகப்பந்து வீச்சாளர் முகமது ஷமி மீண்டும் காயமடைந்திருப்பதாக தகவல் வெளியாகியுள்ளது.

மீண்டும் காயமடைந்த முகமது ஷமி; இந்திய அணிக்கு திரும்புவதில் சிக்கல்! (Image Source: Google)

இந்திய அணியின் வேகப்பந்து வீச்சாளர் முகமது ஷமி நீண்ட நாள்களாக காயம் காரணமாக அவதிப்பட்டு வரும் நிலையில், தற்போது அவர் தொடர்பான மற்றொரு மோசமான செய்தி ஒன்று வெளியாகியுள்ளது. அதன்படி முகமது ஷமி மீண்டும் காயமடைந்துள்ளதாக தகவல்கள் வெளியாகியுள்ளது. இதன் காரணமாகவே அவர் ஆஸ்திரேலிய அணிக்கு எதிரான பார்டர் கவாஸ்கர் கோப்பை தொடரில் அவர் தேர்வு செய்யப்படவில்லை என்று கூறப்படுகிறது. 

இதுகுறித்து வெளியாகியுள்ள தகவலின் படி முழங்கால் காயத்தால் சிரமப்பட்ட முகமது ஷமி, இப்போது பக்க காயத்தால் பாதிக்கப்பட்டுள்ளார். இதனால் கர்நாடகா மற்றும் மத்திய பிரதேசம் அணிகளுக்கு எதிரான ரஞ்சி கோப்பை போட்டிக்கான பெங்கால் அணியில் அவர் சேர்க்கப்படவில்லை என்பது குறிப்பிடத்தக்கது. முன்னதாக தனது உடற்தகுதியை மீட்டெடுக்க முகமது ஷமி தொடர்ந்து முயற்சித்து வருகிறார்.

சமீபத்தில் அவர் பந்துவீச்சு பயிற்சி செய்யும் காணொளியை தனது இன்ஸ்டாகிராம் பக்கத்தில் பகிர்ந்தார். மேலும் அந்த காணொளியில் ஷமி தனது முழங்காலில் கட்டுடன் பந்து வீசுவதைக் காண முடிந்தது. இந்த காணொளி வெளியான பிறகு, ஷமி விரைவில் களம் திரும்புவார் என்று ரசிகர்கள் நினைத்தனர். அதிலும் வங்கதேச டெஸ்ட் தொடர் அல்லது நியூசிலாந்து டெஸ்ட் தொடரில் பங்கேற்பார் என்று பெரிதும் எதிர்பார்க்கப்பட்டது. ஆனால் அது நடக்கவில்லை.

தற்சமயம் 34 வயதான முகமது ஷமி கடந்த ஆண்டு இந்தியாவில் நடந்த ஐசிசி ஒருநாள் உலகக் கோப்பை தொடரின் போது தனது கடைசி சர்வதேச போட்டியில் விளையாடினார். அத்தொடரின் போதே அவர் வலி நிவாரணியுடன் தான் விளையாடினார். அதன்பின் தனது காயம் காரணமாக சிகிச்சை பெற்று வந்த அவர், அதன்பின் அறுவை சிகிச்சையும் மேற்கொண்டிருந்தார். இருப்பினும் அவரால் இதுநாள்வரை சர்வதேச கிரிக்கெட்டிற்கு திரும்பமுடியவில்லை. 

இதனால் இந்திய அணி பெரும் பின்னடைவுகளைச் சந்தித்து வருகிறது. குறிப்பாக இலங்கை ஒருநாள் தொடர் தோல்வி, நியூசிலாந்து டெஸ்ட் தொடர் தோல்விகளை சந்தித்துள்ளது குறிப்பிடத்தக்கது. இந்திய அணிக்காக இதுவரை 64 டெஸ்ட், 101 ஒருநாள் மற்றும் 23 டி20 போட்டிகளில் விளையாடியுள்ள முகமது ஷமி, 400-க்கும் மேற்பட்ட விக்கெட்டுகளை வீழ்த்தியுள்ளார் என்பது குறிப்பிடத்தக்கது. 

பார்டர்-கவாஸ்கர் கோப்பை தொடருக்கான இந்திய அணி: ரோஹித் சர்மா (கேப்டன்), ஜஸ்பிரித் பும்ரா, யஷஸ்வி ஜெய்ஸ்வால், அபிமன்யு ஈஸ்வரன், ஷுப்மன் கில், விராட் கோலி, கேஎல் ராகுல், ரிஷப் பந்த், சர்ஃபராஸ் கான், துருவ் ஜூரல், ரவிச்சந்திரன் அஸ்வின், ரவீந்திர ஜடேஜா, முகமது சிராஜ், ஆகாஷ் தீப், பிரசித் கிருஷ்ணா, ஹர்ஷித் ராணா, நிதிஷ் குமார் ரெட்டி, வாஷிங்டன் சுந்தர்.

Win Big, Make Your Cricket Tales Now