NZ vs SA: தென் ஆப்பிரிக்க டெஸ்ட் அணி அறிவிப்பு; அறிமுக வீரருக்கு கேப்டன் பொறுப்பு!

நியூசிலாந்துக்கு எதிரான டெஸ்ட் தொடரில் விளையாடும் தென் ஆப்பிரிக்க அணி அறிவிக்கப்பட்டுள்ள நிலையில், அறிமுக வீரர் நீல் பிராண்ட் கேப்டனாக நியமிக்கப்பட்டுள்ளார்.

NZ vs SA: தென் ஆப்பிரிக்க டெஸ்ட் அணி அறிவிப்பு; அறிமுக வீரருக்கு கேப்டன் பொறுப்பு! (Image Source: Google)

தென் ஆப்பிரிக்க அணி தற்போது இந்திய அணிக்கெதிராக இரண்டு போட்டிகள் கொண்ட டெஸ்ட் தொடரில் விளையாடி வருகிறது. இதில் செஞ்சூசியனில் நடைபெற்ற முதல் டெஸ்ட் போட்டியில் தென் ஆப்பிரிக்க அணி இன்னிங்ஸ் மற்றும் 32 ரன்கள் வித்தியாசத்தில் வெற்றிபெற்று அசத்தியது. இந்நிலையில் இவ்விரு அணிகளுக்கும் இடையேயான இரண்டாவது டெஸ்ட் போட்டி கேப்டவுனில் ஜனவரி 03ஆம் தேதி நடைபெறவுள்ளது. இப்போட்டிக்காக இரு அணிகளும் தயாராகி வருகின்றனர். 

இதையடுத்து தென் ஆப்பிரிக்க அணி நியூசிலாந்தில் சுற்றுப்பயணம் செய்து 2 போட்டிகள் கொண்ட டெஸ்ட் தொடரில் விளையாடவுள்ளது. இவ்விரு அணிகளுக்கும் இடையேயான இத்தொடரானது அடுத்த ஆண்டு பிப்ரவரி 04ஆம் தேதி முதல் நடைபெறவுள்ளது. இந்நிலையில் இத்தொடருக்கான தென் ஆப்பிரிக்க டெஸ்ட் அணி இன்று அறிவிக்கப்பட்டுள்ளது. 

அதன்படி அணியின் முன்னணி வீரர்கள் அனைவரும் தென் ஆப்பிரிக்காவின் உள்ளூர் டி20 தொடரான எஸ்ஏ20 லீக் தொடரில் விளையாடவுள்ளதால், நியூசிலாந்து தொடருக்கு இளம் வீரர்களைக் கொண்ட அணி அறிவிக்கப்பட்டுள்ளது. அதிலும் குறிப்பாக தனது அறிமுக டெஸ்ட் போட்டியில் விளையாடவுள்ள நீல் பிராண்ட் இந்த அணியின் கேப்டனாக அறிவிக்கப்பட்டுள்ளது தற்போது ஆச்சரியத்தை ஏற்படுத்தியுள்ளது. மேலும் தனது அறிமுக டெஸ்ட் போட்டியிலேயே அணியை வழிநடத்தும் இரண்டாவது கிரிக்கெட் வீரர் எனும் பெருமையையும் நீல பிராண்ட் பெறவுள்ளார். 

இதற்கு முன் தென் ஆப்பிரிக்க ஏ அணியை வழிநடத்திய நீல் பிராண்ட், வெஸ்ட் இண்டீஸுக்கு எதிராக 2-1 என்ற கணக்கில் தொடரை கைப்பற்றினார். மேலும் இந்த தென் ஆப்பிரிக்க அணியில் ரெய்னார்ட் வான் டோண்டர், ருவான் டி ஸ்வார்ட், மிஹ்லாலி மபோங்வானா, டிஷெபோ மோரேகி, ஷான் வான் பெர்க் மற்றும் விக்கெட் கீப்பர் கிளைட் ஃபோர்டுயின் போன்ற அறிமுக வீரர்களும் இடம்பிடித்துள்ளனர். இதுதவிர தற்போது இந்திய தொடரில் விளையாடி வரும் டேவிட் பெட்டிங்ஹாம்,  கீகன் பீட்டர்சன் ஆகியோருக்கும் இந்த அணியில் இடம் கிடைத்துள்ளது. 

தென் ஆப்பிரிக்க அணி: நீல் பிராண்ட் (கேப்டன்), டேவிட் பெடிங்ஹாம், ருவான் டி ஸ்வார்ட், கிளைட் ஃபோர்டுயின், ஜுபைர் ஹம்சா, டிஷெபோ மோரேகி, மிஹ்லாலி மபோங்வானா, டுவான் ஒலிவியர், டேன் பேட்டர்சன், கீகன் பீட்டர்சன், டேன் பீட், ரெய்னார்ட் வான் டோண்டர், ஷான் வான் பெர்க், கயா சோண்டோ.

Win Big, Make Your Cricket Tales Now