Zimbabwe T20I Series: மேஜர் லீக் கிரிக்கெட் தொடரின் இறுதிப்போட்டியில் ஏற்பட்ட காயம் காரணமாக நியூசிலாந்து அணியின் நட்சத்திர ஆல் ரவுண்டர் கிளென் பிலீப்ஸ் ஜிம்பாப்வேவில் நடைபெற்று வரும் முத்தரப்பு டி20 தொடரில் இருந்து விலகியுள்ளார்.
ஜிம்பாப்வே கிரிக்கெட் அணி தென் ஆப்பிரிக்கா மற்றும் நியூசிலாந்து அணிகளுடன் இணைந்து முத்தரப்பு டி20 தொடரில் விளையாடி வருகிறது. இதில் தற்போது வரையிலும் மூன்று லீக் போட்டிகள் முடிவடைந்துள்ள நிலையில் மிட்செல் சான்ட்னர் தலைமையிலான நியூசிலாந்து அணி முதல் போட்டியில் தென் ஆப்பிரிக்க அணியையும், இன்று நடைபெற்ற போட்டியில் ஜிம்பாப்வே அணியையும் வீழ்த்தி புள்ளிப்பட்டியலிலும் முதலிடத்தைப் பிடித்துள்ளது.
இந்நிலையில் இத்தொடருக்கான நியூசிலாந்து அணியில் இடம்பிடித்திருந்த நட்சத்திர ஆல் ரவுண்டர் கிளென் பிலீப்ஸ் காயம் காரணமாக விலகியுள்ளார். சமீபத்தில் நடைபெற்று முடிந்த மேஜர் லீக் கிரிக்கெட் தொடரில் வாஷிங்டன் ஃப்ரீடம் அணிக்காக கிளென் பிலீப்ஸ் விளையாடி வந்த நிலையில், எம்ஐ நியூயார்க் அணிக்கு எதிரான போட்டியின் போது காயத்தைச் சந்தித்தார். மேலும் அவரது காயம் குணமடைந்த சில காலம் தேவைப்படும் என்பதால் இத்தொடரில் இருந்து அவர் விலகியதாக அறிவிக்கப்பட்டுள்ளது.
