ZIM vs NZ, 2nd Test: ஹென்றி, ஃபால்க்ஸ் பந்துவீச்சில் ஜிம்பாப்வேவை பந்தாடியது நியூசிலாந்து!
ஜிம்பாப்வே அணிக்கு எதிரான இரண்டாவது போட்டியிலும் நியூசிலாந்து வெற்றி பெற்றதுடன் 2-0 என்ற கணக்கில் தொடரை கைப்பற்றி அசத்தியுள்ளது.
அதன்படி களமிறங்கிய ஜிம்பாப்வே அணியிம் பிராண்டன் டெய்லர் 44 ரன்களையும், தஃபத்ஸ்வா 33 ரன்களையும் எடுத்ததை தவிர்த்து மற்ற வீரர்கள் சோபிக்க தவறினர். இதனால் ஜிம்பாப்வே அணி முதல் இன்னிங்ஸில் 125 ரன்களிலேயே அனைத்து விக்கெட்டுகளையும் இழந்தது. நியூசிலாந்து அணி தரப்பில் அபாரமான பந்துவீச்சை வெளிப்படுத்திய மேட் ஹென்றி 5 விக்கெட்டுகளையும், ஸகாரி ஃபால்க்ஸ் 4 விக்கெட்டுகளையும், மேத்யூ ஃபிஷர் ஒரு விக்கெட்டையும் கைப்பற்றினார்.அதன்பின் முதல் இன்னிங்ஸைத் தொடங்கிய நியூசிலாந்து அணிக்கு வில் யங் - டெவான் கான்வே இணை தொடக்கம் தந்தனர்.
இதில் இருவரும் அரைசதம் கடந்ததுடன், 162 ரன்கள் பார்ட்னர்ஷிப்பும் அமைத்தனர். பின் வில் யங் 11 பவுண்டரிகளுடன் 74 ரன்களைச் சேர்த்த கையோடு தனது விக்கெட்டை இழந்தார். பின்னர் ஜேக்கப் டஃபி 36 ரன்களிலும், டெவான் கான்வேவும் 18 பவுண்டரிகளுடன் 153 ரன்களைச் சேர்த்து ஆட்டமிழந்தார். பின்னர் ஜோடி சேர்ந்த ரச்சின் ரவீந்திரா - ஹென்றி நிக்கோலஸ் இணையும் அதிரடியாக விளையாடி அணியின் ஸ்கோரை உயர்த்தினர். தொடர்ந்து அபாரமாக விளையாடிய இருவரும் தங்களின் சதங்களைப் பதிவுசெய்ததுடன், 4ஆவது விக்கெட்டிற்கு 200 ரன்களுக்கு மேல் பார்ட்னர்ஷிப்பும் அமைத்தனர்.
இதனால் இரண்டாம் நாள் ஆட்டநேர முடிவில் நியூசிலாந்து அணி 3 விக்கெட்டுகளை மட்டுமே இழந்து 601 ரன்களைக் குவித்தது. இதில் ஹென்றி நிக்கோலஸ் 150 ரன்களுடனும், ரச்சின் ரவீந்திரா 165 ரன்களுடனும் களத்தில் இருந்த நிலையில் நியூசிலாந்து அணி டிக்ளர் செய்வதாக அறிவித்தது. இதனையடுத்து 476 ரன்கள் பின் தங்கிய நிலையில் இரண்டாவது இன்னிங்ஸை தொடங்கியா ஜிம்பாப்வே அணியில் பிரையன் பென்னெட் ரன்கள் ஏதுமின்றியும், பிராண்டன் டெய்லர் 7 ரன்னிலும், சீன் வில்லியம்ஸ் 9 ரன்னிலும், கிரேய்க் எர்வின் 17 ரன்னிலும், சிக்கந்தர் ரஸா 4 ரன்னிலும் என விக்கெட்டுகளை இழந்தனர்.
Also Read: LIVE Cricket Score
மேற்கொண்டு களமிறங்கிய வீரர்களும் சோபிக்க தவறிய நிலையில், இறுதிவரை களத்தில் இருந்த நிக் வெல்ச் 44 ரன்களைச் சேர்த்திருந்தார். இதனால் ஜிம்பாப்வே அணி இரண்டாவது இன்னிங்ஸில் அனைத்து விக்கெட்டுகளையும் இழந்து 117 ரன்களுக்கு ஆல் அவுட்டானது. நியூசிலாந்து தரப்பில் ஸக்காரி ஃபால்க்ஸ் 5 விக்கெட்டுகளை வீழ்த்தினார். இதன்மூலம் நியூசிலாந்து அணி இன்னிங்ஸ் மற்றும் 359 ரன்கள் வித்தியாசத்தில் ஜிம்பாப்வேவை வீழ்த்தி வெற்றிபெற்றதுடன் 2-0 என்ற கணக்கில் தொடரையும் வென்றது, மேலும் டெவான் கான்வே ஆட்டநாயகனாகவும், மேட் ஹென்றி தொடர் நாயகனாகவும் தேர்வு செய்யப்பட்டுள்ளனர்.
Win Big, Make Your Cricket Tales Now
