ரஞ்சி கோப்பை 2023: மும்பைக்கு எதிரான ஆட்டத்தை டிரா செய்தது தமிழ்நாடு!
மும்பைக்கு எதிரான ரஞ்சி கோப்பை கிரிக்கெட் போட்டியில் முதல் இன்னிங்ஸில் 337 ரன்கள் பின் தங்கிய போதிலும், தமிழ்நாடு அணி 2ஆவது இன்னிங்ஸில் சிறப்பாக பேட்டிங் ஆடி போட்டியை டிரா செய்தது.
அதன்படி முதலில் பேட்டிங் செய்த தமிழ்நாடு அணியில் சாய் சுதர்சன், சாய் கிஷோர் ஆகியோர் ரன்கள் ஏதுமின்றியும், ஜெகதீசன் 23, அபரஜித் 8, இந்திரஜித் 9 ஆகியோர் சொதப்ப, மிடில் ஆர்டரில் பிரதோஷ் பால் மட்டுமே அரைசதம் அடித்தார். பிரதோஷ் பால் அதிகபட்சமாக 55 ரன்கள் அடித்தார். மற்ற அனைத்து வீரர்களும் சொற்ப ரன்களுக்கு ஆட்டமிழந்ததால் வெறும் 144 ரன்களுக்கு தமிழ்நாடு அணி ஆல் அவுட்டானது.
Trending
இதையடுத்து முதல் இன்னிங்ஸை விளையாடிய மும்பை அணி வீரர் சர்ஃபராஸ் கான் அபாரமாக விளையாடி சதமடித்தார். மிகச்சிறப்பாக விளையாடி பெரிய இன்னிங்ஸ் ஆடிய சர்ஃபராஸ் கான் 162 ரன்கள் அடித்தார். பின்வரிசையில் தனுஷ் கோட்டியான் 71 ரன்களும், மோஹித் அவஸ்தி 69 ரன்களும் அடிக்க, முதல் இன்னிங்ஸில் மும்பை அணி 481 ரன்களை குவித்தது.
அதன்பின் 337 ரன்கள் பின் தங்கிய நிலையில் 2ஆவது இன்னிங்ஸை தொடங்கிய தமிழ்நாடு அணி இன்னிங்ஸ் தோல்வியடைவதற்கான அபாயம் இருந்தது. ஒருவேளை இன்னிங்ஸ் தோல்வியடையவில்லை என்றாலும், 337 ரன்கள் பின் தங்கியிருந்ததால் தோல்விக்கான வாய்ப்பு அதிகமாக இருந்தது. ஆனால் 2ஆவது இன்னிங்ஸை தமிழ்நாடு வீரர்கள் சிறப்பான ஆட்டத்தை வெளிப்படுத்தினர்.
இதில் தொடக்க வீரர் சாய் சுதர்சன் 68 ரன்கள் அடித்தார். மிடில் ஆர்டரில் இந்திரஜித், பிரதோஷ் பால், விஜய் சங்கர் ஆகிய மூவரும் அபாரமாக விளையாடி சதமடித்தார்கள். இந்திரஜித் மற்றும் விஜய் சங்கர் இருவரும் தலா 103 ரன்கள் அடித்தனர். பிரதோஷ் பால் 169 ரன்களை குவிக்க, 2ஆவது இன்னிங்ஸில் 548 ரன்களை குவித்தது தமிழ்நாடு அணி.
இதனால் தமிழ்நாடு அணி 211 ரன்கள் முன்னிலை பெற, 212 ரன்கள் என்ற இலக்கை விரட்டிய மும்பை அணிக்கு கடைசி நாள் ஆட்டத்தில் 24 ஓவர்கள் மட்டுமே பேட்டிங் ஆடமுடிந்ததால் அந்த அணி 3 விக்கெட் இழப்பிற்கு 137 ரன்கள் அடிக்க, இந்த போட்டி டிராவில் முடிந்தது.
Win Big, Make Your Cricket Tales Now
