ஆர்ச்சருக்கு பதில் அட்கிசனுக்கு வாய்ப்பு தர வேண்டும் - ஸ்டூவர்ட் பிராட்!
ஓவல் டெஸ்ட் போட்டியில் பணிச்சுமை காரணமாக ஜோஃப்ரா ஆர்ச்சருக்கு ஓய்வளிக்க வேண்டும் என முன்னாள் வீரர் ஸ்டூவர்ட் பிராட் தெரிவித்துள்ளார்.
இங்கிலாந்து - இந்தியா அணிகளுக்கு இடையேயான ஆண்டர்சன் - டெண்டுல்கர் கோப்பை டெஸ்ட் தொடரானது விறுவிறுப்பான கட்டத்தை எட்டியுள்ளது. இந்த தொடரில் இதுவரை 4 போட்டிகளில் நடந்து முடிந்துள்ள நிலையில், இங்கிலாந்து அணி இரண்டிலும், இந்திய அணி ஒன்றிலும், ஒரு போட்டி டிராவிலும் முடிவடைந்துள்ளது. இதன் காரணமாக 5 போட்டிகள் கொண்ட இந்த டெஸ்ட் தொடரில் இங்கிலாந்து அணி 2-1 என்ற கணக்கில் முன்னிலை வகிக்கிறது.
இதையடுத்து இரு அணிகளுக்கும் இடையேயான தொடரின் வெற்றியாளரைத் தீர்மானிக்கும் ஐந்தாவது மற்றும் கடைசி டெஸ்ட் போட்டி ஜூலை 31ஆம் தேதி லண்டனில் உள்ள கெனிங்டன் ஓவல் கிரிக்கெட் மைதானத்தில் நடைபெறவுள்ளது. இதில் இந்திய அணி வெற்றிபெற்றால் தொடரை சமன்செய்யும்.இங்கிலாந்து அணி இப்போட்டியில் வெற்றி அல்லது டிரா செய்தால் தொடரைக் கைப்பற்றும் என்பதால் இப்போட்டியின் மீதான எதிர்பார்ப்புகளும் அதிகரித்துள்ளன.
இப்போட்டிக்கான இங்கிலாந்து டெஸ்ட் அணி அறிவிக்கப்பட்டுள்ளது. பென் ஸ்டோக்ஸ் தலைமையிலான இந்த அணியில் ஆல் ரவுண்டர் ஜேமி ஓவர்டனுக்கு வாய்ப்பு வழங்கப்பட்டுள்ளது. இதன்மூலம் 2022ஆம் ஆண்டிற்கு பிறகு அவர் மீண்டும் இங்கிலாந்து டெஸ்ட் அணியில் சேர்க்கப்பட்டுள்ளார். மேற்கொண்டு முந்தைய டெஸ்ட் போட்டிகளில் விளையாடிய வீரர்கள் தங்களின் இடங்களைத் தக்கவைத்துள்ளனர். இதனால் பிளேயிங் லெவனில் யார் யார் இடம்பெறுவர்கள் என்ற எதிர்பார்ப்புகள் அதிகரித்துள்ளன.
இந்நிலையில் இப்போட்டிக்கான இங்கிலாந்து அணியில் ஜோஃப்ரா ஆர்ச்சருக்கு ஓய்வளித்து கஸ் அட்கின்சனுக்கு வாய்ப்பு வழங்க வேண்டும் என முன்னாள் வீரர் ஸ்டூவர்ட் பிராட் தெரிவித்துள்ளார். இதுகுறித்து பேசிய அவர், “ஆர்ச்சரை நான்கு வருடங்களுக்கு நம்மால் அணியில் சேர்க்காமல் இருக்க முடியாது, அவரை மீண்டும் அணியில் சேர்த்துவிட்டு இன்னும் நான்கு வருடங்களுக்கு அவரைப் பார்க்காமல் இருக்க முடியாது.
இத்தொடரின் ஆரம்பத்தில் ஜோஷ் டோங் விளையாடியதுடன், முக்கியமாக கீழ் வரிசை வீரர்களின் விக்கெட்டுகளை வீழ்த்தியுள்ளார். அதனால் ஆர்ச்சருக்குப் பதிலாக இப்போட்டியில் அவருக்கு வாய்ப்பு கிடைக்கலாம். ஆனால் என்னைப் பொறுத்தவரையில் இப்போட்டியில் கஸ் அட்கின்சன் விளையாட வேண்டும் என்று நினைக்கிறேன். அவருக்கு எந்த வேலைப்பளுவும் இல்லை என்பது எனக்குத் தெரியும், ஆனால் நாம் அவரை இப்போட்டியில் பயன்படுத்தலாம்” என்று கூறியுள்ளார்.
இங்கிலாந்து டெஸ்ட் அணி: பென் ஸ்டோக்ஸ் (கேப்டன்), ஜோஃப்ரா ஆர்ச்சர், கஸ் அட்கின்சன், ஜேக்கப் பெத்தேல், ஹாரி புரூக், பிரைடன் கார்ஸ், ஜாக் கிரௌலி, லியாம் டௌசன், பென் டக்கெட், ஜேமி ஓவர்டன், ஒல்லி போப், ஜோ ரூட், ஜேமி ஸ்மித், ஜோஷ் டங்க், கிறிஸ் வோக்ஸ்.
Also Read: LIVE Cricket Score
Win Big, Make Your Cricket Tales Now
