இந்தியாவில் நடைபெற்று வரும் நடப்பு ஐசிசி ஒருநாள் உலககோப்பை கிரிக்கெட் தொடரின் 39ஆவது லீக் போட்டியானது இன்று மும்பை வான்கடை மைதானத்தில் நடைபெற்று முடிந்தது. இந்த போட்டியில் பேட் கம்மின்ஸ் தலைமையிலான ஆஸ்திரேலிய அணியும், ஹஸ்மத்துல்லா ஷாஹிதி தலைமையிலான ஆஃப்கானிஸ்தான் அணியும் மோதின.
அதன்படி நடைபெற்ற இந்த போட்டியில் டாஸ் வென்று முதலில் பேட்டிங் செய்த ஆஃப்கானிஸ்தான் அணியானது நிர்ணயிக்கப்பட்ட 50 ஓவர்களின் முடிவில் 5 விக்கெட்டுகளை இழந்து 291 ரன்களை குவித்தது. ஆப்கானிஸ்தான் அணி சார்பாக தொடக்க வீரர் இப்ராஹிம் ஜாத்ரான் 129 ரன்கள் குவித்து அசத்தினார். பின்னர் 292 ரன்கள் அடித்தால் வெற்றி என்ற இலக்குடன் விளையாடிய ஆஸ்திரேலியா அணியானது தொடக்கத்தில் இருந்தே விக்கெட்டுகளை தொடர்ச்சியாக இழந்த வேளையில் 91 ரன்களுக்கு எல்லாம் 7 விக்கெட்டுகளை இழந்து தடுமாறியது.
அந்த நேரத்தில் ஜோடி சேர்ந்த மேக்ஸ்வெல் மற்றும் அணியின் கேப்டன் கம்மின்ஸ் ஆகியோர் அடுத்து விக்கெட் விழாமல் இறுதிவரை களத்தில் நின்று 46.5 ஓவர்களில் 7 விக்கெட் இழப்பிற்கு 293 ரன்கள் குவித்து மூன்று விக்கெட் வித்தியாசத்தில் அந்த அணியை வெற்றி அழைத்து சென்றனர். மேக்ஸ்வெல் ஆட்டமிழக்காமல் 201 ரன்கள் குவித்து அசத்தினார்.
