சிராஜின் இடத்தை முகமது ஷமி பிடித்துவிட்டார்- ஷேன் வாட்சன்!

இந்திய அணியின் பிளேயிங் லெவனில் முகமது சிராஜின் இடத்தை நட்சத்திர வேகப்பந்துவீச்சாளர் முகமது ஷமி பிடித்துவிட்டதாக ஆஸ்திரேலிய முன்னாள் வீரர் ஷேன் வாட்சன் கூறியுள்ளார்.

சிராஜின் இடத்தை முகமது ஷமி பிடித்துவிட்டார்- ஷேன் வாட்சன்! (Image Source: Google)

உலகக்கோப்பை கிரிக்கெட் தொடர் விறுவிறுப்பான கட்டத்தை எட்டியுள்ளது. மும்பை வான்கடே மைதானத்தில் நடக்கவுள்ள போட்டியில் இந்திய அணி நாளை இலங்கை அணியை எதிர்த்து களமிறங்கவுள்ளது. இந்த போட்ட்டியில் இந்திய அணி வெற்றிபெறுவதன் மூலமாக இந்திய அணி தனது அரையிறுதி வாய்ப்பை உறுதி செய்ய முடியும். இதனால் நாளை நடக்கவுள்ள போட்டி மீதான எதிர்பார்ப்பு ரசிகர்கள் மத்தியில் அதிகரித்துள்ளது.

இந்திய நட்சத்திர ஆல் ரவுண்டரி ஹர்திக் பாண்டியா இன்னும் காயத்தில் இருந்து மீண்டு வராததால், நாளைய போட்டியில் முகமது ஷமி, சூர்யகுமார் யாதவ் அடங்கிய இந்திய பிளேயிங் லெவனில் எந்த மாற்றமும் இருக்காது என்று பார்க்கப்படுகிறது. முகமது ஷமியை பொறுத்தவரை இதுவரை 13 உலகக்கோப்பை போட்டிகளில் விளையாடி மொத்தமாக 40 விக்கெட்டுகளை வீழ்த்தி இருக்கிறார்.

அதில் நடப்பு உலகக்கோப்பை தொடரில் 2 போட்டிகளில் விளையாடி 9 விக்கெட்டுகளை கைப்பற்றியுள்ளார். இதனால் முகமது ஷமியை பிளேயிங் லெவனில் இருந்து நீக்க கூடாது என்று ரசிகர்கள் மத்தியில் குரல்கள் எழுந்துள்ளது. ஹர்திக் பாண்டியா வந்தாலும், முகமது ஷமியை பிளேயிங் லெவனில் தொடர வேண்டும் என்று முன்னாள் வீரர்கள், ரசிகர்கள் பலரும் கூறி வருகின்றனர்.

இதுகுறித்து பேசிய ஆஸ்திரேலியா ஜாம்பவான் ஷேன் வாட்சன், “இந்திய அணி கேப்டன் ரோஹித் சர்மாவுக்கும், இந்திய அணி நிர்வாகத்திற்கும் இது நல்ல தலைவலியாக அமைந்துள்ளது. பெஞ்சில் இருக்கும் வீரர்களுக்கு வாய்ப்பு கிடைக்கும் போது, சிறப்பாக விளையாடி வெற்றிக்கு உதவுவது தான் ஒரு நல்ல அணிக்கு அழகாகும். எனது மூளையில், முகமது சிராஜின் இடத்தை முகமது ஷமி எடுத்துக் கொண்டுவிட்டார். கடந்த 2 போட்டிகளில் அவர் பந்துவீசியது பிரமிப்பாக இருந்தது. முகமது ஷமி சிறந்த ஃபார்மில் இருக்கும் போது, அவர் எதிர்த்து விளையாடுவது எளிதல்ல.

இங்கிலாந்து அணிக்கு எதிரான போட்டியிலேயே நாம் பார்த்துவிட்டோம். உலகின் எந்தவொரு வீரரையும் வீழ்த்தும் வல்லமை கொண்டவர் ஷமி. ஏனென்றால் ஷமி வீசும் பந்துகளின் துல்லியம் வேற லெவலில் உள்ளது. முகமது ஷமியின் பந்துகளை தவறவிட்டால் ஸ்டம்புகள் காலி தான். பந்துகள் மூலமாக பேட்ஸ்மேன்களிடம் கேள்விகளை கேட்டுக் கொண்டே இருக்கிறார். அவரின் பந்துகளுக்கு பதில் அளிக்க முடியாமல் பேட்ஸ்மேன்கள் திணறி வருகிறார்கள். ஹர்திக் பாண்டியா காயமடைந்தது எதிர்பாராத ஒன்று தான். ஆனால் சிராஜ் இடத்தை ஷமி பிடித்துவிட்டதாகவே நினைக்கிறேன்” என்று கூறியுள்ளார்.

Win Big, Make Your Cricket Tales Now