SL vs NZ, 1st T20I: நியூசிலாந்தை வீழ்த்தி இலங்கை அணி அபார வெற்றி!

நியூசிலாந்துக்கு எதிரான முதல் டி20 போட்டியில் இலங்கை அணி 4 விக்கெட் வித்தியாசத்தில் வெற்றிபெற்று அசத்தியுள்ளது.

SL vs NZ, 1st T20I: நியூசிலாந்தை வீழ்த்தி இலங்கை அணி அபார வெற்றி! (Image Source: Google)

இலங்கையில் சுற்றுப்பயணம் செய்து வரும் நியூசிலாந்து அணி 2 போட்டிகள் கொண்ட டி20 தொடரிலும் 3 போட்டிகள் கொண்ட ஒருநாள் தொடரிலும் விளையாடி வருகிறது. இதில் இரு அணிகளுக்கும் இடையேயான முதல் டி20 போட்டியனது இன்று தம்புளாவில் உள்ள ரங்கிரி தம்புளா கிரிக்கெட் மைதானத்தில் நடைபெற்றது. இப்போட்டியில் டாஸ் வென்ற நியூசிலாந்து அணி முதலில் பேட்டிங் செய்வதாக அறிவித்தது. 

அதன்படி களமிறங்கிய நியூசிலாந்து அணிக்கு டிம் ராபின்சன் - வில் யங் இணை தொடக்கம் கொடுத்தனர். இதில் டிம் ராபின்சன் 3 ரன்களை மட்டுமே எடுத்த நிலையில் விக்கெட்டை இழக்க, அடுத்து களமிறங்கிய மார்க் சாப்மேனும் ஒரு ரன்னில் நடையைக் கட்டினார். பின்னர் வில் யங்குடன் இணைந்த கிளென் பிலீப்ஸ் ஓரளவு தாக்குப்பிடித்து விக்கெட் இழப்பை தடுக்க முயற்சித்தார். பின்னர் ஒரு பவுண்டரி, ஒரு சிக்ஸர் என 19 ரன்களை எடுத்த நிலையில் வில் யங் ஆட்டமிழக்க, 13 ரன்களை மட்டுமே எடுத்த கையோடு கிளென் பிலீப்ஸும் தனது விக்கெட்டை இழந்தார். 

அவர்களைத் தொடர்ந்து களமிறங்கிய மைக்கேல் பிரேஸ்வெல் நிதானமாக விளையாடிய நிலையில், மறுபக்கம் களமிறங்கிய மிட்செல் ஹெய் ரன்கள் ஏதுமின்றியும், ஜோஷ் கிளார்க்சன் 3 ரன்களிலும் என ஆட்டமிழந்து ஏமாற்றமளித்தனர். பின்னர் பொறுப்பான ஆட்டத்தை வெளிப்படுத்திய மைக்கேல் பிரேஸ்வெல் 2 பவுண்டரி, ஒரு சிக்ஸர் என 27 ரன்களை எடுத்த நிலையில் ஆட்டமிழந்து பெவிலியன் திரும்ப, அடுத்து வந்த கேப்டன் மிட்செல் சான்ட்னரும் 16 ரன்களில் நடையைக் கட்டினார். இதனால் நியூசிலாந்து 96 ரன்களுக்கே 8 விக்கெட்டுகளை இழந்தது. 

இறுதியில் ஸகாரி ஃபோல்க்ஸ் மற்றும் இஷ் சோதி இருவரும் இணைந்து அதிரடியாக விளையாட அணியின் ஸ்கோரும் உயரத்தொடங்கியது. இறுதியில் இஷ் சோதி 10 ரன்னிலும், ஜேக்கப் டஃபி ரன்கள் ஏதுமின்றியும் விக்கெட்டை இழக்க, இறுதிவரை ஆட்டமிழக்காமல் இருந்த ஸகாரி ஃபோல்க்ஸ் 27 ரன்களைச் சேர்த்தார். இதனால் நியூசிலாந்து அணி 19.2 ஓவர்களில் அனைத்து விக்கெட்டுகளையும் இழந்து 135 ரன்களுக்கு ஆல் அவுட்டானது. இலங்கை அணி தரப்பில் வநிந்து ஹசரங்கா, துனித் வெல்லாலகே, மதீஷா பதிரானா, நுவான் துஷாரா ஆகியோர் தலா 2 விக்கெட்டுகளை கைப்பற்றினர். 

இதனையடுத்து இலக்கை நோக்கி களமிறங்கிய இலங்கை அணிக்கு பதும் நிஷங்கா - குசால் மெண்டிஸ் இணை தொடக்கம் கொடுத்தனர். இதில் குசால் மெண்டிஸ் ரன்கள் ஏதுமின்றி விக்கெட்டை இழந்து ஏமாற்றமளித்தார். பின்னர் நிஷங்காவுடன் இணைந்த குசால் பெரேரா அதிரடியாக விளையாடிய நிலையில் அணியின் ஸ்கோரும் மளமளவென உயரத்தொடங்கியது. இருவரும் இணைந்து 40 ரன்கள் பார்ட்னர்ஷிப் அமைத்திருந்த நிலையில் பதும் நிஷங்கா 2 பவுண்டரி, ஒரு சிக்ஸர் என 19 ரன்களுக்கு விக்கெட்டை இழந்து பெவிலியன் திரும்பினார். 

அவரைத்தொடர்ந்து அதிரடியாக விளையாடி வந்த குசால் பெரேராவும் 2 பவுண்டரி, ஒரு சிக்ஸர் என 23 ரன்களில் ஆட்டமிழந்தார். பின்னர் இணைந்த கமிந்து மெண்டிஸ் மற்றும் கேப்டன் சரித் அசலங்கா இருவரும் சிறப்பான ஆட்டத்தை வெளிப்படுத்தி அணியின் விக்கெட் இழப்பை தடுக்கும் முயற்சியில் இறங்கினர். இதில் கமிந்து மெண்டிஸ் 23 ரன்களை எடுத்த கையோடு நடையைக் கட்ட, அடுத்து களமிறங்கிய பனுகா ராஜபக்ஷாவும் 4 ரன்களை மட்டுமே எடுத்த கையோடு பெவிலியனுக்கு திரும்பினார். இதனால் இலங்கை அணி 87 ரன்களில் 5 விக்கெட்டுகளை இழந்து தடுமாறியது. 

பின்னர் ஜோடி சேர்ந்த சரித் அசலங்கா - வநிந்து ஹசரங்கா இணை பொறுப்பான ஆட்டத்தை வெளிப்படுத்தியதுடன் அணியின் வெற்றியையும் உறுதிசெய்தனர். பின் 22 ரன்கள் எடுத்த கையோடு ஹசரங்கா தனது விக்கெட்டை இழக்க, மறுமுனையில் இறுதிவரை ஆட்டமிழக்காமல் இருந்த சரித் அசலங்கா 35 ரன்களையும், துனித் வெல்லாலகே 11 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் இலங்கை அணி 19 ஓவர்களில் இலக்கை எட்டியதுடன் 4 விக்கெட் வித்தியாசத்தில் நியூசிலாந்தை வீழ்த்தி அசத்தல் வெற்றியைப் பதிவுசெய்து அசத்தியது. 

Win Big, Make Your Cricket Tales Now