இவர்கள் தான் இந்திய அணியின் துருப்புச்சீட்டு - சௌரவ் கங்குலி!

ஆசிய கோப்பை மற்றும் ஒருநாள் ஓவர் உலகக்கோப்பை தொடரில் இந்திய அணியின் கீ பிளேயர்களாக விராட் கோலி மற்றும் ரோஹித் சர்மா இருப்பார்கள் என முன்னாள் வீரர் சௌரவ் கங்குலி தெரிவித்துள்ளார்.

இவர்கள் தான் இந்திய அணியின் துருப்புச்சீட்டு - சௌரவ் கங்குலி! (Image Source: Google)

இந்திய கிரிக்கெட் அணி ஆசிய கோப்பை மற்றும் ஒருநாள் உலகக் கோப்பை தொடர் என மிகப்பெரிய தொடர்களில் பங்கேற்று விளையாட இருக்கிறது. ரோஹித் சர்மா தலைமையிலான இந்திய அணியானது தற்போது இலங்கை சென்று ஆசிய கோப்பை தொடரில் விளையாட தயாராகி வருகிறது. 

அந்த வகையில் இந்த ஆசிய கோப்பை தொடரின் முதலாவது போட்டியில் இந்திய அணி வரும் செப். 2ஆம் தேதி பாகிஸ்தான் அணிக்கு எதிராக விளையாட இருக்கிறது. கடந்த 2013ஆம் ஆண்டிற்கு பிறகு இந்திய அணி இதுவரை எந்த ஒரு ஐசிசி கோப்பையும் கைப்பற்றாத நிலையில் இந்த ஆண்டு இந்தியாவில் நடைபெறும் இந்த உலகக் கோப்பை வென்று இந்திய அணி அந்த தோல்விகளுக்கு முற்றுப்புள்ளி வைக்கும் என்று எதிர்பார்க்கப்படுகிறது.

இந்நிலையில் இந்திய அணியின் முன்னாள் கேப்டனும், பிசிசிஐ-யின் முன்னாள் தலைவருமான சௌரவ் கங்குலி இந்த ஆசிய கோப்பை மற்றும் ஒருநாள் உலகக் கோப்பை தொடரில் பும்ரா மற்றும் ஷுப்மன் கில் ஆகியோரை தாண்டி ரோஹித் சர்மா மற்றும் விராட் கோலி ஆகியோரே கீ பிளேயராக இருப்பார்கள் என்று தெரிவித்துள்ளார்.

இது குறித்து பேசியுள்ள சௌரவ் கங்குலி, “எதிர்வரும் ஆசிய கோப்பை மற்றும் ஒருநாள் ஓவர் உலக கோப்பை தொடரில் ரோஹித் சர்மா மற்றும் விராட் கோலி ஆகிய இருவருமே இந்திய அணியில் முக்கிய பங்கினை வகிப்பார்கள். ஏனெனில் விராட் கோலி தற்போது மிகச் சிறப்பான ஆட்டத்தை வெளிப்படுத்தி வருகிறார். அவரது திறன் குறித்து எந்தவித சந்தேகமும் இல்லை. அவர் இந்திய அணியின் பலம் மிகுந்த வீரர். அதேபோன்று ரோஹித் சர்மாவும் இந்திய அணியின் கீ பிளேயர் தான்.

ஏனெனில் கடைசியாக 2019-ஆம் ஆண்டு இங்கிலாந்தில் நடைபெற்ற உலக கோப்பையில் 5 சதங்களை விளாசிய அவர் 600-க்கும் மேற்பட்ட ரன்களை விளாசியுள்ளார். இதன்காரணமாக அவர்கள் இருவருமே எதிர்வரும் ஆசிய கோப்பை மற்றும் ஒருநாள் ஓவர் உலகக்கோப்பை தொடரில் இந்திய அணியின் கீ பிளேயர்களாக இருப்பார்கள்” என தெரிவித்துள்ளார்.