எஸ்ஏ20 2025: ஈஸ்டர்ன் கேப்-ல் இணைந்த டோனி டி ஸோர்ஸி!

காயம் காரணமாக எஸ்ஏ தொடரில் இருந்து விலகிய பேட்ரிக் க்ரூகருக்கு பதிலாக டோனி டி ஸோர்ஸியை சன்ரைசர்ஸ் ஈஸ்டர்ன் கேப் அணி ஒப்பந்தம் செய்துள்ளது.

எஸ்ஏ20 2025: ஈஸ்டர்ன் கேப்-ல் இணைந்த டோனி டி ஸோர்ஸி! (Image Source: Google)

தென் ஆப்பிரிக்காவில் நடைபெற்று வரும் எஸ்ஏ20 லீக் தொடரின் மூன்றாவது சீசன் இறுதிக்கட்டத்தை எட்டியுள்ளது. இதில் இதுவரை 23 லீக் போட்டிகள் நடந்து முடிந்துள்ள நிலையில், டேவிட் மில்லர் தலைமையிலான பார்ல் ராயல்ஸ் அணி 28 புள்ளிகளைப் பெற்று முதல் அணியாக குவாலிஃபையர் சுற்றுக்கு முன்னேறியுள்ள நிலையில், டர்பன் சூப்பர் ஜெயண்ட்ஸ் அணி பிளே ஆஃப் சுற்றுக்கான போட்டியில் இருந்து வெளியேறியுள்ளது. 

அதேசமயம் இந்த தொடரின் ஆரம்பத்தில் அடுத்தடுத்து தோல்விகளைத் தழுவி வந்த எம்ஐ கேப்டவுன், சன்ரைசர்ஸ் ஈஸ்டர்ன் கேப் அணிகள் தற்சமயம் அடுத்தடுத்த வெற்றிகளைப் பதிவுசெய்து புள்ளிப்பட்டியளின் அடுத்தடுத்த இடங்களில் உள்ள நிலையில், ஜோபர்க் சூப்பர் கிங்ஸ் மற்றும் பிரிட்டோரியா கேப்பிட்டல்ஸ் அணிகளும் பிளே ஆஃப் சுற்றுக்கான வாய்ப்பை தக்கவைத்துள்ளனர். இதனால் இதில் எந்தெந்த அணிகள் பிளே ஆஃப் சுற்றுக்கு முன்னேறும் என்ற எதிர்பார்ப்புகள் அதிகரித்துள்ளன. 

ஒருபக்கம் போட்டிகள் விறுவிறுப்பாக நடைபெற்று வரும் நிலையில், வீரர்கள் காயமடைந்து வருவது தொடர்கதையாகி வருகிறது. அந்தவகையில் நட்சத்திர வீரர்கள் ஆன்ரிச் நோர்ட்ஜே, ஜெரால்ட் கோட்ஸி, பேட்ரிக் க்ரூகர் உள்ளிட்டோர் காயமடைந்திருக்கும் நிலையில், அந்த பட்டியலில் பார்ல் ராயல்ஸ் அணியின் கேப்டன் டேவிட் மில்லரும் இணைந்துள்ளார். இதில் சன்ரைசர்ஸ் ஈஸ்டர்ன் கேப் அணிக்காக விளையாடிய பேட்ரிக் க்ரூகர் நடப்பு சீசனில் இருந்து விலகியதாக அறிவிக்கப்பட்டுள்ளது. 

இதனையடுத்து அவருக்கான மாற்று வீரராக தென் ஆப்பிரிக்க அணியின் தொடக்க வீரர் டோனி டி ஸோர்ஸியை சன்ரைசர்ஸ் ஈஸ்டர்ன் கேப் அணி ஒப்பந்தம் செய்துள்ளதாக அதிகாரப்பூர்வ அறிவிப்பை வெளியிட்டுள்ளது. முன்னதாக கடந்த சீசனில் டர்பன் சூப்பர் ஜெயண்ட்ஸ் அணியில் இடம்பிடித்திருந்த டோனி டி ஸோர்ஸி, நடப்பு சீசனுக்கு முன்னதாக அந்த அணியில் இருந்து விடுக்கப்பட்டார். இதனைத்தொடர்ந்து நடைபெற்ற வீரர்கள் ஏலத்திலும் அவரை எந்த அணியும் ஏலத்தில் எடுக்கவில்லை. 

Announcement

Patrick Kruger has been ruled of the SA20 S3. Tony de Zorzi joins the team as a replacement.

Can't wait to have you in Orange, Tony! Welcome pic.twitter.com/8fHN2eQlm5

— Sunrisers Eastern Cape (@SunrisersEC) January 27, 2025

இந்நிலையில் தான் தற்சமயம் ஸோர்ஸியை சன்ரைசர்ஸ் ஈஸ்டர்ன் கேப் அணி ஒப்பந்தம் செய்துள்ளது. தென் ஆப்பிரிக்க அணிக்காக இதுவரை 11 டெஸ்ட் போட்டிகளிலும், 12 ஒருநாள் போட்டிகளிலும் விளையாடிய டோனி டி ஸோர்ஸி இதில் இரண்டு சதம், மூன்று அரைசதம் என 1000 ரன்களுக்கு மேல் அடித்துள்ளார். இருப்பினும் இவர் இதுவரை தென் ஆப்பிரிக்க அணிக்காக சர்வதேச டி20 போட்டிகளில் அறிமுகமாகவில்லை என்பது குறிப்பிடத்தக்கது. 

சன்ரைசர்ஸ் ஈஸ்டர்ன் கேப்: ஸாக் கிரௌலி, டேவிட் பெடிங்ஹாம், டாம் ஆபெல், ஐடன் மார்க்ரம் (கேப்டன்), டிரிஸ்டன் ஸ்டப்ஸ், ஜோர்டான் ஹெர்மன், மார்கோ ஜான்சன், லியாம் டௌசன், பெயர்ஸ் ஸ்வான்போயல், ஒட்னீல் பார்ட்மேன், ரிச்சர்ட் க்ளீசன், ரோலோஃப் வான் டெர் மெர்வே, கிரெய்க் ஓவர்டன், டோனி டி ஸோர்ஸி*, ஒகுஹ்லே செலே, ஆண்டிலே சிமெலேன், டேனியல் ஸ்மித், காலேப் செலேகா, சைமன் ஹார்மர்.