டிஎன்பிஎல் 2023: ஜூன், ஜூலையில் தொடரை நடத்த முடிவு; அறிமுகமாகும் புதிய விதிமுறைகள்!

டிஎன்பிஎல் தொடரின் 7ஆவது சீசன் அடுத்தாண்டு ஜூன் மற்றும் ஜூலை மாதங்களில் நடத்த தமிழ்நாடு கிரிக்கெட் சங்கம் முடிவுசெய்துள்ளது.

TNPL 2023 in June-July, player auction to replace draft; DRS to be introduced (Image Source: Google)

தமிழ்நாடு பிரீமியர் லீக் எனப்படும் டிஎன்பிஎல் டி20 கிரிக்கெட் தொடரின் 7ஆவது சீசன் அடுத்தாண்டு ஜூன் மற்றும் ஜூலை மாதங்களில் நடைபெறவுள்ளது. இந்நிலையில் இத்தொடருக்கான வீரர்களில் ஏலம் நடைபெறவுள்ளதாகவும், ஏலத்தில் பங்கேற்கும் அணிகளுக்கு ரூ.70 லட்சம் ஏலத்தொகையாக வழங்கப்படும் என தமிழ்நாடு கிரிக்கெட் சங்கம் தெரிவித்துள்ளது. 

இதுகுறித்து, தமிழ்நாடு கிரிக்கெட் சங்கம் வெளியிட்டுள்ள செய்திக்குறிப்பில், இந்த முடிவுகள் சமீபத்தில் நடந்த டிஎன்பிஎல் கவுன்சில் கூட்டத்தில் எட்டப்பட்டது எனவும், அதில் எடுக்கப்பட்ட முக்கிய முடிவுகளில் ஏலத்தை நடத்துவதற்கான நடவடிக்கையும் அடங்கும் என்றும் குறிப்பிட்டுள்ளது.

மேலும், “2023 ஆம் ஆண்டு நடைபெறவிருக்கும் டிஎன்பிஎல் தொடர் போட்டியில் பங்கேற்க விரும்பும் அனைத்து வீரர்களும் டிசம்பர் 28 முதல் ஜனவரி 20, 2023க்குள் தங்களை பதிவு செய்து கொள்ள வேண்டும்.

இந்த தொடருக்காக பதிவு செய்த ஒரு வீரர் காயம், இந்திய அணி பொறுப்புகள் மற்றும் பிற பிசிசிஐ கடமைகள் தவிர மற்ற காரணங்களுக்காக டிஎன்பிஎல்-லில் பங்கேற்காத நிலையில், அந்த வீரரை பிசிசிஐ நடத்தும் டி20 போட்டிகளுக்கு தமிழக டி20 அணியில் களமிறக்க பரிசீலிக்கக்கூடாது என்றும் டிஎன்பிஎல் கவுன்சில் பரிந்துரைக்க முடிவு செய்துள்ளது.

மேலும் அடுத்த சீசன் மூலம் டிஎன்பிஎல் தொடரிலும் டிஆர்எஸ் விதிமுறையை அறிமுகப்படுத்தவுள்ளதாகவும் அந்த அறிக்கையில் குறிப்பிடப்பட்டுள்ளது. 

Win Big, Make Your Cricket Tales Now