டிஎன்பிஎல் 2025: அதிரடியில் மிரட்டிய ராஜகோபால்; வெற்றியை ருசித்த சேலம் ஸ்பார்டன்ஸ்!
மதுரை பாந்தர்ஸுக்கு எதிரான டிஎன்பிஎல் லீக் போட்டியில் சேலம் ஸ்பார்டன்ஸ் அணி 6 விக்கெட் வித்தியாசத்தில் அபார வெற்றியைப் பதிவுசெய்தது.
முதலில் பேட்டிங் செய்த மதுரை பாந்தர்ஸ் அணிக்கு ராம் அரவிந்த் மற்றும் பாலச்சந்தர் அனிருத் இணை தொடக்கம் கொடுத்தனர். இதில் அனிருத் 23 ரன்களில் விக்கெட்டை இழக்க, மறுமுனையில் நிதான ஆட்டத்தை வெளிப்படுத்திய ராம் அரவிந்தும் 37 ரன்களில் நடையைக் கட்டினார். மேற்கொண்டு களமிறங்கிய சரவணனும் 8 ரன்களுக்கு ஆட்டமிழந்து பெவிலியன் திரும்ப, அடுத்து ஜோடி சேர்ந்த கேப்டன் சதூர்வேத் மற்றும் ஆதீக் உர் ரஹ்மான் இணை பொறுப்புடன் விளையாடி விக்கெட் இழப்பை தடுத்ததுடன் அவ்வபோது பவுண்டரிகளையும் விளாசி ஸ்கோரையும் உயர்த்தினர்.
இதில் சதூர்வேத் 2 பவுண்டரி, ஒரு சிக்ஸர் என 32 ரன்களிலும், ஆதீக் உர் ரஹ்மான் ஒரு பவுண்டரி 3 சிக்ஸர்களுடன் 38 ரன்களுக்கும் என விக்கெட்டை இழக்க, இறுதியில் 17 ரன்களை சேர்த்திருந்த கணேஷும் தனது விக்கெட்டை இழந்தார். இதன் காரணமாக மதுரை பாந்தர்ஸ் அணி 20 ஓவர்கள் முடிவில் 6 விக்கெட்டுகள் இழப்பிற்கு 164 ரன்களைச் சேர்த்தது. ஸ்பார்டன்ஸ் தரப்பில் முகமது 2 விக்கெட்டுகளை வீழ்த்தினார். பின்னர் இலக்கை நோக்கி களமிறங்கிய சேலம் ஸ்பார்டன்ஸ் அணிக்கு தொடக்கம் அவ்வளவு சிறப்பானதாக அமையவில்லை.
தொடக்க வீரர்கள் ஹரி நிஷாந்த் 6 ரன்களுக்கும், கேப்டன் அபிஷேக் 8 ரன்களுக்கும் என விக்கெட்டுகளை இழக்க, அந்த அணி 36 ரன்களில் 2 விக்கெட்டுகளை இழந்து தடுமாறியது. பின்னர் ஜோடி சேர்ந்த நிதீஷ் ராஜகோபால் - கவின் இணை சிறப்பான ஆட்டத்தை வெளிப்படுத்தி விக்கெட் இழப்பை தடுத்து நிறுத்தினர். இதில் அபாரமான ஆட்டத்தை வெளிப்படுத்திய ராஜகோபால் தனது அரைசதத்தை பதிவுசெய்ய, இருவரின் பார்ட்னர்ஷிப்பும் 70 ரன்களைக் கடந்தது. பின் 7 பவுண்டரி, 2 சிக்ஸர்களுடன் 60 ரன்களை எடுத்திருந்த ராஜகோபால் ஆட்டமிழக்க, அடுத்து வந்த் விவேக்கும் 17 ரன்களில் நடையைக் கட்டினார்.
Also Read: LIVE Cricket Score
இருப்பினும் மறுபக்கம் சிறப்பான ஆட்டத்தை வெளிப்படுத்தி இறுதிவரை ஆட்டமிழக்காமல் இருந்த கவின் ஒரு பவுண்டரி, 4 சிக்ஸர்கள் என 48 ரன்களையும், சன்னி சந்து 15 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் சேலம் ஸ்பார்டன்ஸ் அணி 18.4 ஓவர்களில் இலக்கை எட்டியதுடன் 6 விக்கெட் வித்தியாசத்தில் மதுரை பாந்தர்ஸ் அணியை வீழ்த்தி தொடரை வெற்றியுடன் தொடங்கியுள்ளது. இப்போட்டியில் சேலம் ஸ்பார்டன்ஸ் தரப்பில் அரைசதம் அடித்த நிதீஷ் ராஜகோபால் ஆட்டநாயகன் விருதை வென்றார்.
Win Big, Make Your Cricket Tales Now
