ஐசிசி விருது: நவ. மாதத்திற்கான விருதை வென்ற வார்னர், மேத்யூஸ்!

நவம்பர் மாதத்திற்கான ஐசிசியின் சிறந்த வீரராக ஆஸ்திரேலியாவின் டேவிட் வார்னரும், வீராங்கனையாக வெஸ்ட் இண்டீஸ் ஆல்ரவுண்டர் ஹாலே மேத்யூஸும் தேர்வு செய்யப்பட்டுள்ளனர்.

சர்வதேச கிரிக்கெட் கவுன்சில் சார்பில் மாதந்தோறும் கிரிக்கெட்டில் சிறந்து விளங்கும் வீரர், வீராங்கனை தேர்வு செய்யப்பட்டு விருது வழங்கி கவுரவிக்கப்பட்டு வருகிறார்கள். 

அந்த வகையில் நவம்பர் மாதத்துக்கான சிறந்த வீரர்களைத் தேர்வு செய்ய, டி20 உலகக் கோப்பை உள்பட நவம்பரில் நடைபெற்ற அனைத்து வகை கிரிக்கெட் போட்டிகளும் கணக்கில் கொள்ளப்பட்டன.

அதன்படி ஆஸ்திரேலியாவின் டேவிட் வார்னர், பாகிஸ்தானின் ஆபித் அலி மற்றும் நியூசிலாந்தின் டிம் சௌதி ஆகியோரது பெயர்களை ஐசிசி பரிந்துரைதிருந்தது. 

இதில் ஆஸ்திரேலியாவின் டேவிட் வார்னர், நவம்பர் மாதத்தின் சிறந்த வீரராக தேர்ந்தெடுக்கப்பட்டுள்ளார். நவம்பர் மாதத்தில் 4 சர்வதேச டி20 கிரிக்கெட் போட்டிகளில் விளையாடி 209 ரன்கள் குவித்ததுடன், அவரது பேட்டிங் சராசரி 69.66 ஆகவும், ஸ்டிரைக் ரேட் 151.44 ஆகவும் இருந்ததினால் இந்த விருது அவருக்கு வழங்கப்பட்டுள்ளது. 

அதேபோல்  மகளிர் கிரிக்கெட்டில் பாகிஸ்தானின் அனாம் அமின், வங்கதேசத்தின் நஹிடா அக்தெர் மற்றும் வெஸ்ட் இண்டீஸின் ஹாலே மேத்யூஸ் ஆகியோர் நவம்பர் மாத சிறந்த வீராங்கனைக்கான விருதுக்குப் பரிந்துரைக்கப்பட்டிருந்தனர். 

இதில் வெஸ்ட் இண்டீஸ் ஆல்ரவுண்டர் ஹாலே மேத்யூஸ் சிறந்த வீராங்கனையாக தேர்வு செய்யப்பட்டார். பாகிஸ்தான் அணிக்கெதிரான தொடரில் 141 ரன்கள் மற்றும் 9 விக்கெட்டுகளைக் கைப்பற்றியதன் மூலம் இவருக்கு இந்த விருது வழங்கப்பட்டுள்ளது.

Win Big, Make Your Cricket Tales Now