கேஎல் ராகுலின் பேட்டிங்கை கடுமையாக விமர்சித்த கெவின் பீட்டர்சன்!
பவர் பிளேவில் கே.எல்.ராகுல் விளையாடுவதை பார்ப்பதுதான் நான் அனுபவித்த மிகவும் சலிப்பான ஒரு விஷயம் என்று முன்னாள் இங்கிலாந்து வீரர் கெவின் பீட்டர்சன் தெரிவித்துள்ளார்.
இதையடுத்து பேட்டிங் செய்ய வந்த லக்னோ அணிக்கு தொடக்கம் தருவதற்கு கே எல் ராகுல் மற்றும் கையில் மேயர்ஸ் இருவரும் களமிறங்கினார்கள். தென்னாபிரிக்க அணியின் விக்கெட் கீப்பிங் அதிரடி பேட்ஸ்மேன் குயின்டன் டி காக்குக்கு இந்தப் போட்டியிலும் லக்னோ அணியில் விளையாட வாய்ப்பு தரப்படவில்லை.
Trending
டிரண்ட் போல்ட் வீசிய ஆட்டத்தின் முதல் ஓவரை கே.எல்.ராகுல் எதிர்கொண்டார். இடதுகை வேகப்பந்துவீச்சாளர்களுக்கு எதிராக தடுமாற்றம் கொண்ட கே.எல்.ராகுல் தாமே முன்வந்து ஸ்ட்ரைக் எடுத்தது தைரியமான முடிவாக இருந்தது. ஆனால் அந்த ஓவரில் அவர் ஒரு ரன் கூட எடுக்கவில்லை. ஓவர் மெய்டன் ஆனது!
தொடர்ந்து விளையாடிய கேஎல்ராகுல் மிகவும் மெதுவாகவே விளையாடினார். இவரது இந்தப் போக்கு எதிர் முனையில் இருந்த பேட்ஸ்மேனுக்கும் பிரச்சனையை உண்டாக்கியது. பவர் பிளே முடிவின் பொழுது விக்கெட் இழப்பில்லாமல் 37 ரன்கள் மட்டுமே லக்னோ அணியால் எடுக்க முடிந்தது. தொடர்ந்து விளையாடிய கேஎல் ராகுல் 32 பந்தில் 39 ரன்கள் எடுத்து 120 ஸ்ட்ரைக் ரேட்டில் ஆட்டம் இழந்தார்.
இந்நிலையில், அப்போது வர்ணனையில் இருந்த இங்கிலாந்து அணியின் முன்னாள் கேப்டன் மற்றும் அதிரடி ஆட்டக்காரர் கெவின் பீட்டர்சன் கே.எல்.ராகுல் ஆட்டம் குறித்து கூறுகையில், “பவர் பிளேவில் கே.எல்.ராகுல் விளையாடுவதை பார்ப்பதுதான் நான் அனுபவித்த மிகவும் சலிப்பான ஒரு விஷயம்” என்று ஒளிவு மறைவு இல்லாமல் நேரடியாகவே கூறியிருக்கிறார்.
ஐபிஎல் தொடருக்கு முன்பு பேசி இருந்த கேஎல் ராகுல், ஸ்ட்ரைக் ரேட் என்பது ஒரு பொருட்டான விஷயம் கிடையாது என்று கூறி அது சமூக வலைதளத்தில் சர்ச்சையாகி இருந்தது. அவரது மெதுவான ஆட்டத்தின் மீது எவ்வளவு விமர்சனங்கள் இருந்தாலும் அவர் அது குறித்து எந்தவித முயற்சியையும் செய்வதே கிடையாது. தற்பொழுது அவருடைய இந்த இன்னிங்ஸும் சமூக வலைதளங்களில் பேசுபொருளாகி வருகிறது.
Win Big, Make Your Cricket Tales Now
