டி20 கிரிக்கெட்டில் சிறப்பாக விளையாடி வருகிறோம் - ஷாகிப் அல் ஹசன்!

டி20 கிரிக்கெட்டில் சிறப்பாக விளையாடி வருகிறோம் - ஷாகிப் அல் ஹசன்! (Image Source: Google)

வெஸ்ட் இண்டீஸ் மற்றும் அமெரிக்காவில் வரும் ஜூன் மாதம் ஒன்றாம் தேதி முதல் 2024 ஐசிசி டி20 உலகக் கோப்பை கோலாக்கலமாக தொடங்க உள்ளது. சர்வதேச கிரிக்கெட்டின் புதிய சாம்பியனை தீர்மானிக்கப் போகும் இந்த தொடரில் இம்முறை 16 அணிகளுக்கு பதிலாக 20 அணிகள் மொத்தம் 55 போட்டிகளில் கோப்பையை வெல்வதற்காக மோத உள்ளதால் ரசிகர்களிடம் எதிர்பார்ப்பு அதிகமாக ஏற்பட்டுள்ளது.

அதில் மிகவும் எதிர்பார்க்கப்படும் இந்தியா மற்றும் பாகிஸ்தான் அணிகள் மோதும் போட்டி வரும் ஜூன் மாதம் 9ஆம் தேதி அமெரிக்காவில் நடைபெற உள்ளது. முன்னதாக ஆஸ்த்ரேலியாவில் நடைபெற்ற 2022 டி20 உலகக் கோப்பையில் வெஸ்ட் இண்டீஸ் அணியை நமீபியாவும் வலுவான தென் ஆப்பிரிக்கா அணியை நெதர்லாந்தும் அசால்டாக தோற்கடித்து அனைவரையும் ஆச்சரியப்படுத்தியது.

அந்த வகையில் இம்முறை 4 எக்ஸ்ட்ரா கத்துக்குட்டி அணிகள் விளையாடுவதால் 2024 உலகக் கோப்பையில் இந்தியா, ஆஸ்திரேலியா போன்ற டாப் அணிகள் மிகுந்த கவனத்துடன் செயல்படுவது அவசியம் என்றே சொல்லலாம். இந்நிலையில் 2024 டி20 உலகக் கோப்பையை வெல்வதற்கு தங்களுக்கு பிரகாசமான வாய்ப்புகள் இருப்பதாக வங்கதேச கேப்டன் ஷாகிப் அல் ஹசன் நம்பிக்கை தெரிவித்துள்ளார்.

இதுகுறித்து பேசிய அவர், “அந்த தொடர் அமெரிக்கா மற்றும் வெஸ்ட் இண்டீஸ் மண்ணில் நடைபெறுகிறது. அங்குள்ள சூழ்நிலைகள் நாங்கள் விளையாடும் ஸ்டைலுக்கு பொருத்தமாக இருக்கும். எனவே இம்முறை நாங்கள் கோப்பையை வெல்வதற்கு நல்ல வாய்ப்பு இருக்கிறது. மேலும் கடந்த ஒரு வருடமாக நாங்கள் டி20 கிரிக்கெட்டில் சிறப்பாக விளையாடி வருகிறோம். எங்களுடைய அணி தற்போது நல்ல சமநிலையுடன் ஃபார்மில் இருக்கிறது. எங்கள் வீரர்கள் அனைவரும் நன்றாக விளையாடுகின்றனர் குறிப்பாக நடைபெற்று முடிந்த நியூசிலாந்து தொடரில் எங்களுடைய அணி சிறப்பாக செயல்பட்டது” என்று கூறினார்.

இதைத் தொடர்ந்து நடைபெறும் டி20 உலகக் கோப்பையில் வங்கதேசம் தங்களுடைய லீக் சுற்றில் இலங்கையை முதலாவதாக ஜூன் 7ஆம் தேதி எதிர்கொள்கிறது. அதன் பின் ஜூன் 10ஆம் தேதி வலுவான தென் ஆப்பிரிக்காவை எதிர்கொள்ளும் வங்கதேசம் எஞ்சிய 2 போட்டிகளில் நேபாள் மற்றும் நெதர்லாந்து ஆகிய அணிகளையும் எதிர்கொள்வது குறிப்பிடத்தக்கது.

Win Big, Make Your Cricket Tales Now