WI vs BAN, 2nd ODI: வங்கதேசத்தை 227 ரன்களில் சுருட்டியது வெஸ்ட் இண்டீஸ்!

வெஸ்ட் இண்டீஸ் அணிக்கு எதிரான இரண்டாவது ஒருநாள் போட்டியில் முதலில் பேட்டிங் செய்த வங்கதேச அணி 228 ரன்களை இலக்காக நிர்ணயித்துள்ளது.

WI vs BAN, 2nd ODI: வங்கதேசத்தை 227 ரன்களில் சுருட்டியது வெஸ்ட் இண்டீஸ்! (Image Source: Google)

வங்கதேச அணி தற்சமயம் வெஸ்ட் இண்டீஸில் சுற்றுப்பயணம் செய்து 3 போட்டிகள் கொண்ட ஒருநாள் தொடரில் விளையாடி வருகிறது. இதில் நடந்து முடிந்த முதல் ஒருநாள் போட்டியில் வெஸ்ட் இண்டீஸ் அணியானது அபாரமான வெற்றியைப் பதிவுசெய்து அசத்தியதுடன் 1-0 என்ற கணக்கில் தொடரிலும் முன்னிலைப் பெற்றுள்ளது. 

இதனைத்தொடர்ந்து வெஸ்ட் இண்டீஸ் - வங்கதேச அணிகளுக்கு இடையேயான ஒருநாள் தொடரின் வெற்றியாளரைத் தீர்மானிக்கு இரண்டாவது ஒருநாள் போட்டியானது செயின்ட் கிட்ஸில் இன்று நடைபெற்றது. இப்போட்டியில் டாஸ் வென்ற வெஸ்ட் இண்டீஸ் அணி முதலில் பந்துவீசுவதாக அறிவித்து வங்கதேச அணியை பெட்டிங் செய்ய அழைத்தது. அதன்படி களமிறங்கிய வங்கதேச அணிக்கு தன்ஸித் ஹசன் மற்றும் சௌமீயா சர்க்கார் இணை தொடக்கம் கொடுத்தனர். இதில் சௌமீயா சர்க்கார் 2 ரன்னில் விக்கெட்டை இழந்து ஏமாற்றமளித்தார். 

அவரைத் தொடர்ந்து களமிறங்கிய லிட்டன் தாஸ் 4 ரன்களுக்கும், கேப்டன் மெஹிதி ஹசன் மிராஸ் ஒரு ரன்னிலும் என விக்கெட்டுகளை இழந்து ஏமாற்றமளித்தனர். அதேசமயம் மறுபக்கம் சிறப்பான ஆட்டத்தை வெளிப்படுத்தி வந்த தன்ஸித் ஹசனும் 4 பவுண்டரி, 2 சிக்ஸர்கள் என 46 ரன்னில் விக்கெட்டை இழக்க, அவருடன் இணைந்து விளையாடிய அஃபிஃப் ஹொசைனும் 24 ரன்களில் நடையைக் கட்டினர். இதையடுத்து வந்த மஹ்முதுல்லா ஒருபக்கம் நிதான ஆட்டத்தை வெளிப்படுத்த, மறுபக்கம் களமிறங்கிய ஜக்கர் அலி, ரிஷாத் ஹொசைன் ஆகியோரும் சொற்ப ரன்களில் ஆட்டமிழந்தனர். 

அதன்பின் மஹ்முதுல்லாவுடன் இணைந்த தன்ஸிம் ஹசன் சாகிப் பொறுப்பான ஆட்டத்தை வெளிப்படுத்தி அணியின் ஸ்கோரை உயர்த்தினர். இதில் மஹ்முதுல்லா தனது அரைசதத்தையும் பதிவுசெய்து அசத்தினார். இருவரும் இணைந்து எட்டாவது விக்கெட்டிற்கு 90 ரன்களுக்கு மேல் பார்ட்னர்ஷிப் அமைத்த நிலையில் அரைசதம் அடிப்பார் என எதிர்பார்க்கப்பட்ட தன்ஸிம் ஹசன் 4 பவுண்டரி, 2 சிக்ஸர்கள் என 45 ரன்களில் விக்கெட்டை இழந்தார். அவரைத் தொடர்ந்து 2 பவுண்டரி, 4 சிக்ஸர்கள் என 62 ரன்களை எடுத்த கையோடு மஹ்முதுல்லாவும் பெவிலியன் திரும்பினார்.

இறுதியில் ஷொரிஃபுல் இஸ்லாம் தனது பங்கிற்கு 2 பவுண்டரி, ஒரு சிக்ஸர் என 15 ரன்களைச் சேர்த்தர். இறுதியில் வங்கதேச அணி 45.5 ஓவர்களில் அனைத்து விக்கெட்டுகளையும் இழந்து 227 ரன்களுக்கு ஆல் அவுட்டானது. வெஸ்ட் இண்டீஸ் தரப்பில் அபார பந்துவீச்சை வெளிப்படுத்திய ஜெய்டன் சீல்ஸ் 4 விக்கெட்டுகளையும், குடகேஷ் மோட்டி 2 விக்கெட்டுகளையும் கைப்பற்றினர். இதனையடுத்து 228 ரன்கள் எடுத்தால் வெற்றி என்ற இலக்கை நோக்கி வெஸ்ட் இண்டீஸ் அணி விளையாடவுள்ளது குறிப்பிடத்தக்கது. 

Win Big, Make Your Cricket Tales Now