மகளிர் ஆஷஸ் 2025: இங்கிலாந்தை வீழ்த்தி டி20 தொடரையும் வென்றது ஆஸ்திரேலியா!

இங்கிலாந்து மகளிர் அணிக்கு எதிரான இரண்டாவது டி20 போட்டியில் ஆஸ்திரேலிய மகளிர் அணி டக்வொர்த் லூயிஸ் முறைப்படி 6 ரன்கள் வித்தியாசத்தில் வெற்றிபெற்றது.

மகளிர் ஆஷஸ் 2025: இங்கிலாந்தை வீழ்த்தி டி20 தொடரையும் வென்றது ஆஸ்திரேலியா! (Image Source: Google)

இங்கிலாந்து மகளிர் அணி தற்சமயம் ஆஸ்திரேலியாவில் சுற்றுப்பயணம் மேற்கொண்ட் ஆஷஸ் தொடரில் விளையாடி வருகிறது. இதில் தற்சமயம் இரு அணிகளுக்கும் இடையேயான டி20 தொடர் நடைபெற்று வரும் நிலையில், முதல் போட்டியில் ஆஸ்திரேலிய மகளிர் அணி வெற்றிபெற்று அசத்தியதுடன் நடப்பு ஆஷஸ் தொடரையும் கைப்பற்றி அசத்தியுள்ளது. இதனையடுத்து ஆஸ்திரேலியா - இங்கிலாந்து மகளிர் அணிகளுக்கு இடையேயான இரண்டாவது டி20 போட்டி இன்று (ஜனவரி 23) நடைபெற்றது. 

கான்பெர்ராவில் நடைபெற்ற இப்போட்டியில் டாஸ் வென்ற இங்கிலாந்து மகளிர் அணி முதலில் பந்துவீசுவதாக அறிவித்தது. இதனையடுத்து களமிறங்கிய ஆஸ்திரேலிய மகளிர் அணிக்கு பெத் மூனி அதிரடியான தொடக்கத்தை வழங்கினார். அதேசமயம் மற்ற டாப் ஆர்டர் வீரர்கள் ஜார்ஜியா வோல் 5 ரன்களுக்கும், போப் லிட்ச்ஃபீல்ட் 17 ரன்களுக்கும், எல்லிஸ் பெர்ரி 2 ரன்களுக்கும், அனபெல் சதர்லேண்ட் 18 ரன்களிலும் என விக்கெட்டை இழக்க, மறுமுனையில் அரைசதத்தை நெருங்கிய பெத் மூனியும் 44 ரன்களில் ஆட்டமிழந்து ஏமாற்றமளித்தார்.

இதனையடுத்து ஜோடி சேர்ந்த கேப்டன் தஹ்லியா மெக்ராத் மற்றும் கிரேஸ் ஹாரிஸ் இணை அதிரடியாக விளையாடி அணியை வலுவான ஸ்கோரை நோக்கி அழைத்துச் சென்றனர். இதில் இறுதிவரை ஆட்டமிழக்காமல் இருந்த தஹ்லியா மெக்ராத் 48 ரன்களையும், கிரேஸ் ஹாரிஸ் 2 பவுண்டரி, 3 சிக்ஸர்கள் என 35 ரன்களையும் சேர்த்து அணிக்கு தேவையான ஃபினிஷிங்கைக் கொடுத்தனர். இதன்மூலம் ஆஸ்திரேலிய அணி 20 ஓவர்கள் முடிவில் 5 விக்கெட்டுகளை இழந்து 185 ரன்களைச் சேர்த்தது. இங்கிலாந்து தரப்பில் சார்லீன் டீன் 2 விக்கெட்டுகளை கைப்பற்றினார். 

அதன்பின் இலக்கை நோக்கி விளையாடிய இங்கிலாந்து அணியில் தொடக்க வீராங்கனை மையா பௌச்சர் 13 ரன்களில் ஆட்டமிழந்தார். அவரைத்தொடர்ந்து ஜோடி சேர்ந்த டேனியல் வைட் - சோபியா டங்க்லி இணை பொறுப்புடன் விளையாடி அணியின் ஸ்கோரை மளமளவென உயர்த்தினர். இப்போட்டியில் அபார ஆட்டத்தை டேனியல் வைட் தனது அரைசதத்தைப் பதிவுசெய்து அசத்தினர். பின்னர் 52 ரன்கள் சேர்த்திருந்த நிலையில் டேனியல் வைட் விக்கெட்டை இழக்க, அவரைத்தொடர்ந்து சோஃபியா டங்க்லி 32 ரன்களிலும் தனது விக்கெட்டுகளை இழந்தனர். 

பின்னர் களமிறங்கிய நாட் ஸ்கைவர் பிரண்ட் 22 ரன்களுக்கு ஆட்டமிழந்தார். அதேசமயம் இறுதிவரை ஆட்டமிழக்காமல் இருந்த ஹீதர் நைட் 43 ரன்களை சேர்த்திருந்த நிலையில் மழை குறுக்கிட்டத்தால் ஆட்டம் தடைபட்டது. அச்சமயத்தில் இங்கிலாந்து அணி 4 விக்கெட் இழப்பிற்கு 168 ரன்களைச் சேர்த்திருந்தது. அதன்பின் மழை நீடித்த காரணத்தால் இப்போட்டியில் டக்வொர்த் லூயிஸ் முறைப்படி ஆஸ்திரேலிய அணி 6 ரன்கள் வித்தியாசத்தில் இங்கிலாந்தை வீழ்த்தியதாக அறிவிக்கப்பட்டது. இதன்மூலம் ஆஸ்திரேலிய அணி டி20 தொடரையும் 2-0 என்ற கணக்கில் கைப்பற்றியுள்ளது குறிப்பிடத்தக்கது.