WPL 2023: நாட் ஸ்கைவர் அதிரடி; யுபி வாரியர்ஸுக்கு 183 டார்கெட்!

யுபி வாரியர்ஸுக்கு எதிரான எலிமினேட்டர் சுற்று ஆட்டத்தில் முதலில் விளையாடிய மும்பை இந்தியன்ஸ் அணி 183 ரன்களை இலக்காக நிர்ணயித்துள்ளது.

WPL 2023: Nat Sciver's Blistering Fifty Takes MI To 182 Runs Against UP Warriorz! (Image Source: Google)

மகளிர் பிரீமியர் லீக் தொடரின் முதலாவது சீசன் தற்போது இறுதிக்கட்டத்தை எட்டியுள்ளது. இந்த நிலையில் இறுதிப்போட்டிக்குள் நுழையும் 2ஆவது அணி எது? என்பதை நிர்ணயிக்கும் வெளியேற்றுதல் சுற்று ஆட்டம் மும்பை டி.ஒய்.பட்டீல் மைதானத்தில் நடந்து வருகிறது. இப்போட்டியில் டாஸ் வென்றுள்ள யுபி வாரியர்ஸ் அணியின் கேப்டன் அலிசா ஹீலி முதலில் பந்துவீச தீர்மானித்தார்.

அதன்படி களமிறங்கிய மும்பை இந்தியன்ஸ் அணிக்கு யஷ்திகா பாட்டியா - ஹெய்லி மேத்யூஸ் இணை வழக்கம் போல அதிரடியான தொடக்கத்தைக் கொடுத்து அடித்தளமிட்டனர். பின் யஷ்திகா பாட்டியா 21 ரன்களிலும், ஹெய்லி மேத்யூஸ் 26 ரன்களிலும் தங்களது விக்கெட்டுகளை இழக்க, அடுத்து வந்த கேப்டன் ஹர்மன்ப்ரீத் கவுர் 14 ரன்களுக்கு ஆட்டமிழந்து ஏமாற்றமளித்தார். 

இருப்பினும் 3ஆம் வரிசையில் இறங்கிய நடாலி ஸ்கைவர் அபார ஆட்டத்தை வெளிப்படுத்தி அணியின் ஸ்கோரை மளமளவென உயர்த்தியதுடன், தனது அரைசதத்தையும் பதிவுசெய்து அசத்தினார். அவருக்கு துணையாக விளையாடிய அமெலியா கெரும் தனது பங்கிற்கு 5 பவுண்டரிகளை விளாசி 29 ரன்களைச் சேர்த்து ஆட்டமிழந்தார். 

இதையடுத்து வந்த பூஜா வஸ்த்ரேகர் மதல் பந்தில் பவுண்டரியும், இரண்டாவது பந்தில் சிக்சரும் பறக்கவிட்டு ரசிகர்களுக்கு விருந்து படைத்தார். அதேசமயம் இறுதிவரை ஆட்டமிழக்காமல் இருந்த நாட் ஸ்கைவர் 28 பந்துகளில் 9 பவுண்டரி, 2 சிக்சர்கள் என 72 ரன்களை குவித்து அசத்தினார். 

இதன்மூலம் நிர்ணயிக்கப்பட்ட 20 ஓவர்களில் மும்பை இந்தியன்ஸ் அணி 4 விக்கெட்டுகளை மட்டும் இழந்து 182 ரன்களைக் குவித்தது. யுபி வாரியர்ஸ் தரப்பில் சிறப்பாக பந்துவீசிய சோபி எக்லெஸ்டோன் 2 விக்கெட்டுகளைக் கைப்பற்றினார். 

Win Big, Make Your Cricket Tales Now