டி20 கிரிக்கெட் வடிவத்தில் இருந்து தோன்றிய டி10 கிரிக்கெட் வடிவம் டி20 கிரிக்கெட் செல்லாத நாடுகளுக்கும் சென்றதோடு இல்லாமல், எதிர்காலத்தில் ஒலிம்பிக்கில் கிரிக்கெட்டை சேர்ப்பதற்கான வாய்ப்புகளையும் அதிகரித்திருக்கிறது. இந்நிலையில் ஜிம்பாப்வே நாட்டில் டி10 கிரிக்கெட் தொடர் ஐந்து அணிகளை கொண்டு நடத்தப்பட்டு வருகிறது. இதில் மூன்று அணிகள் தென் ஆப்பிரிக்க அணிகள் இரண்டு அணிகள் ஜிம்பாப்வே அணிகள்.
இந்தத் தொடரில் நடந்த குவாலிஃபையர் போட்டியில் டர்பன் களந்தர்ஸ், ஜோபர்க் பஃபல்லோஸ் ஆகிய இரண்டு தென்ஆப்பிரிக்க அணிகள் மோதிக்கொண்டன. இந்தப் போட்டியில் ஜோபர்க் பஃபல்லோஸ் அணி முதலில் டாஸ் வென்று பந்துவீச்சை தேர்வு செய்தது.
அதன்படி களமிறங்கிய டர்பன் களந்தர்ஸ் அணிக்கு ஆண்ட்ரே ஃபிளட்சர் 39, ஆசிஃப் அலி 32 , நிக் வெல்ச் 24 ஆகியோர் அதிரடியாக ரன்கள் எடுக்க பத்து ஓவர்கள் முடிவில், டர்பன் அணி நான்கு விக்கெட்டுகள் இழப்புக்கு 140 ரன்கள் அதிரடியாகச் சேர்த்தது. ஜோபர்க் அணி தரப்பில் நூர் அஹ்மத் 2 விக்கெட்டுகளைக் கைப்பற்றினார்.
