CWC 2023 Qualifiers: பரபரப்பான ஆட்டத்தில் ஓமனை வீழ்த்தி ஜிம்பாப்வே அபார வெற்றி!

ஓமன் அணிக்கெதிரான உலகக்கோப்பை தகுதிச்சுற்று ஆட்டத்தில் ஜிம்பாப்வே அணி 14 ரன்கள் வித்தியாசத்தில் வெற்றிபெற்று அசத்தியது.

Zimbabwe continue their winning streak to start the Super Six stage with an important win! (Image Source: Google)

ஐசிசி 50 ஓவர் உலகக் கோப்பை கிரிக்கெட் போட்டி வரும் அக்டோபர் மாதம் இந்தியாவில் நடைபெற உள்ளது. சுமார் 12 ஆண்டுகளுக்குப் பிறகு இந்தியாவில் இந்தத் தொடர் நடைபெறுகிறது. இதில் மொத்தம் 10 அணிகள் பங்கேற்கவுள்ள நிலையில், போட்டியை நடத்தும் இந்தியா உள்பட 8 அணிகள் பிரதான சுற்றுக்கு நேரடியாகத் தகுதிபெற்றுவிட்டன. எஞ்சியிருக்கும் 2 இடங்களுக்கான அணிகள் தகுதிச்சுற்று ஆட்டங்கள் மூலம் முடிவு செய்யப்படவுள்ளன.

ஒருநாள் உலகக்கோப்பை கிரிக்கெட் தொடருக்கான தகுதிச்சுற்று போட்டிகள் ஜிம்பாப்வேவில் நடைபெற்று வருகிறது. இதில் லீக் சுற்றுகள் முடிந்துள்ள நிலையில் இன்று முதல் சூப்பர் 6 சுற்றுகள் ஆரம்பமாகிறது. அதன்படி இன்று நடைபெற்ற சூப்பர் 6 சுற்றின் முதல் போட்டியில் ஜிம்பாப்வே மற்றும் ஓமன் அணிகள் பலப்பரீட்சை நடத்தின. இப்போட்டியில் டாஸ் வென்ற ஓமன் அணி முதலில் பந்துவீசுவதாக தீர்மானித்தது.

அதன்படி களமிறங்கிய ஜிம்பாப்வே அணியில் கும்பி மற்றும் கேப்டம் கிரேக் எர்வின் இணை தொடக்கம் கொட்த்தனர். இதில் கும்பி 21 ரன்களிலும், கிரேக் எர்வின் 25 ரன்களிலும் என ஆட்டமிழக்க, அடுத்து வந்த மதவேராவும் 23 ரன்களுக்கு ஆட்டமிழந்தார். இதையடுத்து ஜோடி சேர்ந்த சீன் வில்லியம்ஸ் - சிக்கந்தர் ரஸா இணை அதிரடியான ஆட்டத்தை வெளிப்படுத்தி அணியின் ஸ்கோரை மளமளவென உயர்த்தினர். 

இதில் அபார ஆட்டத்தை வெளிப்படுத்தி வந்த சீன் வில்லியம்ஸ் சதமடித்து அசத்த, மறுமுனையில் சிகந்தர் ரஸா 42 ரன்களில் ஆட்டமிழந்தார். அவரைத் தொடர்ந்து  3 சிக்சர், 14 பவுண்டரிகளை விளாசி 142 ரன்களை எடுத்திருந்த சீன் விலியம்ஸும் விக்கெட்டை இழக்க, இறுதியில் ஜோங்வா 43 ரன்களைச் சேர்த்து அசத்தினார். இதன்மூலம் ஜிம்பாப்வே அணி 50 ஓவர்கள் முடிவில் 7 விக்கெட் இழப்பிற்கு 332 ரன்களைச் சேர்த்தது. 

இதையடுத்து கடின இலக்கை நோக்கி களமிறங்கிய ஓமன் அணியில் தொடக் வீரர் கஷ்யப் பிரஜபதி அதிரடியாக விளையாட, மறுமுனையில் ஜதிந்தர் சிங் 2 ரன்களில் விக்கெட்டை இழந்தார். அவரைத் தொடர்ந்து களமிறங்கிய அகிப் இலியாஸ் 45 ரன்களிலும், ஜீசன் மக்சூத் 37 ரன்களிலும், அயான் கான் 47 ரன்களிலும் என விக்கெட்டை இழந்து அரைசதம் அடிக்கும் வாய்ப்பினை தவறவிட்டார்கள். 

அதேசமயம் மறுபக்கம் அபார ஆட்டத்தை வெளிப்படுத்திய கஷ்யப் பிரஜபதி சதமடித்த கையோடு 103 ரன்களுக்கு விக்கெட்டை இழந்தார். அதன்பின் களமிறங்கிய வீரர்களும் சொற்ப ரன்களுக்கு விக்கெட்டை இழக்க, இறுதிவரை போராடிய முகமது நதீம் 30 ரன்களைச் சேர்த்த போதிலும் அந்த அணியால் இலக்கை எட்டமுடியவில்லை. இதனால் 50 ஓவர்கள் முடிவில் ஓமன் அணியால் 9 விக்கெட்டுகள் இழப்பிற்கு 318 ரன்களை மட்டுமே எடுக்க முடிந்தது.

ஜிம்பாப்வே அணி தரப்பில் டெண்டாய் சதாரா,பிளசிங் முசரபாணி தலா 3 விக்கெட்டுகளை வீழ்த்தினர். இதன்மூலம் ஜிம்பாப்வே அணி 14 ரன்கள் வித்தியாசத்தில் ஓமன் அணியை வீழ்த்தி அபார வெற்றியைப் பதிவுசெய்தது. இப்போட்டியில் வெற்றிக்கு காரணமாக இருந்த சீன் வில்லியம்ஸ் ஆட்டநாயகனாகத் தேர்வுசெய்யப்பட்டார்.  

Win Big, Make Your Cricket Tales Now