2nd Test, Day 2: கான்வே, ரச்சின், நிக்கோலஸ் சதம்; 600-ஐ கடந்த நியூசிலாந்து!
நியூசிலாந்து - ஜிம்பாப்வே இடையேயான இரண்டாவது டெஸ்ட் போட்டி நேற்று புலவாயோவில் உள்ள குயின்ஸ் போட்ர்ட்ஸ் கிளப் மைதானத்தில் தொடங்கியது. இதில் டாஸ் வென்ற நியூசிலாந்து அணி முதலில் பந்துவீசுவதாக அறிவித்தது.
அதன்படி களமிறங்கிய ஜிம்பாப்வே அணியிம் பிராண்டன் டெய்லர் 44 ரன்களையும், தஃபத்ஸ்வா 33 ரன்களையும் எடுத்ததை தவிர்த்து மற்ற வீரர்கள் சோபிக்க தவறினர். இதனால் ஜிம்பாப்வே அணி முதல் இன்னிங்ஸில் 125 ரன்களிலேயே அனைத்து விக்கெட்டுகளையும் இழந்தது. நியூசிலாந்து அணி தரப்பில் அபாரமான பந்துவீச்சை வெளிப்படுத்திய மேட் ஹென்றி 5 விக்கெட்டுகளையும், ஸகாரி ஃபால்க்ஸ் 4 விக்கெட்டுகளையும், மேத்யூ ஃபிஷர் ஒரு விக்கெட்டையும் கைப்பற்றினார்.அதன்பின் முதல் இன்னிங்ஸைத் தொடங்கிய நியூசிலாந்து அணிக்கு வில் யங் - டெவான் கான்வே இணை தொடக்கம் தந்தனர்.
இதில் இருவரும் அரைசதம் கடந்ததுடன், 162 ரன்கள் பார்ட்னர்ஷிப்பும் அமைத்தனர். பின் வில் யங் 11 பவுண்டரிகளுடன் 74 ரன்களைச் சேர்த்த கையோடு தனது விக்கெட்டை இழந்தார். இதன் காரணமாக நியூசிலாந்து அணி முதல்நாள் ஆட்டநேர முடிவில் ஒரு விக்கெட்டை மட்டுமே இழந்து 174 ரன்களை அடித்தது. இன்று தொடங்கிய இரண்டாம் நாள் ஆட்டத்தை டெவான் கான்வே 79 ரன்களுடனும், ஜேக்கப் டஃபி 8 ரன்களுடனும் தொடர்ந்தனர். இதில் டெவான் கான்வே சதமடித்து அசத்திய நிலையில், ஜேக்கப் டஃபி 36 ரன்களில் விக்கெட்டை இழந்து பெவிலியன் திரும்பினார்.
அவரைத்தொடர்ந்து டெவான் கான்வேவும் 18 பவுண்டரிகளுடன் 153 ரன்களைச் சேர்த்து ஆட்டமிழந்தார். பின்னர் ஜோடி சேர்ந்த ரச்சின் ரவீந்திரா - ஹென்றி நிக்கோலஸ் இணையும் அதிரடியாக விளையாடி அணியின் ஸ்கோரை உயர்த்தினர். தொடர்ந்து அபாரமாக விளையாடிய இருவரும் தங்களின் சதங்களைப் பதிவுசெய்ததுடன், 4ஆவது விக்கெட்டிற்கு 200 ரன்களுக்கு மேல் பார்ட்னர்ஷிப்பும் அமைத்த்னர். இதன் மூலம் இரண்டாம் நாள் ஆட்டநேர முடிவில் நியூசிலாந்து அணி 3 விக்கெட்டுகளை மட்டுமே இழந்து 601 ரன்களைக் குவித்ததுடன், 476 ரன்கள் முன்னிலையும் பெற்றுள்ளது.
Also Read: LIVE Cricket Score
இதில் ஹென்றி நிக்கோலஸ் 150 ரன்களுடனும், ரச்சின் ரவீந்திரா 165 ரன்களுடனும் களத்தில் உள்ளனர். ஜிம்பாப்வே தரப்பில் பிளெசிங் முஸரபானி, டிரேவர் குவாண்டு, வின்சென் மசெகேசா ஆகியோர் தலா ஒரு விக்கெட்டை வீழ்த்தியுள்ளனர். இந்த போட்டியில் இன்னும் மூன்று நாள் ஆட்டம் மீதமுள்ள நிலையில் நியூசிலாந்து அணி இமாலய ஸ்கோரை நோக்கி பயணித்து வருவது குறிப்பிடத்தக்கது.