ஆஸ்திரேலியா - இந்தியா அணிகளுக்கு இடையே 5 போட்டிகளை உள்ளடக்கிய பார்டர் கவாஸ்கர் கோப்பை கிரிக்கெட் தொடர் நடைபெற்று வருகிறது. இதில் நடந்து முடிந்துள்ள மூன்று டெஸ்ட் போட்டிகளின் முடிவில் இரு அணிகளும் தலா ஒரு வெற்றியைப் பதிவுசெய்ததுடன் 1-1 என்ற கணக்கில் தொடரையும் சமன்செய்து அசத்தியுள்ளன. மேலும் ஒரு போட்டி டிராவில் முடிவடைந்துள்ளது.
இதனையடுத்து இவ்விரு அணிகளுக்கு இடையேயான நான்காவது டெஸ்ட் போட்டி மெல்பொர்ன் கிரிக்கெட் மைதானத்தில் விறுவிறுப்பாக நடைபெற்று வருகிறது. இப்போட்டியின் முதல் இன்னிங்ஸில் ஆஸ்திரேலிய அனி 474 ரன்களையும், இந்திய அணி 369 ரன்களைச் சேர்த்தது. அதன்பின் 105 ரன்கள் முன்னிலையுடன் இரண்டாவது இன்னிங்ஸைத் தொடங்கி விளையாடிவரும் ஆஸ்திரேலிய அணி தற்போது வரை 6 விக்கெட்டுகள் இழப்பிற்கு 146 ரன்களைச் சேர்த்துள்ளது.
இதையடுத்து இவ்விரு அணிகளுக்கும் இடையேயான ஐந்தாவது மற்றும் கடைசி டெஸ்ட் போட்டி ஜனவரி 03ஆம் தேதி சிட்னி கிரிக்கெட் மைதானத்தில் நடைபெறவுள்ளது. இந்நிலையில் நடப்பு பார்டர் கவாஸ்கர் கோப்பை தொடரின் எஞ்சியுள்ள போட்டிகளில் இருந்து ஆஸ்திரேலிய அணி வீரர் ஜோஷ் இங்கிலிஸ் காயம் காரணமாக விலகியுள்ளதாக ஆஸ்திரேலிய கிரிக்கெட் வாரியம் இன்று அறிவித்துள்ளது.
அதன்படி நடைபெற்றுவரும் நான்காவது டெஸ்ட் போட்டியின் ஃபீல்டிங்கின் போது ஜோஷ் இங்கிலிஸ் காயமடைந்தார். இதுகுறித்து கிரிக்கெட் ஆஸ்திரேலிய வெளியிட்டுள்ள அறிக்கையில், "காயம் காரணமாக ஜோஷ் இங்கிலிஸ் சிட்னியில் நடைபெறும் ஐந்தாவது மற்றும் கடைசி டெஸ்ட் போட்டிக்கான ஆஸ்திரேலிய அணியில் இடம்பெற மாட்டார். மேலும் அவருக்கான மாற்று வீரர் விரைவில் அறிவிக்கப்படுவார்.
ஆஸ்திரேலியாவில் நடைபெற்று வரும் இந்த டெஸ்ட் தொடரைத் தொடர்ந்து, இலங்கை சுற்றுப்பயணத்திற்கான ஆஸ்திரேலிய அணியில் இங்கிலிஸ் இடம்பிடிப்பார் என்று எதிர்பார்க்கப்படுகிறது. அதேசமயம் பிக் பாஷ் லீக் தொடரில் ஜோஷ் இங்கிலிஸ் விளையாடுவது பற்றி அவரது மருத்துவ அறிக்கைக்கு பிறகு முடிவெடுக்கப்படும்” என்று தெரிவித்துள்ளது.
முன்னதாக நடப்பு பார்டர் கவாஸ்கர் கோப்பை கிரிக்கெட் தொடருக்கான நான்கு டெஸ்ட் போட்டிகளுக்கான ஆஸ்திரேலிய அணியில் தேர்வு செய்யப்பட்ட ஜோஷ் இங்கிலிஸ் ஒரு போட்டியில் கூட பிளேயிங் லெவனில் விளையாடும் வாய்ப்பை பெறவில்லை. மேலும் அஸ்திரேலியாவில் நடைபெற்று வரும் பிக் பேஷ் லீக் தொடரில் பெர்த் ஸ்கார்ச்சர்ஸ் அணிக்காக ஜோஷ் இங்கிலிஸ் விளையாடினார் என்பது குறிப்பிடத்தக்கது.
Also Read: Funding To Save Test Cricket
கடைசி இரண்டு போட்டிகளுக்கான ஆஸ்திரேலிய டெஸ்ட் அணி: பாட் கம்மின்ஸ் (கேப்டன்), டிராவிஸ் ஹெட், ஸ்டீவ் ஸ்மித், சீன் அபோட், ஸ்காட் போலண்ட், அலெக்ஸ் கேரி, உஸ்மான் கவாஜா, சாம் கொன்ஸ்டாஸ், மார்னஸ் லாபுஷாக்னே, நாதன் லையன், மிட்செல் மார்ஷ், ஜெய் ரிச்சர்ட்சன், மிட்செல் ஸ்டார்க், பியூ வெப்ஸ்டர்.