T20 WC 2024: ஆல் ரவுண்டராக அசத்திய ஸ்டொய்னிஸ்; ஓமனை வீழ்த்தியது ஆஸ்திரேலியா!

விறுவிறுப்பாக நடைபெற்று வரும் உலகக்கோப்பை டி20 தொடரில் இன்று நடைபெற்ற 10ஆவது லீக் போட்டியில் குரூப் பி பிரிவில் இடம்பிடித்துள்ள ஆஸ்திரேலியா மற்றும் ஓமன் அணிகள் பலப்பரீட்சை நடத்தின. பார்படாஸில் நடைபெற்ற இப்போட்டியில் டாஸ் வென்ற ஓமான் அணி முதலில் பந்துவீசுவதாக அறிவித்து ஆஸ்திரேலிய அணியை பேட்டிங் செய்ய அழைத்தது. அதன்படி களமிறங்கிய ஆஸ்திரேலிய அணிக்கு டேவிட் வார்னர் - டிராவிஸ் ஹெட் இணை தொடக்கம் கொடுத்தனர். இதில் அதிரடியாக தொடங்கிய டிராவிஸ் ஹெட் 12 ரன்களை மட்டுமே எடுத்த நிலையில் விக்கெட்டை இழந்தார். 

அதன்பின் டேவிட் வார்னருடன் இணைந்த கேப்டன் மிட்செல் மார்ஷும் நிதான ஆட்டத்தை வெளிப்படுத்தி அணியின் ஸ்கோரை உயர்த்தும் முயற்சியில் இறங்கினார். ஆனால் 21 பந்துகளை எதிர்கொண்ட மிட்செல் மார்ஷ் 2 பவுண்டரிகளுடன் 14 ரன்கள் மட்டுமே எடுத்த நிலையில் மெஹ்ரான் கான் பந்துவீச்சில் ஆட்டமிழந்து பெவிலியனுக்கு நடையைக் கட்ட, அடுத்து களமிறங்கிய கிளென் மேக்ஸ்வெல்லும் எதிர்கொண்ட முதல் பந்திலேயே அகிப் இலியாஸின் அபாரமான கேட்ச்சின் மூலம் ரன்கள் ஏதுமின்றி விக்கெட்டை இழந்து ரசிகர்களை ஏமாற்றினார்.

இதனால் ஆஸ்திரேலிய அணியானது 50 ரன்களுக்கே 3 விக்கெட்டுகளை இழந்து தாடுமாறியது. அதன்பின் வார்னருடன் இணைந்த மார்கஸ் ஸ்டொய்னிஸ் தொடக்கத்தில் தடுமாற்றமான ஆட்டத்தை வெளிப்படுத்தினாலும், ஆட்டம் செல்ல செல்ல தனது அதிரடியான ஆட்டத்தை வெளிப்படுத்தி அடுத்தடுத்து சிக்ஸர்களை விளாசித்தள்ளினார். அதிலும் மெஹ்ரான் கான் வீசிய 15ஆவது ஓவரில் அடுத்தடுத்து 4 சிக்ஸர்களை பறக்கவிட்டு அசத்தினார். தொடர்ந்து அபாரமான ஆட்டத்தை வெளிப்படுத்திய மார்கஸ் ஸ்டொய்னிஸ் 27 பந்துகளில் தனது அரைசதத்தைப் பதிவுசெய்தார். அவருக்கு துணையாக டேவிட் வார்னரும் தனது அரைசதத்தை பதிவுசெய்தார். 

அதன்பின் 6 பவுண்டரி, ஒரு சிக்ஸர் என 56 ரன்களைச் சேர்த்திருந்த டேவிட் வார்னர் தனது விக்கெட்டை இழக்க, இப்போட்டியில் இறுதிவரை ஆட்டமிழக்காமல் இருந்த மார்கஸ் ஸ்டொய்னிஸ் 2 பவுண்டரி, 6 சிக்ஸர்கள் என 67 ரன்களை விளாசினார். இதன்மூலம் 20 ஓவர்கள் முடிவில் ஆஸ்திரேலிய அணியானது 4 விக்கெட்டுகளை இழந்து 164 ரன்களைக் குவித்தது. ஓமன் அணி தரப்பில் மெஹ்ரான் கான் 2 விக்கெட்டுகளையும், பிலால் கான், கலீலுல்லா ஆகியோர் தலா ஒரு விக்கெட்டையும் கைப்பற்றி அசத்தினர். இதையடுத்து 165 ரன்கள் என்ற இலக்கை நோக்கி ஓமன் அணி விளையாடவுள்ளது. 

இதனையடுத்து இலக்கை நோக்கி விளையாடிய ஓமன் அணிக்கு காஷ்யப் பிரஜபதி - பிரதிக் அதவலே இணை தொடக்கம் கொடுத்தனர். இதில் பிரதிக் அதவலே ரன்கள் ஏதுமின்றி விக்கெட்டை இழக்க, மறுபக்கம் 7 ரன்களை மட்டுமே எடுத்திருந்த காஷ்யப் பிரஜபதியும் ஆட்டமிழந்தார். அவர்களைத் தொடர்ந்து களமிறங்கிய கேப்டன் அகிப் இலியாஸ் நிதான ஆட்டத்தை வெளிப்படுத்தி 18 ரன்களிலும், மறுமுனையில் களமிறங்கிய ஸீஸான் மக்சூத்  ஒரு ரன்னிலும், கலித் கைல் 8 ரன்களிலும், சோயப் கான் ரன்கள் ஏதுமின்றியும் என விக்கெட்டை இழந்தனர். 

அதன்பின் இணைந்த அயான் கான் - மெஹ்ரான் கான் இணை அதிரடியாக விளையாடி அணியின் ஸ்கோரை மளமளவென உயர்த்தினர். இருவரும் இணைந்து அடுத்தடுத்து பவுண்டரிகளையும், சிக்ஸர்களையும் விளாசி ரசிகர்களுக்கு ஆறுதலளித்தனர். பின்னர் 2 பவுண்டரி, 2 சிக்ஸர்கள் என 36 ரன்கள் சேர்த்திருந்த அயான் கான் விக்கெட்டை இழக்க, அவரைத்தொடர்ந்து ஒரு பவுண்டரி, 2 சிக்ஸர்கள் என 27 ரன்களைச் சேர்த்திருந்த மெஹ்ரான் கானும் ஆட்டமிழந்து பெவிலியனுக்கு திரும்பினார். பின்னர் களமிறங்கிய வீரர்களாலும் சோபிக்க முடியவில்லை. 

இதனால் ஓமன் அணி 20 ஓவர்கள் முடிவில் 9 விக்கெட்டுகளை இழந்து 125 ரன்களை மட்டுமே சேர்த்தது. ஆஸ்திரேலிய அணி தரப்பில் அபாரமாக பந்துவீசிய மார்கஸ் ஸ்டொய்னிஸ் 3 விக்கெட்டுகளையும், மிட்செல் ஸ்டார்க், நாதன் எல்லிஸ், ஆடம் ஸாம்பா ஆகியோர் தலா 2 விக்கெட்டுகளையும் கைப்பற்றி அசத்தினர். இதன்மூலம் ஆஸ்திரேலிய அணியானது 39 ரன்கள் வித்தியாசத்தில் ஓமன் அணியை வீழ்த்தியதுடன், நடப்பு டி20 உலகக்கோப்பை கிரிக்கெட் தொடரையும் வெற்றியுடன் தொடங்கியுள்ளது குறிப்பிடத்தக்கது.