BGT 2024: முதல் போட்டிக்கான இந்திய அணியின் பிளேயிங் லெவனை தேர்வு செய்த ஆகாஷ் சோப்ரா!

இந்திய கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு ஐந்து போட்டிகள் கொண்ட பார்டர் கவாஸ்கர் கோப்பை கிரிக்கெட் தொடரில் விளையாட உள்ளது. அந்தவகையில் இந்தியா - ஆஸ்திரேலிய அணிகளுக்கு இடையேயான இந்த தொடரின் முதல் போட்டி வரும் 22ஆம் தேதி பெர்த் மைதானத்தில் தொடங்குகிறது.

இதற்கு தயாராகும் வகையில் இந்திய அணி வீரர்கள் பழைய பெர்த் மைதானத்தில் பயிற்சி மேற்கொண்டு வருகின்றனர். தற்போது இந்திய அணியில் இடம்பெற்றுள்ள வீரர்கள் இரு அணிகளாக பிரிந்து பயிற்சி ஆட்டத்தில் விளையாடி வருகின்றனர். இந்நிலையில் இப்போட்டிக்கான இந்திய அணியில் கேப்டன் ரோஹித் சர்மா குழந்தை பிறப்பின் காரணமாக பங்கேற்க மாட்டார் என்பது ஏறத்தாழ உறுதியாகியுள்ளது. இதனால் ஜஸ்பிரித் பும்ரா அணியை வழிநடத்தவார் என்று கூறப்படுகிறது. 

அதேசமயம் பாயிற்சின் போது காயமடைந்த ஷுப்மன் கில்லும் முதல் போட்டியில் விளையாடமாட்டர் என தகவல்கள் வெளியாகியுள்ளன. இந்நிலையில் ஆஸ்திரேலிய அணிக்கு எதிரான முதல் டெஸ்ட் போட்டியில் இந்திய அணியின் பிளேயிங் லெவன் என்னவாக இருக்கும், அணியின் தொடக்க வீரராக யார் களமிறங்குவார் என்பது குறித்து இந்திய அணியின் முன்னாள் வீரரும், வர்ணனையாளருமான ஆகாஷ் சோப்ரா தனது கணிப்பை தெரிவித்துள்ளார்.

அதன்படி  ஆகாஷ் சோப்ரா அறிவித்துள்ள பிளேயிங் லெவனில் அணியின் தொடக்க வீரர்களாக யஷ்ஸ்வி ஜெய்ஸ்வால் மற்றும் கேஎல் ராகுல் ஆகியோரைத் தேர்ந்தெடுத்துள்ளார். மேற்கொண்டு தேவ்தத் படிக்கல்லை அவர் மூன்றாம் வரிசையில் வகைப்படுத்தியுள்ளார். அடுத்தடுத்த இடங்களில் விராட் கோலி, ரிஷப் பந்த் ஆகியோரை தேர்ந்தெடுத்துள்ளார். 

அவர்களைத் தொடர்ந்து சமீபத்தில் ஆஸ்திரேலிய ஏ அணிக்கு எதிரான போட்டியில் சிறப்பான ஆட்டத்தை வெளிப்படுத்திய துருவ் ஜூரெலிற்கும், அறிமுக வீரராக தேர்வு செய்யப்பட்டுள்ள நிதீஷ் குமார் ரெட்டிக்கும் அவர் தனது பிளேயிங் லெவனில் இடம் கொடுத்துள்ளார். 

மேற்கொண்டு அணியின் சுழற்பந்துவீச்சாளராக ரவீந்திர ஜடேஜா அல்லது வாஷிங்டன் சுந்தர் ஆகியோரை தேர்வு செய்துள்ள அவர், வேகப்பந்து வீச்சாளர்களாக ஜஸ்பிரித் பும்ரா, பிரஷித் கிருஷ்ணா மற்றும் முகமது சிராஜ் ஆகியோரைத் தேர்ந்தெடுத்துள்ளார். ஆனால் ஆகாஷ் சோப்ரா கணித்துள்ள இந்த அணியில் ரவிச்சந்திரன் அஸ்வின், சர்ஃப்ராஸ் கான், ஆகாஷ் தீப், ஹர்ஷித் ரானா ஆகியோருக்கு வாய்ப்பி வழங்கவில்லை என்பது குறிப்பிடத்தக்கது.

Also Read: Funding To Save Test Cricket

ஆகாஷ் சோப்ரா தேர்வு செய்த இந்திய அணியின் பிளேயிங் லெவன்: யஷஸ்வி ஜெய்ஸ்வால், கேஎல் ராகுல், தேவ்தத் படிக்கல், விராட் கோலி, ரிஷப் பந்த், துருவ் ஜூரல், நிதிஷ் குமார் ரெட்டி, ரவீந்திர ஜடேஜா/வாஷிங்டன் சுந்தர், ஜஸ்பிரித் பும்ரா, முகமது சிராஜ், ஆகாஷ் தீப்/பிரசித் கிருஷ்ணா.