WI vs IND 1st ODI: இந்திய அணியின் பிளேயிங் லெவனை தேர்வு செய்த ஆகாஷ் சோப்ரா!

வெஸ்ட் இண்டீஸ் சென்றுள்ள இந்திய கிரிக்கெட் அணி, விண்டீஸ் அணியுடன் இரண்டு டெஸ்ட் போட்டிகள், மூன்று ஒருநாள் போட்டிகள் மற்றும் ஐந்து டி.20 போட்டிகள் கொண்ட தொடரில் பங்கேற்றுள்ளது. இதில் முதலில் நடைபெற்ற டெஸ்ட் தொடரை இந்திய அணி 1-0 என்ற கணக்கில் கைப்பற்றிய நிலையில், இரு அணிகள் இடையேயான மூன்று போட்டிகள் கொண்ட ஒருநாள் தொடரின் முதல் போட்டி இன்று நடைபெறவுள்ளது.

இந்தநிலையில், இந்தியா – விண்டீஸ் இடையேயான ஒருநாள் தொடர் குறித்து பல்வேறு விசயங்கள் பேசி வரும் முன்னாள் இந்திய வீரரான ஆகாஷ் சோப்ரா, முதல் ஒருநாள் போட்டிக்கான அவரது இந்திய அணியின் ஆடும் லெவனையும் தேர்வு செய்து அறிவித்துள்ளார்.

தனது அணியின் தொடக்க வீரர்களாக ரோஹித் சர்மாவையும், ஷுப்மன் கில்லையும் தேர்வு செய்துள்ள ஆகாஷ் சோப்ரா, இஷான் கிஷனிற்கு ஆடும் லெவனில் வாய்ப்பு கிடைக்காது என தெரிவித்துள்ளார். மிடில் ஆர்டரில் விராட் கோலி மற்றும் சூர்யகுமார் யாதவ் ஆகியோரை தேர்வு செய்துள்ள ஆகாஷ் சோப்ரா, விக்கெட் கீப்பராக சஞ்சு சாம்சனையும், ஆல் ரவுண்டர்களாக ஹர்திக் பாண்டியா, ஜடேஜா மற்றும் அக்‌ஷர் பட்டேல் ஆகியோரை தேர்வு செய்துள்ளார்.

ஹர்திக் பாண்டியா பந்துவீசினால் ஷர்துல் தாகூருக்கு ஆடும் லெவனில் வேலையே இருக்காது என்பதால் அவருக்கு தனது ஆடும் லெவனில் இடம் கொடுக்கவில்லை என ஆகாஷ் சோப்ரா தெரிவித்துள்ளார். சுழற்பந்து வீச்சாளராக குல்தீப் யாதவை தேர்வு செய்துள்ள ஆகாஷ் சோப்ரா, வேகப்பந்து வீச்சாளர்கள் வரிசையில் முகமது சிராஜ் மற்றும் உம்ரன் மாலிக் ஆகியோரை தேர்வு செய்துள்ளார்.

உலகக்கோப்பை தொடருக்கு முன்பு உம்ரன் மாலிக்கை இந்திய அணி முழுமையாக தயார்படுத்தி கொள்ள வேண்டும் என்றும் ஆகாஷ் சோப்ரா தெரிவித்துள்ளார்.

ஆகாஷ் சோப்ரா தேர்வு செய்த இந்திய அணி: ரோஹித் சர்மா, ஷுப்மன் கில், விராட் கோலி, சூர்யகுமார் யாதவ், சஞ்சு சாம்சன், ஹர்திக் பாண்டியா, ரவீந்திர ஜடேஜா, அக்‌ஷர் பட்டேல், குல்தீப் யாதவ், முகமது சிராஜ், உம்ரன் மாலிக்.