வங்கதேச டெஸ்ட் போட்டிக்கான இந்திய அணியின் கணிக்கப்பட்ட பிளேயிங் லெவன்!

வங்கதேச அணி இந்தியாவில் சுற்றுப்பயணம் மேற்கொண்டு 2 டெஸ்ட் மற்றும் 3 டி20 போட்டிகளில் விளையாடவுள்ளது. இரு அணிகளுக்கும் இடையிலான டெஸ்ட் தொடர் முதலில் நடைபெறுகிறது. முதல் டெஸ்ட் போட்டி சென்னை சேப்பாக்கம் மைதானத்தில் செப்டம்பர் 19 ஆம் தேதி தொடங்குகிறது. இப்போட்டிக்கான இரு அணி வீரர்களையும் அந்நாட்டு கிரிக்கெட் வாரியங்கள் அறிவித்துள்ளன. மேற்கொண்டு இரு அணி வீரர்கள் தற்சமயம் தீவிர பயிற்சியில் ஈடுபட்டு வருகின்றனர். 

இந்நிலையில் வங்கதேச அணிக்கு எதிரான முதல் டெஸ்ட் போட்டிக்கான இந்திய அணியின் பிளேயிங் லெவன் எவ்வாறு இருக்கும் என்ற எதிர்பார்ப்புகள் ரசிகர்கள் மத்தியில் அதிகரித்துள்ளன. ஏனெனில் காயத்தில் இருந்து மீண்டுள்ள ரிஷப் பந்த் மற்றும் கேஎல் ராகுல் ஆகியோர் மீண்டும் அணிக்கு திரும்பியுள்ளதால் இளம் வீரர்களான சர்ஃப்ராஸ் கான், துருவ் ஜூரெல் ஆகியோருக்கு வாய்ப்பு கிடைக்குமா என்ற சந்தேகங்கள் எழுந்துள்ளன. 

இதுதவிர்த்து ரவிச்சந்திரன் அஸ்வின், ரவீந்திர ஜடேஜா ஆகியோர் தங்கள் இடங்களை உறுதிசெய்துள்ள நிலையில், அக்ஸர் படேல் - குல்தீப் யாதவிற்கு இடையே கடும் போட்டி நிலவி வருகிறது. மேற்கொண்டு முகமது சிராஜ், ஆகாஷ் தீப் மற்றும் யாஷ் தயாள் ஆகியோருக்கு இடையேவும் கடும் போட்டிகள் இருப்பதாக கூறப்படுகிறது. இதனால் நிச்சயம் இப்போட்டிக்கான இந்திய அணியில் மாற்றங்கள் இருக்கும் என எதிர்பார்க்கப்படுகிறது.

அதன்படி இந்திய அணியின் பிளேயிங் லெவன் எவ்வாறு இருக்கும் என்ற கணிப்பை இப்பதிவில் நீங்கள் பார்க்கலாம். அதன்படி, கேப்டன் ரோஹித் சர்மாவுடன் இளம் அதிரடி வீரர் யஷஸ்வி ஜெய்ஸ்வால் தொடக்க வீரராக களமிறங்குவார். அதேசமயம் மூன்றாம் இடத்தில் ஷுப்மன் கில்லும், நான்காம் இடத்தில் விராட் கோலியும் களமிறங்குவது உறுதியாகியுள்ளது. அதேசமயம் 5ஆவது இடத்தில் இம்முறை கேஎல் ராகுலுக்கு முன்னுரிமை அளிக்கப்படும் என எதிர்பார்க்கப்படுகிறது. 

மேற்கொண்டு அணியின் விக்கெட் கீப்பராக துருவ் ஜூரெல் சிறப்பாக செயல்பட்டிருந்தாலும், ரிஷப் பந்தின் வருகை காரணமாக அவருக்கு இந்த பிளேயிங் லெவனில் இடம் இருக்காது. இதுதவிர அணியின் சுழற்பந்து வீச்சாளர்களாக ரவிச்சந்திரன் அஸ்வின், ரவீந்திர ஜடேஜா ஆகியோருடன் குல்தீப் யாதவ் வாய்ப்பை பெறுவார். அதேசமயம் ஜஸ்பிரித் பும்ரா முதனை வேகப்பந்து வீச்சாளராக இருக்க, முகமது சிராஜ் அல்லது ஆகாஷ் தீப் ஆகியோரில் ஒருவருக்கு வாய்ப்பு வழங்கப்படும் என எதிர்பார்க்கப்படுகிறது. 

இந்திய டெஸ்ட் அணி: ரோஹித் சர்மா (கே), யஷஸ்வி ஜெய்ஸ்வால், ஷுப்மன் கில், விராட் கோலி, கேஎல் ராகுல், சர்ஃப்ராஸ் கான், ரிஷப் பந்த், துருவ் ஜூரல், ரவிச்சந்திரன் அஷ்வின், ரவீந்திர ஜடேஜா, அக்ஸர் படேல், குல்தீப் யாதவ், முகமது சிராஜ், ஆகாஷ் தீப் , ஜஸ்பிரித் பும்ரா, யாஷ் தயாள்.

Also Read: Funding To Save Test Cricket

வங்கதேச டெஸ்ட் அணி: நஜ்முல் ஹொசைன் சாண்டோ (கேப்டன்), ஸாத்மன் இஸ்லாம், ஜாகிர் ஹாசன், மோமினுல் ஹேக், முஸ்ஃபிக்கூர் ரஹீம், ஷகிப் அல் ஹசன், லிட்டன் தாஸ், மெஹிதி ஹாசன் மிராஸ், ஜேக்கர் அலி, தஸ்கின் அகமது, ஹசன் மஹ்முத், நஹித் ராணா, தைஜுல் இஸ்லாம், மஹ்முதுல் ஹாசன் ஜாய், நயீம் ஹசன், காலித் அகமது.