மகளிர் ஒருநாள் உலகக்கோப்பை தொடருக்கான தகுதிச்சுற்று போட்டிகள் பாகிஸ்தானில் நடைபெற்று வருகின்றன. இதில் இன்று லாகூரில் நடைபெற்ற 10ஆவது லீக் போட்டியில் ஸ்காட்லாந்து மற்றும் வங்கதேச மகளிர் அணிகள் பலப்பரீட்சை நடத்தின. இப்போட்டியில் டாஸ் வென்ற வங்கதேச மகளிர் அணி பேட்டிங்கைத் தேர்வு செய்தது.
அதன்படி களமிறங்கிய வங்கதேச அணியின் தொடக்க வீராங்கனை இஷமா தஞ்சிம் 14 ரன்களில் ஆட்டமிழந்து ஏமாற்றமளித்தார். பின்னர் இணைந்த ஃபர்கானா ஹக் - ஷர்மின் அக்தர் இணை சிறப்பான ஆட்டத்தை வெளிப்படுத்தி அணியின் ஸ்கோரை உயர்த்தினார். இருவரும் பொறுப்புடன் விளையாடியதுடன் அரைசதங்களை பூர்த்தி செய்தும் அசத்தினார். மேற்கொண்டு இருவரும் இணைந்து இரண்டாவது விக்கெட்டிற்கு 100 ரன்கள் பார்ட்னர்ஷிப் அமைத்தும் அசத்தினர். அதன்பின் இருவரும் தலா 57 ரன்களைச் சேர்த்த கையோடு விக்கெட்டையும் இழந்தனர்.
அவர்களைத் தொடர்ந்து களமிறங்கிய கேப்டன் நிகர் சுல்தானாவும் அதிரடியாக விளையாடி அரைசதம் கடந்து அசத்தியதுடன் இறுதிவரை ஆட்டமிழக்காமல் 11 பவுண்டரிகளுடன் 89 ரன்களைச் சேர்த்து அணிக்கு தேவையான ஃபினிஷிங்கையும் கொடுத்தார். அதேசமயம் மறுமுனையில் களமிறங்கிய சோபனா மோஸ்டரி, ரிது மோனி, ஃபஹிமா கதும் உள்ளிட்டோர் பெரிதளவில் ரன்களைச் சேர்க்க தவறினாலும், வங்கதேச மகளிர் அணி 50 ஓவர்கள் முடிவில் 6 விக்கெட் இழப்பிற்கு 276 ரன்களைச் சேர்த்தது. ஸ்காட்லாந்து தரப்பில் கேபட்ன் கேத்ரின் பிரைஸ் 2 விக்கெட்டுகளை வீழ்த்தினார்.
அதன்பின் இலக்கை நோக்கி விளையாடிய ஸ்காட்லாந்து மகளிர் அணிக்கு தொடக்கமே அதிர்ச்சி காத்திருந்தது. அணியின் டாப் ஆர்டர் வீராங்கனைகள் அப்பி ஐட்கென் ஒரு ரன்னிலும், அவரைத்தொடர்ந்து களமிறங்கிய கேப்டன் கேத்ரின் பிரைஸ் 5 ரன்னிலும், மற்றொரு தொடக்க வீராங்கனையான பிப்பா ஸ்ப்ரூல் 18 ரன்னிலும் ஆட்டமிழந்து ஏமாற்றமளித்தனர். பின்னர் களமிறங்கிய ஐல்சா லிஸ்டர் 18, மேகன் மெக்கல் 5, கேத்ரின் ஃபிரேசர் 8 ரன்களில் நடையைக் கட்டிய நிலையில், நிதான ஆட்டத்தை வெளிப்படுத்திய சாரா பிரைஸும் 42 ரன்களுடன் பெவிலியனுக்கு திரும்பினார்.
இதனால் ஸ்காட்லாந்து மகளிர் அணி 110 ரன்களுக்கே 7 விக்கெட்டுகளை இழந்து தடுமாறியது. அதன்பின் இணைந்த பிரியனாஸ் சட்டர்ஜி - ரேச்சல் ஸ்லேட்டர் இணை பொறுப்புடன் விளையாடி விக்கெட் இழப்பை தடுத்து நிறுத்தியதுடன், அணியின் ஸ்கோரையும் மளமளவென உயர்த்தினர். இருவரும் தங்களுடைய அரைசதங்களை பூர்த்தி செய்து அசத்தியதுடன், 8ஆவது விக்கெட்டிற்கு 100 ரன்களுக்கு மேல் பார்ட்னர்ஷிப் அமைத்தும் அசத்தினர். அதன்பின் சிறப்பான ஆட்டத்தை வெளிப்படுத்தி வந்த பிரியனாஸ் சட்டர்ஜி 61 ரன்களில் விக்கெட்டை இழந்தார்.
Also Read: Funding To Save Test Cricket
அதேசமயம் மறுபக்கம் இறுதிவரை ஆட்டமிழக்காமல் இருந்த ரேச்சல் ஸ்லேட்டர் 61 ரன்களைச் சேர்த்த நிலையில், மறுமுனையில் களமிறங்கிய வீராங்கனைகள் சோபிக்க தவறினர். இதனால் ஸ்காட்லாந்து அணி 50 ஓவர்கள் முடிவில் 9 விக்கெட் இழப்பிற்கு 242 ரன்களை மட்டுமே சேர்த்தது. வங்கதேச அணி தரப்பில் நஹிதா அக்தர் 4 விக்கெட்டுகளை கைப்பற்றி அசத்தினார். இதன்மூலம் வங்கதேச மகளிர் அணி 34 ரன்கள் வித்தியாசத்தில் ஸ்காட்லாந்து மகளிர் அணியை வீழ்த்தி வெற்றிபெற்றதுடன், இத்தொடரில் ஹாட்ரிக் வெற்றியையும் பூர்த்தி செய்தது.