வங்கதேச அணி சமீபத்தில் ஜிம்பாப்வே அணிக்கு எதிரான இரண்டு போட்டிகள் கொண்ட டெஸ்ட் தொடரில் விளையாடியது. இத்தொடரின் முடிவில் இரு அணிகளும் தலா ஒரு வெற்றியைப் பதிவுசெய்ததுடன், 1-1 என்ற கணக்கில் டெஸ்ட் தொடரையும் சமன்செய்து அசத்தியுள்ளது.
இதனையடுத்து வங்கதேச அணியானது பாகிஸ்தானில் சுற்றுப்பயணம் மேற்கொண்டு 5 போட்டிகள் கொண்ட டி20 தொடரில் விளையாடவுள்ளது. இதில் இரு அணிகளுக்கும் இடையேயான டி20 தொடரானது மே 25ஆம் தேதி தொடங்கி ஜூன் 3ஆம் தேதி வரையில் நடைபெறவுள்ளது. மேலும் இத்தொடரின் முதலிரண்டு போட்டிகள் பைசலாபாத்திலும், கடைசி மூன்று போட்டிகள் லாகூர் கிரிக்கெட் மைதானத்திலும் நடைபெறவுள்ளன.
இந்நிலையில் இத்தொடருக்கு முன்னதாக வங்கதேச அணியானது ஐக்கிய அரபு அமீரக அணிக்கு எதிராக இரண்டு போட்டிகள் கொண்ட டி20 தொடரில் விளையாடவுள்ளதாக வங்கதேச கிரிக்கெட் வாரியம் இன்று அறிவித்துள்ளது. அதன்படி இவ்விரு அணிகளுக்கும் இடையேயான முதல் டி20 போட்டி மே 17ஆம் தேதியும், இரண்டாவது போட்டி மே 19ஆம் தேதியும் ஷார்ஜா கிரிக்கெட் மைதானத்தில் நடைபெறும் என்று அறிவித்துள்ளது.
இதன்மூலம் மூன்று ஆண்டுகளுக்கு பிறகு வங்கதேச அணி ஐக்கிய அரபு அமீரக அணிக்கு எதிராக இருதரப்பு தொடரில் விளையாடவுள்ளது. முன்னதாக கடந்த 2022ஆம் ஆண்டு இவ்விரு அணிகளும் இரண்டு போட்டிகள் கொண்ட டி20 தொடரில் விளையாடினர். துபாயில் நடைபெற்ற இப்போட்டியில் வங்கதேச அணி 2-0 என்ற கணக்கில் ஐக்கிய அரபு அமீரக அணியை வீழ்த்தி தொடரையும் முழுமையாக கைப்பற்றியது குறிப்பிடத்தக்கது.
இந்நிலையில் இதுகுறித்து பேசிய பிசிபி சிஇஓ நிஸாய் உதின் சௌத்ரி, “வரவிருக்கும் ஆசியக் கோப்பை உட்பட, சர்வதேச கிரிக்கெட் தொடருக்கான எங்கள் அணியின் தயாரிப்புகளில் இந்தப் போட்டிகள் ஒரு முக்கிய பகுதியாக இருக்கும். இந்த இரண்டு ஆட்டங்களும் BCB மற்றும் ECB இடையேயான கிரிக்கெட் உறவுகளை மேலும் வலுப்படுத்தும் என்றும், கிரிக்கெட் ரசிகர்களுக்கு தரமான பொழுதுபோக்கை வழங்கும் என்றும் நாங்கள் நம்புகிறோம்” என்றும் தெரிவித்துள்ளார்.
Also Read: LIVE Cricket Score
அவர் மேலே குறிப்பட்டது போல் ஆசிய கிரிக்கெட் கவுன்சில் நடத்தும் ஆசிய கோப்பை கிரிக்கெட் தொடரானது டி20 வடிவமாக எதிர்வரும் செப்டம்பர் மாதம் நடைபெறவுள்ளது. இதில் இந்தியா, பாகிஸ்தான், இலங்கை, ஆஃப்கானிஸ்தான், ஹாங்காக், ஓமன் உள்ளிட்ட அணிகளுடன் வ்ங்கதேசம் மற்றும் ஐக்கிய அரபு அமீரக அணிகளும் பங்கேற்கவுள்ளதால், அதற்கான முன்னோட்டமாக இத்தொடர் அமையும் என்று எதிர்பார்க்கப்படுகிறது.