பிபிஎல் 2024-25: சாம் கொண்டாஸ், டேனியல் சாம்ஸ் அதிரடியில் சிட்னி தண்டர் த்ரில் வெற்றி!
பிக் பேஷ் லீக் கிரிக்கெட் தொடரின் 14ஆவது சீசன் விறுவிறுப்பாக நடைபெற்று வருகிறது. இதில் இன்று நடைபெற்ற மூன்றாவது லீக் போட்டியில் சிட்னி தண்டர் மற்றும் அடிலெய்ட் ஸ்டிரைக்கர்ஸ் அணிகள் பலப்பரீட்சை நடத்தின. இதில் டாஸ் வென்ற சிட்னி தண்டர் அணி முதலில் பந்துவீசுவதாக அறிவித்தது.
இதனையடுத்து களமிறங்கிய அடிலெய்ட் ஸ்டிரைக்கர்ஸ் அணிக்கு மேத்யூ ஷார்ட் - ஜேக் வெதர்ரால்ட் இணை தொடக்கம் கொடுத்தனர். இதில் மேத்யூ ஷார்ட் 7 ரன்னிலும், அடுத்து களமிறங்கிய கிறிஸ் லின் 2 ரன்னிலும் விக்கெட்டை இழக்க, மறுமுனையில் அதிரடியாக விளையாடி வந்த ஜேக் வெதரால்ட் 6 பவுண்டரி, 2 சிக்ஸர்கள் என 40 ரன்களில் விக்கெட்டை இழந்து அரைசதம் அடிக்கும் வாய்ப்பை தவறவிட்டார். பின்னர் ஜோடி சேர்ந்த அலெக்ஸ் ரோஸ் மற்றும் ஜேமி ஓவர்டன் இணை அதிரடியாக விளையாடி அணியின் ஸ்கோரை உயர்த்தும் முயற்சியில் இறங்கினர்.
இதில் அலெக்ஸ் ரோஸ் 22 ரன்னில் விக்கெட்டை இழந்த நிலையில், அடுத்து களமிறங்கிய ஃபேபியன் ஆலன் 7 ரன்னிலும், அதிரடியாக விளையாடிய ஜேம்ஸ் பாஸ்லி 3 பவுண்டரி, 2 சிக்ஸர்கள் என 31 ரன்களிலும் என விக்கெட்டை இழக்க, இறுதிவரை ஆட்டமிழக்காமல் இருந்த ஜேமி ஓவர்டன் ஒரு பவுண்டரி, 4 சிக்ஸர்கள் என 45 ரன்களைச் சேர்த்து அணிக்கு ஃபினிஷிங்கைக் கொடுத்தார். இதன்மூலம் அடிலெய்ட் ஸ்டிரைக்கர்ஸ் அணி 20 ஓவர்கள் முடிவில் 8 விக்கெட்டுகளை இழந்து 182 ரன்களைச் சேர்த்தது. சிட்னி தண்டர் தரப்பில் லோக்கி ஃபெர்குசன், கிறிஸ் கிரீன் ஆகியோர் தலா 3 விக்கெட்டுகளை கைப்பற்றினர்.
இதையடுத்து சவாலான இலக்கை நோக்கி களமிறங்கிய சிட்னி தண்டர் அணியில் கேப்டன் டேவிட் வார்னர் 7 ரன்னிலும், கேமரூன் பான்கிராஃப்ட் 6 ரன்னிலும் என விக்கெட்டை இழந்து ஏமாற்றமளித்தனர். அதன்பின் இணைந்த சாம் கொண்டாஸ் - ஒலிவியர் டேவிஸ் இணை பொறுப்பான ஆட்டத்தை வெளிப்படுத்தியதுடன் அணியின் ஸ்கோரையும் மளமளவென உயர்த்தினர். இதில் சாம் கொண்டாஸ் தனது அரைசதத்தைப் பதிவுசெய்து அசத்தினார். பின் 8 பவுண்டர், 2 சிக்ஸர்கள் என 56 ரன்களைச் சேர்த்திருந்த நிலையில் சாம் கொண்டாஸ் தனது விக்கெட்டை இழந்தார்.
Also Read: Funding To Save Test Cricket
அவரைத் தொடர்ந்து 23 ரன்கள் எடுத்திருந்த நிலையில் ஒலிவியர் டேவிஸும், 29 ரன்களில் சாம் பில்லிங்ஸும் விக்கெட்டை இழக்க, பின்ன்ர் வந்த ஷெர்ஃபேன் ரூதர்ஃபோர்ட், கிறிஸ் கிரீன் ஆகியோரும் சொற்ப ரன்களில் விக்கெட்டை இழந்தனர். அவர்களுக்கு அடுத்து களமிறங்கிய டேனியல் சாம்ஸ் அபாரமான ஆட்டத்தை வெளிப்படுத்தியதுடன் 4 பவுண்டரிகள், 3 சிக்ஸர்கள் என 42 ரன்களைச் சேர்த்து அணிக்கு வெற்றியைத் தேடிக்கொடுத்தார். இதன்மூலம் சிட்னி தண்டர் அணி 2 ரன்கள் வித்தியாசத்தில் அடிலெய்ட் ஸ்டிரைக்கர்ஸ் அணியை வீழ்த்தி த்ரில் வெற்றியைப் பதிவுசெய்தது.