அமெரிக்க டி20 அணியில் இடம்பிடித்த கோரி ஆண்டர்சன்; உன்முக் சந்திற்கு வாய்ப்பு மறுப்பு!

இந்தாண்டு ஜூன் மாதம் ஐசிசியின் டி20 உலகக்கோப்பை கிரிக்கெட் தொடரானது அமெரிக்கா மற்றும் வெஸ்ட் இண்டீஸில் நடைபெறவுள்ளது. மொத்தம் 20 அணிகள் பங்கேற்கும் இத்தொடரில் எந்த அணி கோப்பையை வெல்லும் என்ற எதிர்பார்ப்பு அதிகரித்துள்ளது. மேலும் இத்தொடருக்கான போட்டி அட்டவணைகளும் வெளியிடப்பட்டு ரசிகர்களின் எதிர்பார்ப்புகளை அதிகரித்துள்ளது. இத்தொடருக்காக அனைத்து அணிகளும் தீவிரமாக தயாராகி வருகின்றன. 

அந்தவகையில் தொடரை நடத்தும் அமெரிக்கா அணியும் இந்த டி20 உலகக்கோப்பை தொடருக்காக தயராகி வருகிறது. அந்தவகையில் அந்த அணி கனடா அணிக்கு எதிராக 5 போட்டிகள் கொண்ட டி20 தொடரில் விளையாடவுள்ளது. இந்நிலையில் இத்தொடருக்கான அமெரிக்கா அணி இன்று அறிவிக்கப்பட்டுள்ளது. இதில் நியூசிலாந்து அணிக்காக சர்வதேச கிரிக்கெட்டில் விளையாடிய கோரி ஆண்டர்சன் தற்போது அமெரிக்க டி20 அணியில் சேர்க்கப்பட்டுள்ளார். 

நியூசிலாந்து அணிக்காக கடந்த 2012ஆம் அறிமுகமான கோரி ஆண்டர்சன் 2018ஆம் ஆண்டு நியூசிலாந்து கிரிக்கெட்  அணியிலிருந்து விலகுவதாக அறிவித்தார். இந்த இடைபட்ட காலத்தில் நியூசிலாந்து அணிக்காக 13 டெஸ்ட், 49 ஒருநாள் மற்றும் 31 டி20 போட்டிகளில் விளையாடி 2ஆயிரத்திற்கு மேற்பட்ட ரன்களையும், 90 விக்கெட்டுகளையும் வீழ்த்தி இருந்தார். அதன்பின் அமெரிக்காவின் மேஜர் லீக் கிரிக்கெட் தொடர்களில் பங்கேற்று வந்த கோரி ஆண்டர்சன் தற்போது அமெரிக்க அணிக்காக மீண்டும் சர்வதேச கிரிக்கெட்டில் விளையாடவுள்ளது. 

அதேசமயம் இந்தியாவிற்காக அண்டர்19 உலகக்கோப்பையை வென்றுகொடுத்த கேப்டான உன்முக் சந்த், இந்திய கிரிக்கெட்டிலிருந்து ஓய்வை அறிவித்து அமெரிக்கா அணிக்காக விளையாட ஆர்வம் காட்டினார். அதன்படி அந்நாட்டின் உள்ளூர் போட்டிகளில் சிறப்பான செயல்பட்டை வெளிப்படுத்திய உன்முக் சந்திற்கு அமெரிக்க டி20 அணியில் மீண்டும் இடம் கிடைக்கவில்லை என்பது குறிப்பிடத்தக்கது. 

அமெரிக்க அணி: மோனாங்க் படேல் (கேப்டன்), ஆரோன் ஜோன்ஸ், ஆண்ட்ரீஸ் கௌஸ், கோரி ஆண்டர்சன், கஜானந்த் சிங், ஹர்மீத் சிங், ஜெஸ்ஸி சிங், மிலிந்த் குமார், நிசார்க் படேல், நிதிஷ் குமார், நோஷ்துஷ் கெஞ்சிகே, சௌரப் நேத்ரவல்கர், ஷாட்லி வான் ஷால்க்விக், ஸ்டீவன் டெய்லர், உஸ்மான் ரபிக்.