மின்னல் வேக ஸ்டம்பிங் செய்த மகேந்திர சிங் தோனி; வைரலாகும் காணொளி!

ஐபிஎல் தொடரின் 18ஆவது சீசன் ரசிகர்களின் எதிர்பார்ப்புகளை அதிகரித்து வருகிறது. இதில் இன்று நடைபெற்ற மூன்றாவது லீக் போட்டியில்  ஐபிஎல் வரலாற்றில் மிகவும் வெற்றிகரமான இரண்டு அணிகளான சென்னை சூப்பர் கிங்ஸ் மற்றும் மும்பை இந்தியன்ஸ் அணிகள் பலப்பரீட்சை நடத்தின.

அதன்படி சென்னை சேப்பாக்கத்தில் உள்ள எம் ஏ சிதம்பரம் கிரிக்கெட் மைதானத்தில் நடைபெறும் இப்போட்டியில் டாஸ் வென்றுள்ள சென்னை சூப்பர் கிங்ஸ் அணி முதலில் பந்துவீசுவதாக அறிவித்து மும்பை இந்தியன்ஸை பேட்டிங் செய்ய அழைத்துள்ளது. இதனையடுத்து களமிறங்கிய மும்பை இந்தியன்ஸ் அணியில் ரோஹித் சர்மா ரன்கள் ஏதுமின்றியும், ரியான் ரிக்கெல்டன் 13 ரன்னிலும், வில் ஜேக்ஸ் 11 ரன்னிலும் விக்கெட்டை இழந்தனர். 

பின்னர் இணைந்த சூர்யகுமார் யாதவ் - திலக் வர்மா இணை ஓரளவு தாக்குப்பிடித்து ஸ்கோரை உயர்த்தினர். இதில் சூர்யகுமார் யாதவ் 29 ரன்னிலும், திலக் வர்மா 31 ரன்னிலும் விக்கெட்டை இழக்க, இறுதியில் தீபக் சஹார் 28 ரன்களைச் சேர்த்தார். இதன்மூலம் மும்பை இந்தியன்ஸ் அணி 20 ஓவர்கள் முடிவில் 9 விக்கெட்டுகளை இழந்து 155 ரன்களைச் சேர்த்துள்ளது. சிஎஸ்கே தரப்பில் நூர் அஹ்மத் 4 விக்கெட்டுகளையும், கலீல் அஹ்மத் 2 விக்கெட்டுகளையும் கைப்பற்றினர்.

இதனையடுத்து இலக்கை நோக்கி விளையாடிவரும் சென்னை சூப்பர் கிங்ஸ் அணியில் ராகுல் திரிபாதி 2 ரன்னில் விக்கெட்டை இழந்து ஏமாற்றமளித்தார். பின்னர் இணைந்துள்ள கேப்டன் ருதுராஜ் கெய்க்வாட் மற்றும் ரச்சின் ரவீந்திரா இணை அதிரடியாக விளையாடி அணியின் ஸ்கோரை உயர்த்தி வருகின்றனர். இந்நிலையில் இப்போட்டியில் சிஎஸ்கே அணியின் ஜாம்பவான் மகேந்திர சிங் தோனி செய்த ஸ்டம்பிங் ரசிகர்களை பழைய நினைவிற்கு அழைத்துச் சென்றுள்ளது. 

அதன்படி இன்னிங்ஸின் 11ஆவது ஓவரை நூர் அஹ்மத் வீசிய நிலையில் அந்த ஓவரைன் மூன்றாவது பந்தை எதிர்கொண்ட சூர்யகுமார் யாதவ் இறங்கி ஆட முயற்சி செய்து பந்தை தவறவிட்டார். அப்போது ஸ்டம்பிற்கு பின்னால் இருந்த தோனி, பந்தை பிடித்து மின்னல் வேக ஸ்டம்பிங்கை செய்து அசத்தினார். இந்நிலையில் தோனியின் இந்த ஸ்டம்பிங் குறித்த காணொளியானது இணையத்தில் வைரலாகி வருகிறது. 

மும்பை இந்தியன்ஸ் (பிளேயிங் லெவன்): ரோஹித் சர்மா, ரியான் ரிக்கல்டன்(விக்கெட் கீப்பர்), வில் ஜாக்ஸ், சூர்யகுமார் யாதவ்(கேப்டன்), திலக் வர்மா, நமன் திர், ராபின் மின்ஸ், மிட்செல் சாண்ட்னர், தீபக் சாஹர், டிரென்ட் போல்ட், சத்யநாராயண ராஜு.

இம்பேக்ட் வீரர்கள் - விக்னேஷ் புதூர், அஸ்வனி குமார், ராஜ் பாபா, கார்பின் போஷ், கர்ண் சர்மா

சென்னை சூப்பர் கிங்ஸ் (பிளேயிங் லெவன்): ருதுராஜ் கெய்க்வாட்(கேப்டன்), ரச்சின் ரவீந்திர, தீபக் ஹூடா, சிவம் துபே, ரவீந்திர ஜடேஜா, சாம் கரன், எம்எஸ் தோனி(கீப்பர்), ரவிச்சந்திரன் அஷ்வின், நூர் அகமது, நாதன் எல்லிஸ், கலீல் அகமது.

Also Read: Funding To Save Test Cricket

இம்பேக்ட் வீரர்கள் - ராகுல் திரிபாதி, கமலேஷ் நாகர்கோட்டி, விஜய் சங்கர், ஜேமி ஓவர்டன், ஷேக் ரஷீத்