Amanjot Kaur Equals Virat Kohli Record: இங்கிலாந்து மகளிர் அணிக்கு எதிரான இரண்டாவது டி20 போட்டியில் இந்திய வீராங்கனை அமஞ்சோத் கவுர் அரைசதம் கடந்ததன் மூலம் விராட் கோலியின் சாதனையை சமன்செய்து அசத்தியுள்ளார்.
இங்கிலாந்து - இந்தியா மகளிர் அணிகளுக்கு இடையேயான இரண்டாவது டி20 போட்டி நேற்று பிரிஸ்டோலில் நடைபெற்றது. இப்போட்டியில் டாஸை இழந்து முதலில் பேட்டிங் செய்த இந்திய மகளிர் அணியில் ஜெமிமா ரோட்ரிக்ஸ் 9 பவுண்டரி, ஒரு சிக்ஸர் என 63 ரன்களையும், இறுதிவரை ஆட்டமிழக்காமல் இருந்த அமஞ்சோத் கவுர் 9 பவுண்டரிகளுடன் 63 ரன்களையும், ரிச்சா கோஷ் 32 ரன்களையும் சேர்க்க 20 ஓவர்கள் முடிவில் 4 விக்கெட்டுகளை இழந்து 181 ரன்களைச் சேர்த்தது.
அதன்பின் இலக்கை நோக்கி விளையாடிய இங்கிலாந்து மகளிர் அணி டாமி பியூமண்ட் 8 பவுண்டரி, ஒரு சிக்ஸர் என 54 ரன்களையும், சோஃபி எக்ஸ்லெஸ்டோன் 4 பவுண்டரி, ஒரு சிக்ஸருடன் 35 ரன்களையும் சேர்த்ததை தவிர்த்து மற்ற வீரர்கள் சோபிக்க தவறினர். இதனால் அந்தஅணி 20 ஓவர்களில் 7 விக்கெட் இழப்பிற்கு 157 ரன்களை மட்டுமே சேர்த்தது. இதன்மூலம் இந்திய மகளிர் அணி 24 ரன்கள் வித்தியாசத்தில் இங்கிலாந்து மகளிர் அணியை வீழ்த்தியதுடன், 2-0 என்ற கணக்கில் முன்னிலையும் பெற்றுள்ளது.
இந்நிலையில் இப்போட்டியில் பேட்டிங் மற்றும் பந்துவீச்சில் சிறப்பான ஆட்டத்தை வெளிப்படுத்தி அணியின் வெற்றிக்கு உதவிய அமஞ்சோத் கவுர் ஆட்டநாயகியாகத் தேர்வு செய்யப்பட்டார். இதன்மூலம் அமஞ்சோத் கவுர் சர்வதேச கிரிக்கெட்டில் விராட் கோலியின் சாதனை ஒன்றை சமன்செய்துள்ளார். அதன்படி வெளிநாட்டு மண்ணில் சர்வதேச டி20 போட்டியில் 60 அல்லது அதற்கு மேற்பட்ட ரன்கள் எடுத்து 1 விக்கெட்டை வீழ்த்திய இரண்டாவது இந்திய கிரிக்கெட் வீரர் என்ற பெருமையை அமன்ஜோத் பெற்றுள்ளார்.
Also Read: LIVE Cricket Score
முன்னதாக 2012 ஆம் ஆண்டு கொழும்பில் பாகிஸ்தானுக்கு எதிராக நடைபெற்ற போட்டியில் விராட் கோலி ஆட்டமிழக்காமல் 78 ரன்கள் எடுத்து 1 விக்கெட்டை வீழ்த்தியிருந்தார். அந்தப் போட்டியில் விராட் கோலி ஆட்ட நாயகனாகத் தேர்ந்தெடுக்கப்பட்டார், இந்தப் போட்டியில் அமஞ்சோத் கவுர் ஆட்ட நாயகியாகத் தேர்ந்தெடுக்கப்பட்டார். அதிலும் குறிப்பாக அமஞ்சோத் கவுர் தனது 14ஆவது டி20 போட்டியில் இந்த மைல்கல்லை எட்டியுள்ளார் என்பது குறிப்பிடத்தக்கது.