வெஸ்ட் இண்டீஸ் மகளிர் அணி தற்சமயம் இங்கிலாந்தில் சுற்றுப்பயணம் செய்து மூன்று போட்டிகள் கொண்ட டி20 தொடரில் விளையாடி வருகிறது. இதில் நடைபெற்று முடிந்த முதல் போட்டியில் இங்கிலாந்து அணி வெற்றிபெற்று 1-0 என்ற கணக்கில் தொடரில் முன்னிலைப் பெற்றுள்ளது.
இதையடுத்து இங்கிலாந்து - வெஸ்ட் இண்டீஸ் மகளிர் அணிகளுக்கு இடையேயான இரண்டாவது டி20 போட்டி ஹோவ்வில் உள்ள கவுண்டி கிரிக்கெட் மைதானத்தில் நேற்று நடைபெற்றது. இப்போட்டியில் டாஸ் வென்ற இங்கிலாந்து மகளிர் அணி முதலில் பந்துவீசுவதாக அறிவித்தது. இதையடுத்து களமிறங்கிய வெஸ்ட் இண்டீஸ் மகளிர் அணிக்கு கியானா ஜோசப் மற்றும் கேப்டன் ஹீலி மேத்யூஸ் இணை தொடக்கம் கொடுத்தனர். இதில் கியானா ஜோசப் 4 ரன்னிலும், ஹீலி மேத்யூஸ் 6 ரன்னிலும் என ஆட்டமிழக்க அடுத்து களமிறங்கிய ஸைதா ஜேம்ஸும் 6 ரன்னில் விக்கெட்டை இழந்தார்.
அவர்களைத் தொடர்ந்து களமிறங்கிட ஸ்டெஃபானி டெய்லரும் ரன்கள் ஏதுமின்றி ஆட்டமிழந்து ஏமாற்றமளிக்க, பின்னர் ஜோடி சேர்ந்த ஷமைன் காம்பெல் மற்றும் ஷபிகா கஜ்னபி இணை ஓரளவு தாக்குப்பிடித்து அணியின் ஸ்கோரை உயர்த்தும் முயற்சியில் இறங்கினர். இதில் ஷமைன் காம்பெல் 26 ரன்னிலும், சபிகா கஜ்னபி 22 ரன்னிலும் என விக்கெட்டை இழக்க அடுத்து களமிறங்கிய வீராங்கனைகளும் சொற்ப ரன்களில் ஆட்டமிழந்தனர். இதனால் வெஸ்ட் இண்டீஸ் அணி 20 ஓவர்கள் முடிவில் 9 விக்கெட்டுகளை இழந்து 81 ரன்களை மட்டுமே எடுத்தது. இங்கிலாந்து தரப்பில் லாரன் பெல், சார்லி ஆர்லெட் தலா 3 விக்கெட்டுகளை வீழ்த்தினார்.
இதனைத்தொடர்ந்து இலக்கை நோக்கி களமிறங்கிய இங்கிலாந்து மகளிர் அணிக்கு டேனியல் வையட் மற்றும் சோபியா டங்க்லி இணை தொடக்கம் கொடுத்தனர். இப்போட்டியில் பெரிதும் எதிர்பார்க்கப்பட்ட டேனியல் வையட் இன்னிங்ஸின் முதல் பந்திலேயே விக்கெட்டை இழந்து ஏமாற்றமளித்தார். அதன்பின் சொபியா டங்க்லியுடன் ஜோடி சேர்ந்த கேப்டன் நாட் ஸ்கைவர் பிரண்ட் அதிரடியாக விளையாடி அணியின் ஸ்கோரை உயர்த்தும் முயற்சியில் இறங்கினார். இப்போட்டியில் தொடர்ந்து அதிரடியாக விளையாடி வந்த நாட் ஸகைவர் தனது அரைசதத்தையும் பூர்த்தி செய்து அசத்தினார்.
Also Read: LIVE Cricket Score
மேற்கொண்டு இப்போட்டியில் இறுதிவரை ஆட்டமிழக்காமல் இருந்த நாட் ஸ்கைவர் பிரண்ட் 10 பவுண்டரிகளுடன் 55 ரன்களையும், சோபியா டங்க்லி 24 ரன்களையும் சேர்த்து அணிக்கு வெற்றியைத் தேடிக்கொடுத்தனர். இதன்மூலம் இங்கிலாந்து மகளிர் அணி 9.2 ஓவர்களில் இலக்கை எட்டியதுடன் 9 விக்கெட் வித்தியாசத்தில் வெஸ்ட் இண்டீஸ் மகளிர் அணியை வீழ்த்தி வெற்றிபெற்றதுடன், 2-0 என்ற கணக்கில் தொடரையும் கைப்பற்றி அசத்தியது. இப்போட்டியில் சிறப்பான பந்துவீச்சை வெளிப்படுத்திய எமிலி ஆர்லெட் ஆட்டநாயகி விருதை வென்றார்.