ஐசிசி டெஸ்ட் தரவரிசை : முதலிடம் பிடித்து அசத்திய ஜோ ரூட்!

இங்கிலாந்தில் சுற்றுப்பயணம் செய்து வந்த வெஸ்ட் இண்டீஸ் அணி மூன்று போட்டிகள் கொண்ட டெஸ்ட் தொடரில் விளையாடியது. இத்தொடரின் முடிவில் இங்கிலாந்து அணியானது 3-0 என்ற கணக்கில் வெஸ்ட் இண்டீஸ் அணியை வீழ்த்தி வெற்றிபெற்றதுடன் ஒயிட்வாஷ் செய்தும் அசத்தியுள்ளது. மேலும் இப்போட்டியின் மூன்றாவது டெஸ்ட் போட்டிக்கான ஆட்டநாயகனாக மார்க் வுட்டும், தொடர் நாகன் விருதினை வெஸ்ட் இண்டீஸின் ஜெய்டன் சீல்ஸ் மற்றும் இங்கிலாந்து கஸ் அட்கின்ஸன் தேர்வு செய்யப்பட்டுள்ளனர். 

இந்நிலையில் சர்வதேச கிரிக்கெட் கவுன்சிலான ஐசிசி டெஸ்ட் கிரிக்கெட் வீரர்களுக்கான தரவரிசைப் பட்டியலை இன்று வெளியிட்டுள்ளது. இதில், பேட்டர்களுக்கான தரவரிசையில் வெஸ்ட் இண்டீஸ் அணிக்கு எதிரான டெஸ்ட் தொடரில் அபாரமான ஆட்டத்தை வெளிப்படுத்திய இங்கிலாந்து அணியின் நட்சத்திர வீரர் ஜோ ரூட் முதலிடத்தைப் பிடித்து அசத்தியுள்ளார். முன்னதாக நியூசிலாந்து வீரர் கேன் வில்லியம்சன் முதலிடத்தில் இருந்த நிலையில், அவரை பின்னுக்குத் தள்ளி ஜோ ரூட் முதலிடம் பிடித்து அசத்தியுள்ளார். 

மேற்கொண்டு பாகிஸ்தான் அணியின் பாபர் ஆசாம், நியூசிலாந்தின் டேரில் மிட்செல், ஆஸ்திரேலியாவின் ஸ்டீவ் ஸ்மித், இந்திய அணியின் ரோஹித் சர்மா ஆகியோர் அடுத்தடுத்த இடங்களில் நீடித்து வருகின்றனர். அதேசமயம் இங்கிலாந்து அணியின் ஹாரி ப்ரூக் 4 இடங்கள் பின் தங்கியதுடன் 7ஆம் இடத்திற்கு தள்ளப்பட்டுள்ளார். மேலும் இப்பட்டியலில் இந்திய அணியைச் சேர்ந்த யஷஸ்வி ஜெய்ஸ்வால் 8ஆம் இடத்திலும், விராட் கோலி 10 ஆம் இடத்திலும் தொடர்கின்றனர். அதேபோல் ஷுப்மன் கில் ஒரு இடம் முன்னேறி 19ஆம் இடத்தைப் பிடித்துள்ளது குறிப்பிடத்தக்கது. 

அதேசமயம் பந்துவீச்சாளர்களுக்கான தரவரிசையில் இந்திய வீரர் ரவிச்சந்திரன் ஆஸ்வின் தொடர்ந்து முதலிடத்தில் நீடித்து வருகிறார். அவரைத்தொடர்ந்து ஆஸ்திரேலிய அணியின் ஜோஷ் ஹசில்வுட், இந்திய அணியின் ஜஸ்பிரித் பும்ரா ஆகியோர் இரண்டாம் இடத்தில் நீடித்து வருகின்றனர். மேற்கொண்டு நான்காம் இடத்தில் தென் ஆப்பிரிக்காவின் காகிசோ ராபடாவும், 5ஆம் இடத்தில் பாட் கம்மின்ஸும், 6ஆம் இடத்தில் நாதன் லையனும், 7ஆம் இடத்தில் ரவீந்திர ஜடேஜாவும் தொடர்கின்றனர். 

மேற்கொண்டு டெஸ்ட் ஆல் ரவுண்டர்களுக்கான தரவரிசைப் பட்டியாலில் இங்கிலாந்து அணி கேப்டன் பென் ஸ்டோக்ஸ் ஒரு இடம் முன்னேறி 6ஆம் இடத்தையும், இங்கிலாந்தின் கிறிஸ் வோக்ஸ் மூன்று இடங்கள் முன்னேறி 9ஆம் இடத்தையும் பிடித்துள்ளனர். இந்த பட்டியலில் இந்திய வீரர்கள் ரவீந்திர ஜடேஜா முதல் இடத்திலும், ரவிச்சந்திரன் அஸ்வின் இரண்டாம் இடத்திலும் தொடர்கின்றனர். மேற்கொண்டு அக்ஸர் படேல் தொடர்ந்து 5ஆம் இடத்தில் நீடித்து வருகிறார். 

Also Read: Akram ‘hopes’ Indian Team Will Travel To Pakistan For 2025 Champions Trophy