ZIM vs WI: ஜிம்பாப்வே டெஸ்ட் அணியில் இடம் பிடித்தா கேரி பேலன்ஸ்!

கிரேக் பிராத்வெய்ட் தலைமையிலான வெஸ்ட் இண்டீஸ் அணி, தற்போது ஜிம்பாப்வேயில் சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாடவுள்ளது. இரு அணிகளுக்கும் இடையேயான முதலாவது டெஸ்ட் வரும் 4ஆம் தேதி முதல் 8ஆம் தேதி நடைபெற உள்ளது. 

இதைத்தொடர்ந்து, இரண்டாவது டெஸ்ட் போட்டி வரும் 12ஆம் தேதி முதல் 16ஆம் தேதி வரை நடைபெற உள்ளது. இரு போட்டிகளுமே புலவாயோவில் உள்ள குயின்ஸ் ஸ்போர்ட்ஸ் கிளப் மைதானத்தில் நடைபெற உள்ளன.

இந்நிலையில் இந்த டெஸ்ட் தொடருக்கான ஜிம்பாப்வே அணி அறிவிக்கப்பட்டுள்ளது. அணியின் கேப்டனாக 37 வயதான கிரேக் எர்வின் நியமிக்கப்பட்டுள்ளார். அணியின் வழக்கமான கேப்டன் சீன் வில்லியம்ஸ் காயம் காரணமாக இந்த டெஸ்ட் தொடரில் விளையாடவில்லை என்பது குறிப்பிடத்தக்கது. 

தற்போது கேப்டனாக நியமிக்கப்பட்டுள்ள கிரேக் எர்வின், இதுவரை 18 டெஸ்ட் போட்டிகளில் ஆடியுள்ளார். டெஸ்ட் போட்டிகளில் அவரது சராசரி 35.53 ரன்கள். அதில் அவர் 3 சதங்கள், 4 அரை சதங்களுடன் 1,208 ரன்களை குவித்துள்ளார்.

அதேசமயம் இங்கிலாந்து அணிக்காக விளையாடி பின் ஜிம்பாப்வே ஒருநாள், டி20 அணிகளில் விளையாடி வந்த கேரி பேலன்ஸிற்கு தற்போது டெஸ்ட் அணியிலும் வாய்ப்பு தரப்பட்டுள்ளது. அதேசமயம் அணியின் முக்கியமான வீரர்கள் சிகந்தர் ராஸா, ரியான் பர்ல், டெண்டாய் சடாரா மற்றும் முசாராபானி ஆகியோரும் இத்தொடரில் பல்வேறு காரணங்களால் விளையாடவில்லை.

ஜிம்பாப்வே அணி: கேரி பேலன்ஸ், சாமுனோர்வா சிபாபா, தனகா சிவாங்கா, கிரேக் எர்வின் (கேப்டன்), பிராட் எவன்ஸ், ஜாய்லார்ட் கும்பி, இன்னசென்ட் கையா, தனுனுர்வா மகோனி, வெலிங்டன் மசகட்ஸா, குட்ஸாய் மவுன்ஸே, பிராண்டன் மவுடா, ரிச்சர்ட் ங்கராவா, விக்டர் நியுச்சி, மில்டன் ஷும்பா, டொனால்ட் டிரிபானோ, தஃபட்ஸ்வா சிகா.