உலகக்கோப்பை தொடருக்கான இந்திய அணியை தேர்வு செய்த ஹர்பஜன் சிங்!

வரும் ஜூன் மாதம் வெஸ்ட் இண்டீஸ் மற்றும் அமெரிக்காவில் ஐசிசியின் டி20 உலகக்கோப்பை கிரிக்கெட் தொடர் நடைபெறவுள்ளது. மொத்தம் 20 அணிகள் பங்கேற்கும் இத்தொடரில் எந்த அணி சாம்பியன் பட்டத்தை வெல்லும் என்ற எதிர்பார்ப்புகள் அதிகரித்துள்ளன. இதனால் இந்த டி20 உலகக்கோப்பை தொடருக்காக அனைத்து அணிகளும் தீவிரமாக தயாராகி வருகின்றன. 

அந்தவகையில், இத்தொடரில் ஒவ்வொரு அணியும் தங்களது 15 பேர் கொண்ட வீரர்கள் பட்டியலை இம்மாத இறுதிக்குள் அறிவிக்கும் என்ற எதிர்பார்ப்புகள் உள்ளன. அந்தவகையில், இந்த டி20 உலகக்கோப்பை தொடருக்கான இந்திய அணியும் இன்னும் ஒருசில தினங்களில் அறிவிக்கப்படும் என தகவல்கள் வெளியாகியுள்ளன. இருப்பினும் இந்திய அணியில் எந்தெந்த வீரர்கள் இடம்பெறுவார்கள் என்ற எதிர்பார்ப்புகள் அதிகரித்துள்ளன.

இந்நிலையில் டி20 உலகக்கோப்பை தொடருக்கான இந்திய அணியில் யார் யார் இடம்பெறுவார்கள் என்ற கணிப்புகளை முன்னாள் வீரர்கள் கணித்து வருகின்றனர். அந்தவகையில் இந்திய அணியின் முன்னாள் வீரர் ஹர்பஜன் சிங் டி20 உலகக்கோப்பை தொடருக்கான இந்திய அணியை தேர்வு செய்துள்ளார். அவர் தேர்வு செய்துள்ள அணியில் ரோஹித் சர்மா, யஷஸ்வி ஜெய்ஸ்வா, விராட் கோலி, சூர்யகுமார் யாதவ் ஆகியோருக்கு இடம் கிடைத்துள்ளது.

மேலும் விக்கெட் கீப்பர்களாக ரிஷப் பந்த், சஞ்சு சாம்சனை தேர்வு செய்துள்ள அவர், அணியின் ஃபினிஷர்களாக ரிங்கு சிங், ஷிவம் தூபே ஆகியோரைத் தேர்வு செய்துள்ளனர். அணியின் சுழற்பந்துவீச்சாளர்களாக ரவீந்திர ஜடேஜா, யுஸ்வேந்திர சஹால், குல்தீப் யாதவ் ஆகியோரைத் தேர்வு செய்துள்ள அவர், அணியின் வேகப்பந்து வீச்சாளர்களாக ஜஸ்ப்ரித் பும்ரா, ஆவேஷ் கான், அர்ஷ்தீப் சிங் மற்றும் மயங்க் யாதவ் ஆகியோரை தேர்வு செய்துள்ளார். 

இருப்பினும் ஹர்பஜன் சிங் தேர்வு செய்துள்ள இந்த அணியில் இந்திய அணியின் முன்னாள் கேப்டன் ஹர்திக் பாண்டியா, நட்சத்திர வேகப்பந்து வீச்சாளர் முகமது சிராஜ் ஆகியோருக்கு வாய்ப்பு வழங்கவில்லை. மேலும் நடப்பு ஐபிஎல் சீசனில் சிறப்பான ஆட்டத்தை வெளிப்படுத்தி வரும் அக்ஸர் படேல், ரியான் பராக் போன்ற வீரர்களுக்கும் இந்த அணியில் இடம் கிடைக்கவில்லை என்பது குறிப்பிடத்தக்கது. 

ஹர்பஜன் சிங் தேர்வு செய்த இந்திய அணி: ரோஹித் சர்மா (கேப்டன்), யஷஸ்வி ஜெய்ஸ்வால், விராட் கோலி, சூர்யகுமார் யாதவ், ரிஷப் பந்த், ரிங்கு சிங், சஞ்சு சாம்சன், ஷிவம் துபே, ரவீந்திர ஜடேஜா, யுஸ்வேந்திர சாஹல், குல்தீப் யாதவ், ஜஸ்பிரித் பும்ரா, அவேஷ் கான், அர்ஷ்தீப் சிங், மயங்க் யாதவ்.