ஆஸ்திரேலியா, தென் ஆப்பிரிக்க தொடரிலிருந்து ஹர்திக் பாண்டியா விலகல்?

இந்திய மண்ணில் விறுவிறுப்பாக அரங்கேறி வரும் ஐசிசி ஒருநாள் உலகக் கோப்பை கிரிக்கெட் திருவிழா இறுதிக் கட்டத்தை எட்டியிருக்கிறது. இந்த தொடரில் புதன்கிழமை நியூசிலாந்து அணிக்கு எதிராக மும்பையில் நடைபெற்ற முதல் அரையிறுதி ஆட்டத்தில் இந்திய அணி 70 ரன்கள் வித்தியாசத்தில் வெற்றிபெற்று இறுதிப்போட்டிக்கு முன்னேறியது.

இதேபோல், நேற்று கொல்கத்தாவில் நடைபெற்ற 2ஆவது அரையிறுதி ஆட்டத்தில் தென் ஆப்பிரிக்காவை மூன்று விக்கெட்டுகள் வித்தியாசத்தில் வீழ்த்திய ஆஸ்திரேலிய அணி இறுதிப்போட்டிக்கு தகுதி பெற்றுள்ளது. வருகிற ஞாயிற்றுக்கிழமை ( நவம்பர் 19 ஆம் தேதி) குஜராத் மாநிலம் அஹ்மதாபாத்தில் உள்ள நரேந்திர மோடி மைதானத்தில் அரங்கேறும் இறுதிப் போட்டியில் இந்தியா - ஆஸ்திரேலியா அணிகள் பலப்பரீட்சை நடத்த உள்ளன. 

இந்நிலையில், இந்திய அணியின் ஆல்-ரவுண்டரும், துணை கேப்டனுமான ஹர்திக் பாண்டியா, கணுக்கால் காயத்தில் இருந்து மீளாததால், உலகக் கோப்பை கிரிக்கெட்டில் இருந்து விலகுவதாக கடந்த 4ஆம் தேதி உறுதி செய்தது. வங்கதேச அணிக்கு எதிரான போட்டியின் போது பந்தை காலை வைத்து தடுக்க முயன்ற ஹர்திக் பாண்டியாவுக்கு இடது கணுக்காலில் காயம் ஏற்பட்டது.

இதனையடுத்து, அவரை பரிசோதித்த மருத்துவர்கள் அவருக்கு சிகிச்சை அளிக்க பெங்களூருவில் உள்ள தேசிய கிரிக்கெட் அகாடமிக்கு அவசரமாக அனுப்பி வைத்தனர். அவருக்கு சிகிச்சை அளிக்க இங்கிலாந்தில் இருந்து சிறப்பு மருத்துவர் ஒருவரும், தேவையான ஊசிகளும் வரவழைக்கப்பட்டன. ஆனால், அவருக்கு காயம் முழுமையாக குணமடையாத நிலையில், உலகக் கோப்பை கிரிக்கெட்டில் இருந்து விலகுவதாக தெரிவிக்கப்பட்டது. அவருக்குப் பதிலாக வேகப்பந்து வீச்சாளர் பிரசித் கிருஷ்ணா இந்திய அணியில் சேர்க்கப்பட்டார். 

இந்த நிலையில், ஹர்திக் பாண்டியா கணுக்காலில் ஏற்பட்ட காயம் காரணமாக குறைந்தது இன்னும் இரண்டு மாதங்களுக்கு விளையாடமாட்டார் என்றும், அவர் ஆஸ்திரேலியாவுக்கு எதிராக சொந்த மண்ணில் நடக்கவிருக்கும் டி20 தொடர் மற்றும் தென் ஆப்பிரிக்காவில் நடக்கும் மூன்று டி20 மற்றும் மூன்று ஒருநாள் போட்டிகளையும் தவறவிடக்கூடும் என தகவல் வெளியாகியுள்ளது.

ஹர்திக் பாண்டியாவுக்கு அறுவை சிகிச்சை தேவைப்படுமா என்பது குறித்து மருத்துவக் குழு இன்னும் முடிவு எடுக்கவில்லை. இதனால் இந்திய டி20 அணியின் கேப்டனாக சூர்யகுமார் யாதவ் அல்லது ருதுராஜ் கெய்க்வாட் நியமிக்கப்படலாம் என எதிர்பார்க்கப்படுகிறது.